'/%3E%3C/svg%3E){kind=small}
မတ်-၂၂၊ ၂၀၂၆။ဒလပန်း/People’s Spring
ပဲခူးတိုင်း အနောက်ခြမ်း၊ ကြို့ပင်ကောက်မြို့နယ် အမျိုးသားဒီမိုကရေစီအဖွဲ့ချုပ်(NLD )မြို့နယ် အမျိုးသမီးလုပ်ငန်းကော်မတီဥက္ကဌ ဒေါ်တင်တင်နု သတ်ဖြတ်ခံခဲ့ရတယ်လို့ ဒေသခံတွေကပြောပါတယ်။
အသက် ၅၄ နှစ် အရွယ် ဒေါ်တင်တင်နုဟာ မတ်လ ၂၂ ရက် နေ့လည် ၁၂ နာရီအချိန်မှာ သဲကုန်းရပ်ကွက်ကနေအိမ်မှာ အမည်မသိလက်နက်ကိုင်တစ်ဦးက သေနတ်နဲ့ပစ်ခတ်သွားတာလို့သိရပါတယ်။
“၁၀ နှစ်ကျော်သမီးလေးနဲ့သူနဲ့က သူတို့နေအိမ်မှာ ကလေးမလေးက အရှေ့မှာ ခုံတန်းလျားလေးမှာ ထိုင်နေတဲ့အချိန် သေဆုံးသူ အမျိုးသမီးက ဟင်းချက်နေတာ အဲ့အချိန်မှာ လူတစ်ယောက်ဝင်လာပြီးတော့သေနတ်နဲ့ ငါးချက်ပစ်သွားတယ်။ ပွဲချင်း ပြီးဆုံးသွားတယ်”လို့ဒေသခံတဦးကပြောပါတယ်။
Public Service Announcement
ဘယ်သူ ဘယ်အဖွဲ့အစည်းက ပစ်ခတ်သွားတယ်ဆိုတာကို မသိရှိရသေးဘူးလို့ ဒေသခံတွေကဆိုပါတယ်။ဒေသခံအချို့ကတော့စစ်တပ်လက်အောက်ခံပျူစေထီး ကသတ်တာလို့ပြောပါတယ်။
ပြီးခဲ့တဲ့နှစ် ဇူလိုင်လပိုင်းမှာ ပထမအကြိမ်် လုပ်ကြံခဲ့ရဖူးတယ်လို့ ဒေသခံတွေရဲ့ပြောပြချက်အရသိပါတယ်။
သေဆုံးသွားတဲ့ဒေါ်တင်တင်နုဟာကြို့ပင်ကောက်မြို့နယ် အမျိုးသားဒီမိုကရေစီအဖွဲ့ချုပ်ရဲ့ ပါတီဒုတိယဥက္ကဌလည်းဖြစ် ၂၀၂၀ ရွေးကောက်ပွဲမှာ အနိုင်ရရှိထားတဲ့ ကြို့ပင်ကောက်မြို့နယ် တိုင်းဒေသကြီး အမှတ် ၂ လွှတ်တော်ကိုယ်စားလှယ်ဦးတင်ထွဋ်(လက်ရှိတိမ်းရှောင်နေရ)ရဲ့ ဇနီးလည်းဖြစ်ပါတယ်။
“အရင်တခါ ၁၇.၇.၂၀၂၅ တုန်းက တကြိမ်လုပ်ကြံခံရသေးပါတယ်။ နောက်ရက်တွေမှာတနေရာကိုပြောင်းရွေ့ထားခဲ့ပါတယ်။ ကျွန်တော်လဲ မနေတော့ဖို့အတန်တန်ပြောပြီး ခုလကုန်လောက်မှပြောင်းရွေ့ဘို့စီစဥ်နေဆဲမှာလုပ်ကြံခံခဲ့ရတာပါ”လို့ ဒေါ်တင်တင်နုရဲ့ မိတ်ဆွေတဦးကပြောပါတယ်။
စစ်အုပ်စုရဲ့ ဥပဒေမဲ့ကျူးလွန်မှုတွေကြောင့် သေဆုံးခဲ့ကြရတဲ့ ပြည်သူပေါင်း ၅၈၆၂ ဦးမှာ NLD အဖွဲ့ချုပ်ရဲ့ လွှတ်တော်ကိုယ်စားလှယ် ၈ ဦး၊ ပါတီဝင် ၁၁၄ စုစုပေါင်း ၁၂၂ ဦး ပါဝင်တယ်လို့ အမျိုးသားဒီမိုကရေစီအဖွဲ့ချုပ် NLD က ပြီးခဲ့တဲ့နှစ် စက်တင်ဘာလမှာထုတ်ပြန်ထားပါတယ်။
