ထိုင်း – မြန်မာနယ်စပ်ကုန်သွ​ယ်ရေးတံတားပြန်ဖွင့်

မေ – ၂၈ ၊၂၀၂၆ ၊နိုင်ပကောင်း/People’s Spring

တစ်နှစ်နီးပါးကြာပိတ်ထားခဲ့ရတဲ့ကရင်ပြည်နယ်၊မြ၀တီမြို့ရှိထိုင်း-မြန်မာအမှတ်(၂)ချစ်ကြည်ရေးတံတားကိုဒီနေ့(မေလ ၂၈ ရက်)နေ့မနက်ပိုင်းမှာပြန်လည်ဖွင့်လှစ်လိုက်ပြီလို့မြ၀တီမြို့ခံတွေရဲ့ပြောချက်အရသိရပါတယ်။

နယ်စပ်ကုန်စည်ပို့ဆောင်ရေးအတွက်အသုံးပြုနေတဲ့ထိုင်း-မြန်မာ အမှတ်(၂)ချစ်ကြည်ရေးတံတားကိုပြီးခဲ့တဲ့နှစ်ဩဂုတ်လအတွင်းက အာဏာသိမ်းမြန်မာစစ်ကောင်စီဘက်ကတဖက်သတ်ပိတ်ခဲ့တာပါ။

ဒီနေ့ မနက်၁၀နာရီခွဲမှာထိုင်း-မြန်မာအမှတ်(၂)ချစ်ကြည်ရေးတံတားကို ထိုင်းနိုင်ငံဘက်ခြမ်းကဖွင့်လှစ်လိုက်ပြီးထိုင်းကုန်ကားတချို့လည်းမြန်မာ နိုင်ငံဘက်ခြမ်းနယ်စပ်ဂိတ်ကိုဖြတ်သန်းခဲ့တယ်လို့ ထိုင်းသတင်းတွေမှာ ဖော်ပြထားပါတယ်။

Public Service Announcement

မြ၀တီကကုန်သည်တစ်ဦးနဲ့ မြို့ခံတွေရဲ့ပြောဆိုချက်အရထိုင်း-မြန်မာအမှတ်(၂)ချစ်ကြည်ရေးတံတားနယ်စပ်ဂိတ်တွေဒီနေ့မနက်ပိုင်းမှာ ပြန်လည်ဖွင့်လှစ်လိုက်ပြီးနောက်ထိုင်းဘက်ကဝင်ရောက်လာတဲ့ကုန်တင်ကားတွေကိုမြန်မာဘက်ခြမ်း နယ်စပ်ဂိတ်ကပစ္စည်းစစ်တာ၊ ဓာတ်ပုံရိုက်တာတွေ ပြုလုပ်ခဲ့တယ်လို့ သိရပါတယ်။

မြန်မာနိုင်ငံမြ၀တီမြို့နဲ့ထိုင်းနိုင်ငံမဲဆောက်မြို့ကိုချိတ်ဆက်ထားတဲ့ ထိုင်း-မြန်မာအမှတ်(၂)ချစ်ကြည်ရေးတံတားဟာကုန်စည်ကူးသန်းပို့ဆောင်ခွင့်အတွက်အဓိကထားအသုံးပြုနေတဲ့တံတားဖြစ်ပြီး အမှတ်(၁) ချစ်ကြည်ရေးတံတားကတော့ ဖြတ်သန်းသွားလာမှုအတွက်သာ အသုံးပြုတာပါ။

စစ်ကောင်စီဟာပြီးခဲ့တဲ့ဧပြီလ ၂ ရက်နေ့ကထိုင်း-မြန်မာနယ်စပ်ကုန် သွယ်ရေးလမ်းပိုင်းအာရှလမ်းမကြီးကိုပြန်ထိန်းချုပ်ပြီးနောက်နှစ်လအကြာမှာထိုင်း-မြန်မာအမှတ်(၂)ချစ်ကြည်ရေးတံတားကို ပြန်ဖွင့်လိုက်တာပါ။