အောက်တိုဘာ-၂၉၊ ၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU)ညောင်လေးပင်ခရိုင်နဲ့ မြိတ်-ထားဝယ်ခရိုင်က ကျေးရွာတွေက ပြည်သူတွေရဲ့နေအိမ်တွေကို အာဏာသိမ်းစစ်ကောင်စီတပ်က အကြောင်းမဲ့ မီးရှို့ဖျက်ဆီးခဲ့ကြောင်း KNU ဗဟိုက သတင်းထုတ်ပြန်ပါတယ်။
စစ်ကောင်စီတပ်ဟာကရင်အမျိုးသားလွတ်မြောက်ရေးတပ်မတော် (KNLA) တပ်မဟာ(၃)နယ်မြေ ညောင်လေးပင်ခရိုင် မုန်း(မူး)မြို့နယ် ကွင်းဒလကြီးရွာက နေအိမ် ၇၀ ကျော်နဲ့ KNLA တပ်မဟာ(၄) မြိတ်-ထားဝယ်ခရိုင် သရက်ချောင်းမြို့နယ် လဘရွာက နေအိမ် ၄၀ ကျော်ကို မီးရှို့ခဲ့တာလို့ အောက်တိုဘာ ၂၈ရက် ညပိုင်းမှာ အသိပေးထားတာပါ။
အောက်တိုဘာ၂၅ရက်က သရက်ချောင်းမြို့နယ် ကို စစ်ကောင်စီရဲ့ တပ်ရင်း(၄၀၃)၊ (၄၀၄)၊ (၄၀၅) ပူးပေါင်းစစ်ကြောင်းထိုးကာ တိုက်ပွဲနဲ့မသက်ဆိုင်တဲ့ လဘကျေးရွာက ဒေသခံတွေရဲ့နေအိမ်(၄၂)လုံးအား မီးရှို့ဖျက်ဆီးခဲ့တာဖြစ်တယ်လို့ ဖော်ပြထားပါတယ်။
Public Service Announcement
စစ်ကောင်စီတပ်ဟာ KNU တပ်မဟာ(၄)နယ်မြေကို စစ်ကြောင်းထိုးမှုများ လုပ်ဆောင်လျက်ရှိရာ တနင်္သာရီတိုင်း သိန်ခွန်း၊ ပုလောမြို့နယ်၊ သရက်ချောင်းမြို့နယ်၊ ထားဝယ်မြို့နယ်တွေမှာ စစ်ကြောင်းထိုးနေတာလို့ KNLA သတင်းရင်းမြစ်က ပြောပါတယ်။
” သရက်ချောင်းကနေ အောက်ဘက်ကို စစ်ကြောင်းတကြောင်းထိုးတာရှိတယ်။ အဲဒါ အိမ်တွေမီးရှို့တာ ရှိတယ်”လို့ KNLAသတင်းရင်းမြစ်က လဘရွာကို စစ်ကောင်စီတပ် မီးရှို့ခဲ့မှု ဖြစ်စဉ်ကို ပြောပါတယ်။
အောက်တိုဘာ ၁၀ရက်ကလည်း မုန်းမြို့နယ်က ကွင်းဒလကြီးကျေးရွာကို စစ်ကောင်စီတပ်စစ်ကြောင်းထိုးပြီးပြည်သူလူထုပိုင် နေအိမ် (၇၂)လုံး ကိုမီးရှို့ဖျက်ဆီးခဲ့တယ်လို့ KNU ဗဟိုက အသိပေးပါတယ်။
စစ်ကောင်စီတပ်ဟာသူတို့ထိန်းချုပ်ရာဒေသတွေမှာအတုအယောင်ရွေးကောက်ပွဲ ပြုလုပ်နိုင်ရေး ငြိမ်းချမ်းနေသယောင် ပြုမူနေပေမယ့် KNU ထိန်းချုပ်မှုနယ်မြေတွေနဲ့ တော်လှန်ရေးတပ်ဖွဲ့တွေထိန်းချုပ်ရာ ဒေသတွေမှာ နေထိုင်တဲ့ အရပ်သားပြည်သူတွေကို ပစ်မှတ်ထားပြီး လေကြောင်းတိုက်ခိုက်မှုတွေနဲ့ လက်နက်ကြီးပစ်ခတ်တိုက်ခိုက် မှုတွေ အဆက်မပြတ် ကျူးလွန်နေကြောင်း KNUက ထုတ်ပြန်ပါတယ်။
