'/%3E%3C/svg%3E){kind=small}
မေ ၄၊ ၂၀၂၆။ ထားမြတ်/People’s Spring
စစ်အုပ်စုကအာဏာတည်မြဲဖို့ နိုင်ငံရေးအကျဉ်းသားတွေကို အယောင်ပြလွှတ်ပေးတာ၊ အတုအယောင်ရွေးကောက်ပွဲတွေလုပ်ပြီး အစိုးရဖွဲ့တာစတဲ့ ကမ္ဘာကိုလိမ်ညာဖို့ ကြိုးစားနေနေပြီး အဲဒီအပေါ်ယံ ဟန်ပြလုပ်ရပ်တွေရဲ့နောက်ကွယ်မှာ ပြည်သူ့သွေးနဲ့ လမ်းခင်းထားတာဖြစ်ကြောင်း အမျိုးသားညီညွတ်ရေးအစိုးရ(NUG) လူ့အခွင့်အရေးဆိုင်ရာဝန်ကြီးဌာနက ထုတ်ပြန်ပါတယ်။
စစ်တပ်အာဏာသိမ်းပြီးချိန်မှာ ပြီးခဲ့တဲ့ ဧပြီ ၃၀ရက်အထိ စစ်အုပ်စုရဲ့ ပြည်သူအပေါ် လေကြောင်း တိုက်ခိုက်တာ အပါအဝင် ရာဇဝတ်မှု ကျူးလွန်မှု အခြေအနေကို အသိပေးရာမှာ အခုလို ဖော်ပြထားတာပါ။
စစ်အုပ်စုဟာ ရွေးကောက်ခံ အစိုးရ၊ ပြည်သူရွေးတဲ့ အစိုးရအသစ်ဆိုပြီး ဟန်ပြနေပေမယ့် တဖက်မှာ ပြည်သူတွေအပေါ် လေကြောင်းကနေ အကြိမ်ပေါင်း ၅၃၉၅ကြိမ် ဗုံးကြဲခဲ့ကြောင်း ထုတ်ပြန်ပါတယ်။
Public Service Announcement
အဲဒီလိုတိုက်ခိုက်မှုတွေကြောင့် ကလေးငယ် ၇၄၀အပါအဝင် လူပေါင်း ၅,၆၃၃ ဦး သေဆုံးခဲ့ရဟု ဖော်ပြထားပါတယ်။ဒါ့အပြင် စာသင်ကျောင်းနဲ့ ဆေးရုံပေါင်း ၁,၃၉၂ ခုကိုလည်းစစ်အုပ်စုက ရည်ရွယ်ချက်ရှိရှိ ဖျက်ဆီးခဲ့တာကိုတွေ့ရတယ်လို့ အသိပေးထားပါတယ်။
ဒါ့အပြင် အစုလိုက်၊ အပြုံလိုက် သတ်ဖြတ်မှုပေါင်း ၅၃၉ မှုမှာ အမျိုးသမီးနဲ့ ကလေးငယ်တွေပါမချန် သတ်ဖြတ်နေတာ တွေ့ရပြီး စစ်အုပ်စုဟာ ပြည်သူအားလုံးကို ရန်သူလို့ သတ်မှတ်ထားတာ ထင်ရှားနေကြောင်းဖော်ပြထားပါတယ်။
တနိုင်ငံလုံးမှာ လူ့အခွင့်အရေး ချိုးဖောက်မှုပေါင်း ၂၅,၀၀၀ကျော် ရှိနေတာကို မှတ်တမ်းကောက်ယူနိုင်ခဲ့ပြီး စစ်ကိုင်းဒေသကတော့ အခုထိ အဆိုးရွားဆုံး ခံစားနေရဆဲဖြစ်တယ်လို့ အသိပေးပါတယ်။
၅ နှစ်တာ ကာလအတွင်း စစ်အုပ်စုရဲ့ ရက်စက်မှုတွေက ပိုတိုးလာနေကြောင်း ဖော်ပြထားပြီး လူ့အခွင့်အရေးဆိုင်ရာဝန်ကြီးဌာနအနေနဲ့လည်း ပြည်သူတွေ တရားမျှတမှု ရဖို့အတွက် စစ်အုပ်စုရဲ့ ကျူးလွန်မှုတွေကို အပြစ်ပေးအရေးယူနိုင်ရေး အစွမ်းကုန် တာဝန်ယူသွားမယ်လို့ ထုတ်ပြန်ထားပါတယ်။
လူ့အခွင့်အရေးဆိုင်ရာဝန်ကြီးဌာနရဲ့ မေလ ၃ရက်မှာ ထုတ်ပြန်တဲ့ ဝန်ကြီးဌာန ဖွဲ့စည်းမှု ၅နှစ်မြောက် နှစ်ပတ်လည်အစီရင်ခံစာမှာ ပြည်သူတွေရဲ့ မျက်ရည်နဲ့ မျှော်လင့်ချက်တွေကို တရားမျှတမှုအဖြစ် ပြောင်းလဲနိုင်ဖို့ အားသွန်ခွန်စိုက် ကြိုးပမ်းခဲ့ကြောင်း အသိပေးထားပါတယ်။
စစ်အုပ်စုရဲ့ ရက်စက်တဲ့ ကျူးလွန်မှုပေါင်း နှစ်သောင်းခွဲကျော်ထဲက အဆိုးရွားဆုံးဖြစ်စဉ် ၅၅၀ ကျော်ကို မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှု ယန္တရား (IIMM)ဆီ ပေးပို့တာ၊ အာဂျင်တီးနားနဲ့ ဂျာမနီအပါအဝင် နိုင်ငံ (၆) နိုင်ငံမှာ နိုင်ငံတကာဥပဒေနဲ့ တရားစွဲနိုင်ဖို့ လုပ်ဆောင်တာ စတဲ့ တာဝန်ခံမှုဖော်ဆောင်ရေးတွေကို အရှိန်အဟုန်နဲ့ လုပ်ဆောင်နိုင်ခဲ့ကြောင်း NUG လူ့အခွင့်အရေး ဝန်ကြီးဌာနက ထုတ်ပြန်ပါတယ်။
