ဇွန်-၂၉၊ ၂၀၂၆။ ထားမြတ်/People’s Spring
ချင်းပြည်နယ်၊ မင်းတပ်မြို့အနီး ကျေးရွာကို အာဏာသိမ်းစစ်တပ်က ဒီကနေ့ဇွန်၂၉ရက် မနက်မှာ လေကြောင်းကနေ ဗုံးကြဲတိုက်ခိုက်ခဲ့ရာ ကလေးငယ် ၃ ဦး သေဆုံးခဲ့တယ်လို့ မင်းတပ်ဒေသခံက အသိပေးပါတယ်။
သေဆုံးသွားတဲ့ ကလေးငယ်တွေဟာ အသက် (၇)နှစ်၊ (၈)နှစ်နဲ့ (၁၀)နှစ်အရွယ် မိန်းကလေးငယ်တွေ ဖြစ်တယ်လို့ ဆိုပါတယ်။
လေကြောင်းတိုက်ခိုက်မှုကြောင့် ဒဏ်ရာရသူတွေရှိတယ်လို့ ဒေသခံက အသိပေးထားပြီး နောက်ဆက်တွဲ အခြေအနေတွေ မေးမြန်းထားဆဲဖြစ်ပါတယ်။
Public Service Announcement
အာဏာသိမ်းစစ်တပ်ဟာ ဒီကနေ့ ညနေပိုင်းမှာလည်း မင်းတပ်မြို့အရှေ့ခြမ်းနေရာတွေကို Y12 လေယာဉ်နဲ့ ၁၁ကြိမ် ဗုံးအလုံး ၃၀ ကျော်ထပ်မံ တိုက်ခိုက်ကြဲချခဲ့တယ်လို့ ဒေသခံက အသိပေးပါတယ်။
မင်းတပ်ဒေသခံက နေ့စဉ်ဖော်ပြနေတဲ့ စစ်တပ်ရဲ့ လေကြောင်း တိုက်ခိုက်မှုသတင်းတွေအရ ဇွန် ၂၃ရက်ကနေ ဒီကနေ့ ဇွန် ၂၉ရက်ညနေပိုင်းအထိ မင်းတပ်မြို့နယ်ကို စစ်တပ်က တိုက်လေယာဉ် Y12 လေယာဉ်နဲ့ အကြိမ်ပေါင်း ၁၀၀ ကျော် ၊ ဗုံးအလုံးရေ ၃၅၀ ကျော် ကြဲချတိုက်ခိုက်ခဲ့ပါတယ်။
စစ်တပ်ဟာ မင်းတပ်မြို့နယ်ကို မနက်အစော၊ ညအချိန် ၊ ညသန်းခေါင် အပါအဝင် အချိန်မရွေး အကြိမ်ပေါင်းများစွာ လေကြောင်း တိုက်ခိုက်နေတာပါ။
ချင်းပြည်သူ့အစည်းအရုံး(CPU/CPA) သိမ်းပိုက်ထားတဲ့ မင်းတပ်မြို့ကို စစ်တပ်က ၂၀၂၆ မေလကုန်က ထိုးစစ်ဆင်ခဲ့ရာ တိုက်ပွဲ၁လ ခန့်ကြာပြီးဖြစ်ပါတယ်။
တိုက်ပွဲသတင်း အသေးစိတ် အခြေအနေတွေ ထုတ်ပြန်တာ မရှိပေမဲ့ စစ်တပ်ရဲ့ လေကြောင်းပစ်ကူပေးမှုဟာ နေ့စဉ်ရှိနေပါတယ်။ လေကြောင်းတိုက်ခိုက်ရာမှာ တိုက်ပွဲမရှိတဲ့ အရပ်သား နေထိုင်ရာတွေကိုပါ ဗုံးကြဲခဲ့တာဖြစ်ပြီး ဖျက်အားပြင်း ဗုံးတွေအသုံးပြု တိုက်ခိုက်တာလည်းရှိပါတယ်။
စစ်တပ်ဟာ ချင်းပြည်သူ့အစည်းအရုံး သိမ်းပိုက်ထားတဲ့ ကန်ပက်လက်မြို့ ပြန်ရဖို့လည်း ထိုးစစ်ဆင်နေရာ အခါအားလျော်စွာ ကန်ပက်လက်မြို့နယ်ကို လေကြောင်းဗုံးကြဲတာတွေ ဆက်လက်ပြုလုပ်နေဆဲဖြစ်ပါတယ်။
