ဗိုလ်အောင်ကျော်နေ့(ခ)ကျောင်းသားနေ့ (၈၇)နှစ်ပြည့်အထိမ်းအမှတ် စစ်ကိုင်းတိုင်းမှာ ဆန္ဒပြ

ဒီဇင်ဘာ-၂၀၊၂၀၂၅။ သုည/People’s Spring

စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေဟာ ဗိုလ်အောင်ကျော်နေ့ (ခ) ကျောင်းသားနေ့ (၈၇)နှစ်ပြည့် အထိမ်းအမှတ်အဖြစ် စစ်အာဏာရှင်ဆန့်ကျင်ရေးဆန္ဒပြသပိတ်လှုပ်ရှားမှုတွေကို ဒီကနေ့ (ဒီဇင်ဘာ ၂၀) မှာ ပြုလုပ်ခဲ့ပါတယ်။

စစ်ကိုင်းတိုင်း ဘုတလင်မြို့နယ်မှာ ကျောင်းသားများသမဂ္ဂ[ဗ.က.သများအဖွဲ့ချုပ်]က မဟာမိတ်အဖွဲ့အစည်းဖြစ်သော ဒေါင်းရာဇာပင်မသပိတ်စစ်ကြောင်းနဲ့အတူ အခြေခံပညာကျောင်းသားသမဂ္ဂရဲဘော်တွေက ဗိုလ်အောင်ကျော်ကျဆုံးခြင်း (၈၇)နှစ်ပြည့်အထိမ်းအမှတ်အဖြစ် ဘုတလင်မြို့နယ်အတွင်းရှိ လမ်းပိုင်းတနေရာမှာ ဆန္ဒပြပွဲကျင်းပခဲ့ပါတယ်။

ဝက်လက်မြို့နယ်မှာလည်း ကျောင်းသားများသမဂ္ဂ – ဗကသများအဖွဲ့ချုပ် အမှတ် (၁) နယ်မြေ မြို့နယ် ယာယီရုံးမှာ ဗမာနိုင်ငံကျောင်းသားနေ့ (ခ) ဗိုလ်အောင်ကျော်နေ့ အထိမ်းအမှတ် ကဗျာရွတ်ဆိုပွဲ တရပ်ကို ပြုလုပ်ခဲ့ပါတယ်။

Public Service Announcement

ယင်းအခမ်းအနားမှ အစီအစဉ် (၆)ရပ် ပြုလုပ်ခဲ့ပြီး တိုက်ပွဲဝင်ဗကသအလံတော်အလေးပြုခြင်း ၊ ဗကသများအဖွဲ့ချုပ် ဒု-ဥက္ကဌ တက်ရောက်မိန့်ခွန်းပြောကြားခဲ့ပြီး ကျောင်းသားရဲဘော်တွေက ကျောင်းသားခေါင်းဆောင် ဗိုလ်အောင်ကျော်ကို ဂုဏ်ပြုသောအားဖြင့် ကဗျာရွတ်ဆိုခြင်းကိုလည်း ပြုလုပ်ခဲ့ပါတယ်။

ယင်းမာပင်မြို့နယ်မှာလည်း အောင်လံလွှင့်မည် ရွှေရေကြည်သပိတ်စစ်ကြောင်းက ဦးဆောင်ကာ ညနေခင်းသပိတ်အဖြစ် “သင့်မဲဖြင့်တရားဝင်လူသတ်ခွင့်မပေးနဲ့” စာသားကိုင်ဆောင်ကာ စစ်ကောင်စီ ကျင်းပမယ့် ရွေးကောက်ပွဲကို ဆန့်ကျင်ကြဖို့ လှုံ့ဆော်ဆန္ဒပြခဲ့ပါတယ်။