သြဂုတ်-၂၂၊ ၂၀၂၅။ အိမ်သွင်/People’s Spring
စစ်ကိုင်းတိုင်း၊ မော်လိုက်မြို့အနီးတွင် ရစ်ခ်တာစကေး ၅ ဒသမ ၆ အဆင့် ငလျင် ယနေ့ နံနက် ၁၁နာရီ ၂၆ မိနစ်က လှုပ်ရှားသွားသည်။
မော်လိုက်မြို့၏ တောင်-အနောက်တောင်ဘက် ၃၅ ကီလိုမီတာအကွာ၊ မြေအောက်အနက် ၁၀၃ ကီလိုမီတာကိုဗဟိုပြု၍ လှုပ်ရှားသွားခြင်းဟု အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန(MOHADM)က ထုတ်ပြန်သည်။
ထိုင်းမိုးလေဝသဌာန(TMD)၏ ထုတ်ပြန်ချက်တွင် ရစ်ခ်တာစကေး ၅ ဒသမ ၄ အဆင့်ရှိသည်ဟု ဖော်ပြထားသည်။
Public Service Announcement
မြန်မာနိုင်ငံတွင် ဩဂုတ် ၂၀ရက် ညပိုင်းမှ ယနေ့ နံနက်ပိုင်းအထိ ရစ်ခ်တာစကေး ၄ မှ ၆ အဆင့်ကြား ငလျင် ငါးကြိမ်လှုပ်ရှားခဲ့ပြီး လေးကြိမ်သည် မြန်မာ့ပင်လယ်ပြင်အတွင်း ဗဟိုပြုခဲ့သည်။
ရန်ကန်၊ ဧရာဝတီတိုင်းတို့နှင့်ဆက်စပ်နေသော မြန်မာ့ကမ်းရိုးတန်းအနီးတွင် ဩဂုတ် ၂၀ရက် ည ၇နာရီ ၁၆မိနစ်က ရစ်ခ်တာစကေး ၅ အဆင့်၊ ထိုနေ့ည ၁၀နာရီကျော်တွင်လည်း ၄ ဒသမ ၁နှင့် ၄ ဒသမ၂ အဆင့်၊ ဩဂုတ် ၂၁ရက် နံနက်တွင် ၄ ဒသမ ၇ အဆင့်တို့လှုပ်ရှားခဲ့သည်။ အဆိုပါငလျင်များကို ရန်ကုန်မြို့တွင် သိသာစွာ ခံစားခဲ့ရသည်။
မြန်မာ့ကမ်းရိုးတန်းအနီးတွင် ငလျင်ငယ်များတောက်လျောက် လှုပ်ခတ်နေသည်ကို သတိပြုသင့်ကြောင်း MOHADMနှင့် ဘူမိဗေဒပညာရှင်များက သတိပေးထားသည်။
