မေ ၂၁၊ ၂၀၂၆။ ထားမြတ်/People’s Spring
ကချင်ပြည်နယ်၊ ရွှေကူမြို့နယ်က ၅လမ်းဆုံတပ်စခန်းကို စစ်တပ်က ပြန်လည်ထိုးစစ်ဆင်လာလို့ ကချင်လွတ်လပ်ရေးတပ်မတော်(KIA)ပူးပေါင်းတပ်က ဆုတ်ခွာပေးရကြောင်း ကချင်စစ်ရေး သတင်းရင်းမြစ်က ပြောပါတယ်။
အဲဒီ ၅လမ်းဆုံ တပ်စခန်းကို အရင်က စစ်တပ် တပ်စွဲထားတာဖြစ်ပြီး အခု ၂၀၂၆ ဧပြီ ၂၃ရက်မှာ KIA ပူးပေါင်းတပ်က သိမ်းပိုက်ခဲ့ရာ တစ်လခန့်အကြာ မေလ ၁၈ရက်မှာ ပြန်လက်လွှတ်လိုက်ရတာဖြစ်တယ်လို့ သတင်းရင်းမြစ်က ပြောပါတယ်။
၅လမ်းဆုံတပ်စခန်း ပြန်လည်စွန့်လွတ်လိုက်ရမှု အပါအဝင် ကချင်ဒေသ စစ်ရေးအခြေအနေတွေ မေးမြန်းဖို့ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်ထားဆဲဖြစ်ပြီး အဆက်အသွယ်မရသေးပါဘူး။
Public Service Announcement
၅လမ်းဆုံတပ်စခန်းကို KIA ပူးပေါင်းတပ် ထိုးစစ်ဆင်ချိန်က ၃ရက်ကြာမြင့်ခဲ့ပြီး လက်နက်ခဲယမ်းတွေလည်း သိမ်းရခဲ့ပါတယ်။
အဲဒီဒေသဟာ KIA တပ်မဟာ(၁၁)ရဲ့ နယ်မြေဖြစ်ပြီး စစ်တပ်က ခလရ(၅၆)တပ်ရင်း ၊ ခမရ(၆၀၂)တပ်ရင်း၊ တပ်မ (၈၈) လက်အောက်ခံ ခလရ(၃၇၈)တပ်ရင်းနဲ့ (၄၁၆)တပ်ရင်းတွေ ပူးပေါင်းလှုပ်ရှားနေတာဖြစ်ပါတယ်။
စစ်တပ်ဟာ ဗန်းမော်မြို့တိုက်ပွဲကို စစ်အင်အားဖြည့်တင်းဖို့ ကြိုးပမ်းနေပြီး ရွှေကူမြို့နယ်မှာ အင်အားထောင်ချီစုဖွဲ့ ပြင်ဆင်နေတယ်လို့ ကချင်စစ်ရေး သတင်းရင်းမြစ်က ပြောထားပါတယ်။
ဒါကြောင့် ဒေသတွင်း စစ်ရေးအခြေအနေတွေ ပြင်းထန်လာနိုင်တယ်လို့လည်း ပြောထားပါတယ်။
