နိုဝင်ဘာ-၂၂၊ ၂၀၂၅။ ပုရစ်/People’s Spring
ရန်ကုန်တိုင်းပကဖ တိုက်ခိုက်ရေးတပ်ဖွဲ့ဟာ စစ်ဆင်ရေးလိုအပ်ချက်အရ အထူးတိုင်းစစ်ဌာနရဲ့ ကွပ်ကဲမှုအောက်ရှိ Rangoon Warriors PDF တပ်ရင်းအဖြစ် ပြောင်းလဲဖွဲ့စည်းကြောင်း အဆိုပါတပ်ရင်းက နိုဝင်ဘာ ၂၀ရက်မှာ ကြေညာပါတယ်။
ရန်ကုန်တိုင်း ပြည်သူ့ကာကွယ်ရေးတပ်ဖွဲ့(၁)ကနေ အထူးတိုင်းစစ်ဌာန ကွပ်ကဲမှုအောက် PDF တပ်ရင်းအဖြစ် ပြောင်းလဲဖွဲ့စည်းခဲ့တဲ့ Rangoon Warriors PDF တပ်ရင်းက တပ်ရင်းမဖြစ်တည်လာမီ စစ်ရေးလှုပ်ရှားမှု မှတ်တမ်းတွေကို ဒီကနေ့ နိုဝင်ဘာ ၂၂ရက်မှာ ထုတ်ပြန်အသိပေးခဲ့ရာ မြို့ပြစစ်ဆင်ရေးတွေအပါအဝင် စစ်ကောင်စီ တပ်ရင်းဌာနချုပ်နဲ့ တပ်စခန်းတွေ သိမ်းပိုက်ခဲ့ရာမှာ ပါဝင်ခဲ့ကြောင်း ထုတ်ပြန်ပါတယ်။
၂၀၂၄ ဖေဖော်ဝါရီ ၅ရက်ကစတင်၍ ရန်ကုန်တိုင်း ပကဖရဲ့ တိုက်ခိုက်ရေးတပ်ဖွဲ့အဖြစ် ရန်ကုန်တိုင်း ပြည်သူ့ကာကွယ်ရေးတပ်ဖွဲ့ (၁)ကို ဖွဲ့စည်းပြီး ပကဖလုပ်ငန်းစဥ်တွေနဲ့ စစ်ဆင်ရေးတာဝန်တွေကို ထမ်းဆောင်ခဲ့တဲ့ အဖွဲ့ဖြစ်ပါတယ်။
Public Service Announcement
Rangoon Warriors တပ်ရင်း မဖြစ်တည်လာမီ စစ်ရေးလှုပ်ရှားမှု မှတ်တမ်းအချို့ကို နိုဝင်ဘာ ၂၁ရက်မှာ အသိပေးဖော်ပြထားရာ မြို့ပြပြောက်ကျား UG ရဲဘော်များအဖြစ် မြို့နယ်အလိုက်လှုပ်ရှားခဲ့စဥ်က ထင်ရှားသည့် စစ်ဆင်ရေးတွေကို အသိပေးခဲ့ပါတယ်။
မြို့ပြပြောက်ကျား စစ်ဆင်စစ်ရေးတွေက ၂၀၂၃ ဧပြီက ခရမ်းမြို့ နယ်ကလ၀ကရုံး တိုက်ခိုက်မှု၊ သစ်တောဂိတ်နဲ့ ကရင်ကန်ဂိတ် တိုက်ခိုက်မှု၊ ၂၀၂၃ ဇန်နဝါရီက သုံးခွမြို့နယ် ကတုံးပေါ်ရဲစခန်းဝင်ရောက်စီးနင်းမှု၊ ၂၀၂၂ ဧပြီက ခရမ်းမြို့နယ် ဇွဲတွန် ဂိတ်တိုက်ခိုက်မှု၊ ၂၀၂၂ စက်တင်ဘာက ကတုံးပေါ် ရဲစခန်းအား ပစ်ခတ်တိုက်ခိုက်မှု၊ ၂၀၂၂ မတ်လမှာ ခရမ်းမြို့ စစ်ကောင်စီ အရာရှိတဦး နေအိမ် ဗုံးခွဲတိုက်ခိုက်မှု၊နဲ့ ခရမ်းမြို့ သစ်တောဂိတ်၊ လျှပ်စစ်ရုံး၊ ရဲစခန်းအား ပစ်ခတ်တိုက်ခိုက်မင၊ ၂၀၂၂ ဖေဖော်ဝါရီက သုံးခွရဲစခန်းအား တိုက်ခိုက်မှုစတဲ့ စစ်ဆင်ရေးတွေဖြစ်ပါတယ်။
ထို့နောက် ရန်ကုန်တိုင်း ပြည်သူ့ကာကွယ်ရေးတပ်ဖွဲ့ (၁) အနေနဲ့ စုစည်းပြီးနောက်မှာလည်း တိုင်းရင်းသားလက်နက်ကိုင်တပ်ဖွဲ့တွေနဲ့ ပူးပေါင်းပြီး စစ်ကောင်စီကို တိုက်ခိုက်မှုတွေ လုပ်ဆောင်ခဲ့ပါတယ်။ တိုင်းရင်းသားအဖွဲ့တွေနဲ့ ပူးပေါင်းပြီး စစ်ကောင်စီ စစ်ဆေးရေးဂိတ်တွေ၊ တိုက်ခိုက်တာ၊ စစ်ကောင်စီယာဉ်တန်းတွေ တိုက်ခိုက်တာတွေ လုပ်ဆောင်ခဲ့ပါတယ်။
၂၀၂၄ ဧပြီက စစ်တောင်းတံတား စစ်ဆေးရေးဂိတ်နဲ့ စစ်ကောင်စီတပ်စွဲရာကို ဒရုန်းနဲ့ တိုက်ခိုက်ခဲ့သလို မေလမှာ မုပ္ပလင်စစ်ဆေးရေးဂိတ်ကို ဒရုန်းနဲ့ တိုက်ခိုက်ခဲ့ပါတယ်။ ဇွန်လမှာလည်း အထက်အင်္ဂဘို လက်ပံပင်စစ်ဆေးရေးဂိတ်ကို တိုက်ခိုက်ခဲ့ပြီး အဲဒီလမှာ ပဲခူးတိုင်းအစပ် သပြေကန်စစ်ဆေးရေးဂိတ်နဲ့ မုပ္ပလင်စစ်ဆေးရေးဂိတ်အနီး စကစတပ်စွဲရာနေရာအား ဒရုန်းနဲ့ တိုက်ခိုက်ခဲ့ကြောင်း အသိပေးပါတယ်။
၂၀၂၄ ဇူလိုင်မှာ တိုင်းရင်းသားလက်နက်ကိုင်တပ်တွေနဲ့ ပူးပေါင်းပြီး KNU တပ်မဟာ(၁)နယ်မြေ ကျိုက်ထိုမြို့နယ်အတွင်း စစ်ကြောင်းထိုးလာတဲ့ စစ်တပ်စစ်ကြောင်းကို စောင့်ကြိုတိုက်ခိုက်တာ၊ ကျိုက်ထိုမြို့နယ် ဝါးပိုးချောင်းရွာမှာ တပ်စွဲထားတဲ့ စစ်ကောင်စီတပ်ကို ဒရုန်းနဲ့ တိုက်ခိုက်တာတွေ လုပ်ဆောင်ခဲ့တယ်လို့ ဆိုပါတယ်။
၂၀၂၄ ဇူလိုင်မှာပဲ ကျိုက်ထိုမြို့နယ်၊သိမ်ဇရပ်မြို့အနီး ကျောက်တန်းလေးကျေးရွာ စစ်ကြောင်းထိုးလာတဲ့ စစ်ကောင်စီစစ်ကြောင်းကို တိုက်ခိုက်ခဲ့ရာ စစ်ကောင်စီတပ်အထိနာခဲ့သလို ရန်ကုန်တိုင်း ပကဖ တပ်ဖွဲ့ ၁ဘက်က ရဲဘော် သာဒင်၊ရဲဘော် လရောင်၊ရဲဘော် မီးတောက်တို့ ကျဆုံးခဲ့ရတယ်လို့ အသိပေးပါတယ်။
၂၀၂၄ နိုဝင်ဘာမှာ ကျိုက်ထိုမြို့နယ်အတွင်းသို့ စစ်ကြောင်းထိုးလာသော အင်အား၂၀၀ပါ စစ်ကောင်စီ စစ်ကြောင်းကိုလည်း တိုက်ခိုက်ခဲ့ရာ စစ်ကောင်စီတပ်ဘက်က အထိနာခဲ့တယ်လို့ ဆိုပါတယ်။
၂၀၂၅ မေလ မှာတော့ ပဲခူးတိုင်း ရွှေကျင်မြို့နယ် ညောင်ခြေထောက်ရွာ အခြေစိုက် စစ်ကောင်စီရဲ့ ခမရ(၅၉၈) တပ်ရင်းဌာနချုပ် သိမ်းပိုက်မှုမှာလည်း ပူးပေါင်းပါဝင်ခဲ့ကြောင်း Rangoon Warriors PDF က တပ်ရင်းမဖွဲ့စည်းမီ ပါဝင်ခဲ့တဲ့ တိုက်ပွဲတွေအကြောင်း ပြောပြပါတယ်။
Rangoon Warriors PDF က တပ်ရင်းအဖြစ် ပြောင်းလဲတာဝန်ထမ်းဆောင်ဖို့ စိစစ်ဆဲဖြစ်ပေမယ့် အထူးတိုင်းစစ်ဌာနရဲ့ ကွပ်ကဲမှုနဲ့ တာဝန်တွေ ထမ်းဆောင်နေကြောင်း အသိပေးထုတ်ပြန်ထားပါတယ်။
