ဇွန်-၂၇၊၂၀၂၆။ဖိုးသား/People’s Spring
မကွေးတိုင်း၊ လောင်းရှည်မြို့နယ်ကို စစ်တပ်ဗုံးကြဲတာကြောင့် (၉)နှစ်အရွယ် ကလေးငယ် ၁ဦး အပါအ၀င် ၃ ဦး သေဆုံးပြီး ၁၀ ဦးခန့် ဒဏ်ရာရတယ်လို့ ဒေသခံတွေက ပြောပါတယ်။
ဒီကနေ့(ဇွန်လ ၂၇ ရက်)ညနေ ၅ နာရီခွဲ၀န်းကျင် က လောင်းရှည်မြို့နယ်၊နတ်ကောင်းကျင်းရွာကို ဂျက်ဖိုက်တာ ၁စီးနဲ့ ၂ကြိမ် ဗုံးကြဲခဲ့တာလို့ ဆိုပါတယ်။
“ဘာတိုက်ပွဲမှ မဖြစ်ဘူး။လောင်းရှည် မြို့နဲ့က တော်တော်ဝေးတယ်။အနောက်ဘက်ခြမ်းမှာ ။အဲဒါကို ကြဲသွားတာ”လို့ လောင်းရှည်မြို့နယ်ကာကွယ်ရေးတပ် နဲ့နီးစပ်သူက ပြောပါတယ်။
Public Service Announcement
ဗုံးကြဲခံရတဲ့နေရာမှာ (၉)နှစ်အရွယ် ကလေးငယ်နဲ့ (၄၀)၀န်းကျင် အမျိုးသား ၂ဦး သေဆုံးခဲ့တယ်လို့ အသိပေးပါတယ်။
ဒါ့အပြင် အသက် (၇၀၊၈၀) ကျော်အရွယ် အဘိုး၊အဘွား ၄ ဦးအပါအ၀င် သတ်လတ်ပိုင်းအရွယ် အမျိုးသမီး ၄ ဦး နဲ့ ကလေးငယ် ၁ဦး ဒဏ်ရာရခဲ့တယ်လို့ သိရပါတယ်။
“သိရသလောက် နေပြည်တော် ဧလာလေဆိပ်က တက်တဲ့ ဂျက်ဖိုက်တာ ကန်ပက်လက်ကို ကြဲပြီး ပြန်အဆင်း လောင်းရှည်ကို ကြဲတာ”လို့ စစ်တပ်
လေကြောင်းကွန်ရက်ကို စောင့်ကြည့်သူတစ်ဦးက ပြောပါတယ်။
မေလဒုတိယပတ်ကစပြီး လောင်းရှည်မြို့အခြေစိုက်(ကပစ-၂၅)ကနေ စစ်တပ်က စစ်ကြောင်းထိုးပြီး ဆောမြို့နယ်အတွင်း ဝင်ရောက်ခဲ့ပါတယ်။အဲဒီစစ်ကြောင်းက လက်ရှိမှာ ချင်းတောင်ပိုင်းက ကန်ပက်လက်မြို့အနီးကို ရောက်နေပြီး တော်လှန်ရေးတပ်တွေနဲ့ တိုက်ပွဲ ဖြစ်နေပါတယ်။
လက်ရှိစစ်ရေးအခြေအနေအရလည်း လောင်းရှည်မြို့အတွင်းက အဓိကလမ်းပိုင်းတွေ ဖြစ်တဲ့ သီးကုန်း– လောင်းရှည်လမ်းပိုင်း၊ ပိန်းချောင်း–လောင်းရှည်လမ်းပိုင်းနဲ့အင်ဘူး–လောင်းရှည်လမ်းပိုင်းတွေကို မသုံးဖို့ ဂန့်ဂေါခရိုင် တပ်ရင်း(၆)က ဇွန်လ ၂၄ရက်က ထုတ်ပြန်ထားပါတယ်။
ရုပ်သံ – ဒေသခံ
