ကလေးမြိုနယ်အတွင်း တင်းမာနေသည့် စစ်ရေးအခြေ အနေကြောင့် ကလေး – ဂန့်ဂေါလမ်းပိုင်းကို ကားများ တစ်ပတ်အတွင်းသွားလာခြင်း မပြုရန် ကလေး PDFက ယနေ့(နိုဝင်ဘာ ၁၉ ရက်)အသိပေး ထုတ်ပြန်သည်။
စစ်ရေးတင်းမာနေမှု အနေအထားအရ အချိန်မရွေးတိုက်ပွဲများ ဖြစ်ပေါ်လာနိုင်သည့်အတွက် ကလေး-ဂန့်ဂေါလမ်းပိုင်းအား ယနေ့ကစ၍ ရက်သတ္တပတ်အတွင်း မည်သည့် မော်တော်ယာဉ်မှ ဖြတ်သန်းသွားလာခြင်း မပြုကြရန် မေတ္တာရပ်ခံထားသည်။
လက်ရှိတွင် ကလေး-ဂန့်ဂေါလမ်းပိုင်းအား အာဏာသိမ်းစစ်တပ်နှင့်ထောက်တိုက်များက စစ်ကူထောက်ပံ့ရေး သယ်ယူပိုဆောင်ခြင်းများအတွက် အသုံးပြုနေခြင်းကြောင့် ပစ်ခတ်ဖောက်ခွဲတိုက်ခိုက်မှုများ ဖြစ်ပေါ်လာပါက ပြည်သူများဘေးကင်းရန်အတွက် ကြိုတင်အသိပေးရခြင်း ဖြစ်ကြောင်းထုတ်ပြန်ချက်၌ ပါရှိသည်။
နိုဝင်ဘာ ၁၈ ရက်က ကလေးမြို့နယ်ချင်းဆိုင်ရွာအနီးမှာ စစ်ကောင်စီလက်အောက်ခံ လေ့ကျင့်ရေးတပ်ရင်း အမှတ်(၁ဝ)၏တပ်ဖွဲ့တစ်ခုကို ကလေး PDF လက်အောက်ခံ UGF မြို့ပြပြောက်ကျားတပ်ဖွဲ့က မိုင်းဆွဲ တိုက်ခိုက်မှုကြောင့် ဗိုလ်ကြီးတစ်ဦးအပါအဝင် စစ်ကောင်စီဘက်က ၁၅ ဦး ထက်မနည်းသေဆုံးခဲ့ကြောင်းသိရသည်။
Public Service Announcement
ထို့အပြင် နို၀င်ဘာ၁၇ရက်ကလည်း ဒေသခံကာကွယ် ရေးတပ်သားများ ရှေ့တန်းထွက်ချိန်တွင် စခန်း၌ကျန်ခဲ့သည့် နေမကောင်းသည့် တပ်သားနှစ်ဦးနှင့် ဆေးတပ်သားအမျိုးသမီး၁၀ဦးကို အကြမ်းဖက်စစ်တပ်က ဝင်ရောက်တိုက်ခိုက်ခဲ့သည်။
အဆိုပါ ၁၂ဦးအနက် ကျဆုံးသွားခဲ့သည့်သုံးဦး၏ ရုပ်အလောင်းများကို ယမန်နေ့က တွေ့ရှိခဲ့ပြီး ကောင်းမွန်စွာ သင်္ဂြိုလ်ပေးခဲ့သည်ဟု ကလေး PDFက ဆိုသည်။
ကျန်ရှိသည့် အမျိုးသမီးဆေးတပ်သား၉ဦးကိုမူ နဂါးပွက်ကျေးရွာသို့ခေါ်ဆောင်သွားသည်ဟု PDF (ကလေး)က ထုတ်ပြန်ထားပြီး လက်ရှိတွင် စစ်ကောင်စီကို ပိတ်ဆို့တိုက်ခိုက်နေကြောင်း ပြည်သူ့ကာကွယ်ရေးတပ်များက ထုတ်ပြန်ထားသည်။
