ဩဂုတ်-၈၊၂၀၂၅။ ရှိန်း/People’s Spring
စစ်မှုထမ်း အပတ်စဉ် ၁၆အတွက် မန္တလေးမြို့မှာ ပေါ်တာဆွဲတာတွေ၊ မဲပေါက်ထားသူတွေကို နေအိမ်အတွင်း ဝင်ဖမ်းတာတွေ စတင်ပြုလုပ်နေပြီလို့ မြို့ခံတွေဆီက သိရပါတယ်။
စစ်မှုထမ်းအပတ်စဉ် ၁၆အတွက် မဲပေါက်သူတွေကို မန္တလေးမြို့၊အောင်မြေသာစံမြို့နယ် ညောင်ကွဲရပ်ကွက်မှာ နေအိမ်အတွင်းအထိ ဝင် ရောက်ဖမ်းဆီးတာ၊ အလုပ်ရုံတွေအထိ လိုက်လံ ဖမ်းဆီးတာတွေပြုလုပ်နေတယ်လို့ မြို့ခံတွေက ပြောပါတယ်။
“၃ ရက်လောက်ရှိပြီ။ တအားပြန်ဆွဲနေတာ။ ည ၈နာရီလောက်ဆိုလမ်းပေါ်လူရှင်းနေပြီ။ ညောင်ကွဲရပ်ကွက်မှာဆိုရင် မဲမပေါက်လည်း မိရင် ဖမ်းခေါ်သွားတာ”လို့ ရပ်ကွက်နေပြည်သူတစ်ဦးက ပြောပါတယ်။
Public Service Announcement
ဒါ့အပြင် ဩဂုတ် ၆ ရက်ကလည်း ပြည်ကြီးတံခွန်မြို့နယ်ကအမျိုးသားတစ်ဦးကို စစ်မှုထမ်းမဲ ပေါက်ထားလို့ဆိုပြီး ည၈နာရီမှာ နေအိမ်အတွင်း ဝင်ရောက်ဖမ်းဆီးခဲ့တယ်လို့ သိရပါတယ်။
ဩဂုတ် ၅ ရက် မနက်၁၀နာရီလောက်ကလည်း မဟာအောင်မြေမြို့နယ်က ရေခဲမုန့်အလုပ်ရုံအတွင်းကို ဝင်ပြီး ယောကျာ်းလေး ၃ဦးကို ပေါ်တာဆွဲဖမ်းဆီးသွားတယ်လို့ သိရပါတယ်။
စစ်ကောင်စီတပ်က စစ်မှုထမ်းတွေကို အသုံးပြုပြီး မန္တလေးတိုင်းနဲ့ စစ်ကိုင်းတိုင်းတွေမှာ ဆက်တိုက်ထိုးစစ်ဆင်နေပြီး လက်ရှိမှာ မန္တလေးတိုင်းအတွင်းက မတ္တရာမြို့နယ်၊သပိတ်ကျင်းနဲ့ ပြင်ဦးလွင်မြို့နယ်တို့မှာ တိုက်ပွဲ တွေဖြစ်နေတယ်လို့သိရပါတယ်။
