ဩဂုတ်−၂၃၊ ၂၀၂၅။ထားမြတ်/People’s Spring
အာဏာသိမ်းစစ်ကောင်စီ ကြိုးပမ်းနေသည့် အတုအယောင်ရွေးကောက်ပွဲသည် မြန်မာနိုင်ငံတွင်း ပဋိပက္ခများကိုသာ တိုးပွားလာစေမည့်အပြင် ဒေသတွင်း မတည်ငြိမ်မှုများပိုမိုပေါ်ပေါက်လာစေမည် ဖြစ်သောကြောင့် ကန့်ကွက်တားဆီးကြရန် အမျိုးသားဒီမိုကရေစီအဖွဲ့ချုပ်(NLD) ဗဟိုအလုပ်ကော်မတီက ယနေ့ ဩဂုတ် ၂၃ရက်တွင် ထုတ်ပြန်ကြေညာသည်။
ယနေ့မနက်က NLD ဒုတိယဗဟိုကော်မတီ၏ ကြားကာလဆဌမအကြိမ် အစည်းအဝေးကို Zoom မှတဆင့် ကျင်းပခဲ့ပြီး အထက်ပါအတိုင်း အတည်ပြု ထုတ်ပြန်ခဲ့ခြင်းဖြစ်သည်။
စစ်ကောင်စီ၏ ရွေးကောက်ပွဲအား မည်သည့်နည်းနှင့်မျှ အသိအမှတ်မပြု၊ ပူးပေါင်းဆောင်ရွက်ခြင်းမပြုရန်နှင့် ရွေးကောက်ပွဲကျင်းပရေး ဆိုင်ရာ လုပ်ငန်းစဥ်တိုင်းကို ကန့်ကွက်တားဆီးရမည်ဟု ဆိုသည်။
Public Service Announcement
ထိုအပြင် စစ်အာဏာသိမ်းမှုကြောင့် ပေါ်ပေါက်လာသော မြန်မာ့နိုင်ငံရေးပြဿနာများကို ဖြေရှင်း ရာတွင် အမျိုးသားဒီမိုကရေစီအဖွဲချုပ်ဥက္ကဋ္ဌ ဒေါ်အောင်ဆန်းစုကြည် မပါဝင်သောတွေ့ဆုံဆွေးနွေးမှုများသည် ပြေလည်မှုမရရှိနိုင်သောကြောင့် မတရားဖမ်းဆီးခံထားရသော ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားများအားလုံး ခြွင်းချက်မရှိ အမြန်ဆုံးလွတ်မြောက်ရေးကို လုပ်ဆောင်နိုင်သည့် နည်းလမ်းမျိုးစုံအသုံးပြု၍ ကြိုးပမ်း ဆောင်ရွက်ရန်လည်း ထုတ်ပြန်ချက်၌ ဖော်ပြထားသည်။
ယနေ့ ကျင်းပသည့် အစည်းအဝေးသို့ NLD သဘာပတိအဖွဲ့ဝင် မန်းဂျော်နီက သဘာပတိအဖြစ်ဆောင်ရွက်ခဲ့ပြီး ဗဟိုအလုပ်အမှုဆောင်အဖွဲဝင်( ၂ )ဦး၊ အရံဗဟို အလုပ်အမှုဆောင် ( ၄ ) ဦး၊ ဗဟိုကော်မတီဝင် ( ၃၆ ) ဦး၊ အရန်ဗဟိုကော်မတီဝင် ( ၁၀ ) ဦး၊ တိုင်းဒေသကြီးနှင့် ပြည်နယ်အလုပ်အမှုဆောင် ( ၂၅) ဦး၊ ဗဟိုရေးရာကော်မတီများမှ ( ၁၄ ) ဦး စုစုပေါင်း ( ၉၂ ) ဦး တက်ရောက်ခဲ့ဟု အသိပေးသည်။
ဗဟိုအလုပ်ကော်မတီအပါအဝင် တိုင်းဒေသကြီးနှင့် ပြည်နယ်အသီးသီးတိုမှ ဗဟိုကော်မတီဝင်များ၊ ဗဟိုရေးရာကော်မတီများမှ လုပ်ငန်းဆောင်ရွက်မှုအစီရင်ခံစာများ၊ အကြံပြု စာတမ်းများ တင်ပြဆွေးနွေးခဲ့ဟုလည်း ထုတ်ပြန်သည်။
စစ်ကောင်စီ ကြိုးပမ်းနေသည့် ရွေးကောက်ပွဲကို တိုင်းရင်းသားတော်လှန်ရေးတပ်ဖွဲ့များ၊ နွေဦးတော်လှန်ရေးအင်အားစုများက လက်မခံကြောင်း ပြောကြားထားပြီး အမျိုးသားညီညွတ်ရေးအစိုးရ(NUG)ကလည်း စစ်ကောင်စီသည် တရားမဝင် အတုအယောင် ရွေးကောက်ပွဲကို ဟန်ပြပြုလုပ်ကာ အာဏာတည်မြဲရေး၊ ပြည်သူအပေါ် ကျူးလွန်ခဲ့သည့်စစ်ရာဇဝတ်မှုများ မှ ပြစ်ဒဏ် ကင်းလွတ်ခွင့်ရရေး ကြိုးပမ်းနေခြင်းဖြစ်ကြောင်း သဘောထား ဖော်ပြထားသည်။
အဆိုပါ စစ်ကောင်စီ၏ ထောင်ချောက်ကိုဆန့်ကျင်ကျော်လွှားကြရန် NUG ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ဩဂုတ် ၂၀ရက်တွင် ပြည်သူလူထုနှင့်နိုင်ငံတကာသို့ သတင်းစကား ပြောကြားခဲ့ပြီး စစ်ကောင်စီ၏ လုပ်ရပ်တွင် ပူးပေါင်းပါဝင်သူ အားပေးထောက်ခံသူများ သတိချပ်ကြရန် သတိပေးထားသည်။
