ဇွန်-၅၊၂၀၂၆၊ကတ်သရင်းနှင်း/People’s Spring
စစ်ကိုင်းမြို့ တပ်မ (၃၃)ပြန်လာတဲ့ စစ်တပ်ယာဉ်တန်း မိုင်းဆွဲခံရပြီး ထိခိုက်မှုရှိတယ်လို့ ဒေသခံတွေက ပြောပါတယ်။
စစ်ကိုင်းမြို့ လူဝင်မှုကြီးကြပ်ရေးရုံး(လဝက)အတွင်း ဗုံးပေါက်ကွဲပြီး မိနစ်ပိုင်းအကြာမှာ စစ်ကိုင်း- မုံရွာလမ်း၊ညောင်ပင်ဝန်းရွာက သံပြားကာ စစ်ကား ၅စီးဟာ တပ်မ (၃၃) ပြန်ဝင်ဖို့ထွက်လာချိန် စစ်ကိုင်းမြို့အဝင်နားက ကျောက်ဆည်နဲ့ ကုန်းကျေးရွာကြားမှာ ဒေသကာကွယ်ရေးတပ်ဖွဲ့က မိုင်းဆွဲခဲ့တာလို့ သိရပါတယ်။
“ကားတစ်စီးကတော့ တော်တော်လေးစုတ်ပျက်သွားတယ်။ဖြစ်ပြီးတော့ အတူတူလာတဲ့ ကားတွေက သေနတ်တွေနဲ့ လျှောက်ပစ်နေလို့ အနားကပ်မရခဲ့ဘူး။အထိခိုက် အသေးစိတ်ကိုမသိရဘူး”လို့ ဖြစ်စဉ်ကို သိရှိထားသူ တဦးက ပြောပါတယ်။
Public Service Announcement
စစ်တပ်က သေနတ်တွေနဲ့ အချိန်တော်ကြာ ပစ်ခတ်ပြီး မိုင်းဆွဲခံရတဲ့ကားကို နေရာမှာထားခဲ့ပြီး ဒဏ်ရာရတဲ့ စစ်သားတွေကို ခေါ်ဆောင်ကာ တပ်မ(၃၃)အတွင်း ဝင်သွားတယ်လို့ သိရပါတယ်။
စစ်တပ်က စစ်မှုထမ်းတပ်သားသစ်အင်အားတွေသုံးကာ နယ်မြေအများစုကို အင်အားအများအပြားနဲ့ စစ်ကြောင်းထိုးနေစဉ် စစ်ကိုင်းမြို့ပေါ်နဲ့ မြို့အနီးဝန်းကျင်မှာ ပြောက်ကျားတိုက်ခိုက်ခံရမှုတွေ ပြန်ဖြစ်လာခဲ့တာလို့ သိရပါတယ်။
