ဆောမြို့ဝင်ရောက်လာတဲ့ စစ်တပ်က ဒေသခံ ၂၀ကျော် ဖမ်းဆီး

မေ ၁၅၊ ၂၀၂၆။ ထားမြတ်/People’s Spring

မကွေးတိုင်း၊ ဆောမြို့ကို ဝင်ရောက်လာတဲ့ စစ်တပ်စစ်ကြောင်းက ဒေသခံ လူငယ်နဲ့ လူလတ်ပိုင်း ၂၀ ကျော်ကို မေလ ၁၄ရက်မှာ ဖမ်းဆီးခဲ့ကြောင်း ဒေသခံက ပြောပါတယ်။

လောင်းရှည်မြို့နယ်အခြေစိုက် ကပစ(၂၅)ကထွက်လာတဲ့ အင်အား ၃၅၀ ခန့်ပါ စစ်ကြောင်းဟာ မနေ့က မေလ ၁၄ရက်မှာ ဆောမြို့ကို ဝင်ရောက်ခဲ့ပြိးနောက် ဒေသခံတွေကို ဖမ်းဆီးခဲ့တာဖြစ်ပါတယ်။

” မနေ့ကတော့ ရွာသားတယောက် ဆောဘက်သွားတာ ဆိုင်ကယ်နဲ့သွားတာ။ စစ်ကြောင်းဝင်နေတာကို ပေပြီးသွားတဲ့ အတွက် လူငယ်လေးတယောက်အဖမ်းခံရတယ်။ ညတုန်းကတော့ လူ ၂၀လောက်ဖမ်းတယ်လို့ သတင်းရပါတယ်”လို့ ဒေသခံက ပြောပါတယ်။

Public Service Announcement

ချင်း-မကွေးအစပ် ဒေသသတင်းတွေကို ဖော်ပြနေတဲ့ သတင်းရင်းမြစ်တစ်ဦးကလည်း မနေ့က ဖမ်းဆီးခံရတာ လူငယ်၊ လူလတ်ပိုင်း ၂၅ဦးခန့်ရှိပြီး ဒီကနေ့မနက်မှာ အချို့ကို ပြန်လွှတ်ပေးတယ်လို့ သိရကြောင်း လူမှုကွန်ရက်မှာ ရေးသားအသိပေးထားပါတယ်။

ဆောမြို့ကို ရောက်နေတဲ့ စစ်တပ်က အင်အား ၃၀လောက်ဟာ အကြည်ကတင်းကျေးရွာဘက်ကို ရှေ့ပြေးအဖြစ်ထွက်လာတယ်လို့ ဒေသခံသတင်းရင်းမြစ်က ပြောပါတယ်။

ဆော၊ ကျောက်ထုလမ်းပိုင်းအတွင်းရှိ ကျေးရွာနေ ပြည်သူတွေ အထူးဂရုစိုက်ဖို့ စစ်တပ်ရဲ့ စစ်ကြောင်း ၊ လေကြောင်းသတင်းတွေနားစွန့်ဖို့လည်း ဒေသခံတွေက အသိပေးထားပါတယ်။

စစ်တပ်ဟာ ချင်းတောင်ပိုင်းနဲ့ မကွေးအစပ်ဒေသရှိ ဆောမြို့နယ်ကို စစ်အင်အားတွေအလုံးအရင်းဖြည့်တင်းတာ လေကြောင်းတိုက်ခိုက်တာတွေ ဆက်တိုက်ပြုလုပ်လျက်ရှိပါတယ်။

ဆောမြို့ကို ဝင်လာတဲ့ စစ်တပ်ကို ဒေသခံ တော်လှန်ရေးတပ်တွေက ခုခံတိုက်ခိုက်ကြပေမယ့် လူအင်အားလက်နက်အင်အား မမျှတာတဲ့ အခြေအနေကြောင့် စစ်တပ်စစ်ကြောင်းတွေကို ဟန့်တားနိုင်ခြင်းမရှိခဲ့ဘူးလို့ ဒေသခံတော်လှန်ရေး သတင်းရင်းမြစ်က ပြောပါတယ်။

စစ်တပ်ဟာ လေကြောင်း ပစ်ကူအပြင် နည်းပညာမြင့်ဒရုန်းနဲ့ ဂျန်ဘာတွေအသုံးပြု လာသလို စစ်အင်အားအများအပြားနဲ့ စစ်ကြောင်းထိုးလာတာလို့ ပြောပြပါတယ်။