ပေါက်နဲ့မြိုင်နယ်မှာစစ်တပ်ကြောင့်ပြည်သူသောင်းဂဏန်းထွက်ပြေးနေရ

ဇူလိုင် – ၁၆ ၊၂၀၂၆ /People’s Spring

မြန်မာနိုင်ငံအလယ်ပိုင်း မကွေးတိုင်း ထဲက ပေါက်မြို့နယ်နဲ့ မြိုင်မြို့နယ် အစပ်မှာရှိတဲ့ ကျေးရွာတွေကို အာဏာသိမ်းစစ်တပ်က ဇူလိုင်လဆန်းပိုင်းကစတင်ပြီးစစ်ကြောင်းထိုးပြီးမီးရှို့တာတွေကြောင့်ရွာ ၂၀ကျော်ရှိဒေသခံသောင်းဂဏန်းထွက်ပြေးတိမ်းရှောင်နေရတယ်လို့စစ်ရှောင်အရေးကူညီသူအချို့ဆီကသိရပါတယ်။

အခုလဆန်းဇူလိုင်လ ၃ ရက်ကစတင်ပြီး အင်အား ရာဂဏန်းပါတဲ့ စစ်တပ် ဟာပေါက်မြို့နယ်နဲ့ မြိုင်မြို့နယ်ကြားကထောက်ရှာပင်ကျေးရွာကိုဝင်ရောက်ခဲ့ပြီးအနီးဝန်းကျင်ရွာတွေကိုပါ မီးရှို့ဖျက်ဆီးတာပြုလုပ်ခဲ့ပါတယ်။

ထောက်ရှာပင်ရွာဟာ ပုသိမ် – မုံရွာ လမ်းမကြီးဘေးမှာ တည်ရှိတာပါ။

Public Service Announcement

ဒါအပြင်ထောက်ရှာပင်ရွာရဲ့ အရှေ့ခြမ်းမှာရှိတဲ့မြိုင်မြို့နယ်အပိုင်ထဲက လက်ခုပ်ပင်ရွာ ၊ကန်နက်ရွာ တွေကိုလည်း မီးရှို့ခဲ့တယ်လို့သိရပါတယ်။

စစ်တပ်​ဝင်ရောက်ခဲ့တဲ့ကန်နက်ရွာမှာတော့ပြည်သူ နှစ်ဦးထက်မနည်း အသတ်ခံခဲ့ရတယ်လို့ ဒေသတွင်း ရင်းမြစ်တစ်ခုဖြစ်တဲ့ မြိုင်ဒေါင်းမင်းက အသိပေးထားပါတယ်။

လက်ရှိမှာတော့ အာဏာသိမ်းစစ်တပ်စစ်ကြောင်းတွေဟာ ပေါက်မြို့နယ်ကတဆင့် မြိုင်မြို့နယ်ကရွာတွေကို ဆက်လက်စစ်ကြောင်းထိုးနေတာကြောင့် လက်ခုပ်ပင်ရွာ ၊ကန်နက်ရွာတွေအပြင် ရွာသစ်ရွာ၊ ကိုင်းတောမရွာ၊ ရွာတန်းရှည်ရွာ၊ ဆိတ်သာရွာ၊ ဝက်ပုတ်ရွာ၊ ကုန်းရွာ၊ ချောင်းဦးတိုရွာ၊ ပေပင်သိုက်ရွာ၊ ကိုင်းမရွာနဲ့ ညောင်ကုန်းရွာ က ဒေသခံပြည်သူတွေပါထွက်ပြေးနေရတာပါ။

အာဏာသိမ်းစစ်တပ်ရဲ့ပစ်ခတ်မှုတွေကြောင့်တိမ်းရှောင်နေရတဲ့ဒေသခံတွေဟာ ရွာတွေကို ပြန်မနေရဲသေးတဲ့အတွက် စားဝတ်နေရေး အခက်အခဲတွေနဲ့ရင်ဆိုင်နေရတယ်လို့ စစ်ရှောင်အရေးကူညီနေသူတစ်ဦးကပြောပါတယ်။

“ရက်ကြာလာတော့ စားဖို့နဲ့ဆေးဝါးတွေကခက်လာတာပေါ့ “ လို့ စစ်ရှောင်အရေးကူညီသူကဆိုပါတယ်။

NUG အစိုးရရဲ့ ပေါက်မြို့နယ် လူကယ်ပြန်ဝန်ကြီးဌာနကတော့ ပေါက်မြို့နယ်အရှေ့မြောက်ပိုင်းကျေးရွာကိုးရွာကအိမ်ထောင်စု ၁,၅၀၅ ရှိ လူဦးရေ ၇,၀၀၀ဝန်းကျင် စစ်ရှောင်နေရတယ်လို့ ထုတ်ပြန်ထားပါတယ်။