မြောက်ကိုရီးယား ဒုံးကျည်အသစ်တွေ စမ်းသပ်မှုကို ကင်မ်ဂျုံအွန်းကိုယ်တိုင် ကွပ်ကဲ

မြောက်ကိုရီးယားခေါင်းဆောင် ကင်မ်ဂျုံအွန်းဟာ နိုင်ငံရဲ့ လေကြောင်း ကာကွယ်ရေး ဒုံးကျည်နှစ်စင်း စမ်းသပ်ပစ်ခတ်မှုကို ကိုယ်တိုင် ကြီးမှူး ကွပ်ကဲခဲ့တယ်လို့ သိရပါတယ်။

အစိုးရပိုင် KCNA သတင်းဌာနက အဲဒီ ဒုံးကျည်တွေမှာ တပ်ဆင်ထားတဲ့ ထိပ်ဖူးတွေဟာ သာလွန်ကောင်းမွန်တဲ့ တိုက်ခိုက်ရေး စွမ်းရည်မျိုး ပိုင်ဆိုင်ပြီး ထူးကဲဆန်းသစ်တဲ့ နည်းပညာမျိုးကို အသုံးပြု တည်ဆောက်ထားတယ်လို့ ဖော်ပြခဲ့ပါတယ်။ ဒါပေမဲ့ ဒုံးကျည်တွေနဲ့ ပတ်သက်တဲ့ အသေးစိတ် အချက်အလက်တွေကိုတော့ KCNAက မထုတ်ပြန်ခဲ့ပါဘူး။

စမ်းသပ်မှုတွေကိုတော့ ဩဂုတ် ၂၃ ရက်နေ့က ပြုလုပ်ခဲ့တာပါ။ ဒရုန်းတွေ၊ ခရုစ်ဒုံးကျည်တွေ အပါအဝင် အမျိုးမျိုးသော ဝေဟင် ပစ်မှတ်တွေကို ဖျက်ဆီးနိုင်အောင် ရည်ရွယ် တည်ဆောက်ထားတဲ့ အဲဒီ ဒုံးကျည်တွေဟာ မျှော်လင့်ထားတဲ့ စွမ်းရည်မျိုး အမှန်တကယ် ပိုင်ဆိုင်တယ်ဆိုတာ သက်သေပြနိုင်ခဲ့တယ်လို့လည်း KCNAက ဆိုပါတယ်။ ပြီးတော့ ကင်မ်က စမ်းသပ်မှု ရလဒ်တွေကိုလည်း အထူး ကျေနပ် နှစ်သက်နေတယ်လို့ သိရပါတယ်။

မြောက်ကိုရီးယား စစ်သားတချို့က နယ်စပ်ကို ခဏတာ ဖြတ်ကျော် ဝင်ရောက်မိခဲ့တဲ့နောက် တောင်ကိုရီးယား စစ်တပ်က ခြောက်လှန့် သတိပေး ပစ်ခတ်ခဲ့တဲ့ ဖြစ်စဉ်အပြီး နာရီပိုင်းအကြာမှာ မြောက်ကိုရီးယားက ဒုံးကျည်တွေ စမ်းသပ်ခဲ့တာ ဖြစ်ပါတယ်။ ကိုရီးယား နှစ်နိုင်ငံနယ်စပ် အခြေအနေကို ကူညီ စောင့်ကြည့်နေတဲ့ ကုလသမဂ္ဂ လက်အောက်ခံ တပ်ဖွဲ့တွေက မြောက်ကိုရီးယားစစ်သား ၃၀ ဝန်းကျင်ဟာ အစောင့်အကြပ် ထူထူထပ်ထပ် ချထားရာ နယ်စပ်နားမှာ တောင်ကိုရီးယားဖက်ကို နယ်ကျွံ ဝင်ရောက်မိခဲ့တာ ဖြစ်တယ်လို့ ပြောပါတယ်။

Public Service Announcement

မြောက်ကိုရီးယားကတော့ တောင်ကိုရီးယားဖက်က ခြောက်လှန့် ပစ်ခတ်မှုဆိုတာ ရည်ရွယ်ချက်ရှိရှိ ရန်စတဲ့ လုပ်ရပ်လို့ စွပ်စွဲခဲ့ပါတယ်။

တောင်ကိုရီးယား သမ္မတသစ် လီဂျေမြောင်ဟာ မြောက်ပိုင်း ပြိုင်ဘက်နဲ့ ဆက်ဆံရေး ပျက်စီးနေတာကို ပြန်လည် ကုစားပြင်ဆင်လိုကြောင်း အတိအလင်း ပြောဆိုထားပါတယ်။ သူဟာ သမ္မတဖြစ်လာပြီးနောက်ပိုင်း ပထမဆုံး အကြိမ်အဖြစ် လာမယ့် သီတင်းပတ်မှာ အမေရိကန် သမ္မတ ဒေါ်နယ်လ်ထရမ့်နဲ့လည်း တွေ့ဆုံ ဆွေးနွေးသွားမယ်လို့ သိရပါတယ်။

ကိုးကား: BBC