နေပြည်တော်မှာကျောက်မျက်ပြပွဲ ကျင်းပဖို့စစ်ကောင်စီ စီစဉ်

လာမယ့် ဒီဇင်ဘာလ ၁၇ ရက်ကစတင်ပြီး နေပြည်တော်မှာကျောက်မျက်ပြပွဲတစ်ခုကို ကျင်းပဖို့ ရှိတယ်လို့ စစ်ကောင်စီက ကြေညာထားပါတယ်။

အဲဒီပြပွဲကို ဒီဇင်ဘာလ ၁၇ရက်စတင်ပြီး ဒီဇင်ဘာလ ၂၂ ရက်အထိ နေပြည်တော် မဏိရတနာခန်းမမှာ ကျင်းပဖို့ စစ်ကောင်စီက စီစဉ်ထားတာပါ။

ပုံမှန်အားဖြင့်ပြည်တွင်းမှာကျောက်မျက်ပြပွဲတွေကို ကျင်းပတဲ့အခါ နိုင်ငံခြားဝင်ငွေရအောင် ယူရိုငွေနဲ့ ရောင်းချတဲ့ပြပွဲတွေရှိသလို ပြည်တွင်းလုပ်ငန်းရှင်တွေအတွက် ကျပ်ငွေနဲ့ရောင်းချပေးတာရှိပါတယ်။

ဒါပေမယ့် ဒီတခေါက်ပြပွဲအတွက် စစ်ကောင်စီရဲ့ ကြေညာချက်မှာ ဘယ်ငွေကြေးနဲ့ရောင်းချမယ့် ဆိုတာကို ထည့်သွင်းဖော်ပြထားတာမတွေ့ရပါဘူး။

Public Service Announcement

ဒါအပြင် ပွဲတက်ရောက်မယ့်သူတွေကို ကိုဗစ်ကာကွယ်ဆေး ၂ကြိမ် ထိုးပြီးတဲ့အပြင် ကိုဗစ်စစ်ဆေးပြီးသူတွေကိုသာအကန့်အသတ်နဲ့ခွင့်ပြုမှာလို့ သိထားရပါတယ်။

စစ်ကောင်စီဟာ အရပ်သားအစိုးရကိုဖြုတ်ချအာဏာသိမ်းပြီးနောက် အုပ်ချုပ်ရေးယန္တယားပုံမှန်လည်ပတ်နေတာ ပြသချင်တာကြောင့် ပြီးခဲ့တဲ့ ဧပြီလအတွင်းက ကျောက်မျက်ပြပွဲတစ်ခု နေပြည်တော်မှာလုပ်ခဲ့ပါသေးတယ်။

အဲဒီပြပွဲမှာရောင်းချရတဲ့ပမာဏကို ထုတ်ပြန်တာမတွေ့ရပါဘူး။

CRPH ကတော့ စစ်ကောင်စီ ကျင်းပခဲ့တဲ့ဧပြီလ ပြပွဲဟာ တရားမဝင်ကြောင်းနဲ့ပူးပေါင်းပါဝင်သူတွေကို အမည်ပျက်စာရင်းသွင်းမယ်လို့အဲဒီတုန်းကကြေညာခဲ့ဖူးပါတယ်။