ဩစတြေးလျ နိုင်ငံမှာ ပျော့ပျော့အိအိ လေထိုးကစားကွင်းတစ်ခု ပေါက်ကွဲမှုကြောင့် ကလေး ၂ ဦး သေဆုံးပြီး အပြင်းအထန် ထိခိုက် ဒဏ်ရာရသူတွေလည်း ရှိခဲ့ကြောင်း သိရပါတယ်။
ဒီဇင်ဘာ ၁၆ ရက် မနက်ပိုင်းက တက်စ်မေးနီးယားကျွန်း၊ ဒီဗန်ပေါ့တ်မြို့မှာရှိတဲ့ မူလတန်းကျောင်း တစ်ခုမှာ အခုလို ဆိုးရွားတဲ့ မတော်တဆမှု ပေါ်ပေါက်ခဲ့တာပါ။ ရဲတိုက်ပုံ တည်ဆောက်ထားတဲ့ ကစားကွင်း ပေါက်ကွဲမှုကြောင့် တချို့ ကလေးတွေဟာ ပေ ၃၀ ကျော် အမြင့်လောက်ကနေ လွင့်စင် ပြုတ်ကျကုန်တယ်လို့ ရဲတွေက ပြောပါတယ်။
အသေးစိတ် အချက်အလက်တွေကို မထုတ်ပြန်သေးပေမယ့် ကလေး ၂ ဦး သေဆုံးပြီး အခြေအနေ အရမ်း စိုးရိမ်ရတဲ့ ဒဏ်ရာရသူတွေလည်း ရှိခဲ့တယ်လို့ တက်စ်မေးနီးယား ရဲတပ်ဖွဲ့က ဆိုပါတယ်။ အခင်းဖြစ်ချိန်က လေထိုး ကစားကွင်းပေါ်မှာ ကလေး ဘယ်နှယောက် ရှိနေခဲ့သလဲ ဆိုတာတော့ အတိအကျ မသိရသေးပါဘူး။
Hillcrest မူလတန်းကျောင်းမှာ စာသင်နှစ် ပြီးဆုံးတဲ့ ပျော်ပွဲရွှင်ပွဲ အခမ်းအနား ကျင်းပနေချိန်၊ ကလေး မိဘတွေ ရှေ့မှောက်မှာတင် အခုလို ဆိုးဆိုးရွားရွား အခြေအနေမျိုး ပေါ်ပေါက်ခဲ့တာ ဖြစ်ပါတယ်။
Public Service Announcement
ဩစတြေးလျ ဝန်ကြီးချုပ် စကော့ မော်ရစ်ဆန်က ဒီဖြစ်ရပ်ဆိုးကြီးအတွက် အရမ်း တုန်လှုပ် ကြေကွဲမိကြောင်း ပြောကြားခဲ့ပါတယ်။ ကလေးလေးတွေက ပျော်ပျော်ရွှင်ရွှင် ဆော့ကစားနေကြတဲ့ အချိန်မှာ ကြောက်မက်ဖွယ် အခြေအနေကြီးတစ်ခုနဲ့ ကြုံခဲ့ရှာတာ ဖြစ်ကြောင်း၊ ဒီသတင်းကို ကြားသိသူတိုင်း ရင်ကွဲမတတ် ဝမ်းနည်းနေကြကြောင်း ဝန်ကြီးချုပ်က ဆိုပါတယ်။
လေထိုး ကစားကွင်း ပေါက်ကွဲခဲ့တဲ့ အကြောင်းရင်းနဲ့ ပတ်သက်လို့ စုံစမ်း စစ်ဆေးမှုတွေ ပြုလုပ်နေဆဲပါ။ ဒီဗန်ပေါ့တ်ဟာ တက်စ်မေးနီးယား မြောက်ပိုင်းက ဝေးလံသီခေါင်တဲ့ ကမ်းရိုးတန်းမှာ တည်ရှိတဲ့ ဆိပ်ကမ်းမြို့လေးဖြစ်ပြီး လူဦးရေ ၃ သောင်း ဝန်းကျင်သာ နေထိုင်ကြောင်း သိရပါတယ်။
