အင်းစိန်ထောင်အာဏာပိုင်က နိုင်ကျဉ်းတွေကို အကြောင်းပြချက်မရှိပဲ အပြစ်ရှာရိုက်နှက်

ဇူလိုင်-၈၊၂၀၂၆။သတိုး/People’s Spring

အင်းစိန်ထောင်မှာ ထောင်အာဏာပိုင်တစ်ဦးက ထောင်တွင်းဘောလုံးပွဲသွားကြည့်တဲ့ နိုင်ငံရေးအကျဉ်းသားတွေကို အကြောင်းပြချက်မရှိပဲ အပြစ်ရှာ ရိုက်နှက်ခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) ကအသိပေးထားပါတယ်။

ဇူလိုင် ၅ ရက်က အင်းစိန်ထောင်တွင်းမှာ တရားဝင်ပြုလုပ်တဲ့ ဘောလုံးပွဲသွားကြည့်တဲ့ အကျဉ်းသားတွေကို အကျဉ်းထောင်ဝန်ထမ်း အောင်ကျော်ဆင့်က ခေါ်ယူမေးမြန်းပြီး အကျဉ်းသား ၃၀ လောက်ကို ရာဘာလက်ကိုင်တုတ်နဲ့ မျက်နှာ၊ ခေါင်းနဲ့ လည်ပင်းတွေကို ရိုက်နှက်ခဲ့တာလို့ PPNM ကသတင်းထုတ်ပြန်ထားပါတယ်။

ရိုက်နှက်ရာမှာ နိုင်ငံရေးအကျဉ်းသားတွေကို အဓိကပစ်မှတ်ထားပြီး ရိုက်ခဲ့သလို မြေပြင်ပေါ်မှာမှောက်ခိုင်းကာခြေထောက်နဲ့လည်း တက်နင်းခဲ့တယ်လို့ ဆိုပါတယ်။

Public Service Announcement

“ရိုက်နှက်ခံခဲ့ရသည့် နိုင်ငံရေးအကျဉ်းသားများသည် အဆောင်တွင်း စည်းကမ်းဖောက်ဖျက်မှု သို့မဟုတ် အခြားအပြစ်တစ်စုံတစ်ရာ ကျူးလွန်ထားခြင်းမရှိဘဲ အောင်ကျော်ဆင့် က နိုင်ငံရေးအကျဉ်းသားများအပေါ် ထားရှိသည့် အငြိုးအတေးကြောင့်သာ ရိုက်နှက်ခဲ့ခြင်းဖြစ်ကြောင်း PPNM မှ သိရှိရသည်။” လို့ ဖော်ပြထားပါတယ်။

အောင်ကျော်ဆင့်ရဲ့ရိုက်နှက်မှုကြောင့် နိုင်ငံရေးအကျဉ်းသားတွေရဲ့ မျက်နှာ နဲ့ ခေါင်းမှာ ပြင်းထန်ဒဏ်ရာတွေရရှိခဲ့ပြီး အချို့အကျဉ်းသားတွေက အိပ်ရာကမထနိုင်အောင် ဒဏ်ရာပြင်းထန်တယ်လို့ ဆိုပါတယ်။

ဒီရိုက်နှက်မှုအပေါ် PPNM အနေနဲ့ အပြင်းအထန်ရှုတ်ချကြောင်း နဲ့ အကျဉ်းထောင်အသီးသီးက နိုင်ငံရေးအကျဉ်းသာတွေရဲ့ ရပိုင်ခွင့်နဲ့ အခွင့်အရေးတွေကို အလေးထား ကာကွယ်ရပ်တည်မယ်လို့ သတင်းထုတ်ပြန်ထားပါတယ်။