လူအစုလိုက်အပြုံလိုက်​သေခဲ့တဲ့​လေ​ကြောင်းဗုံးကြဲမှု​တွေကို အမိန့်ပေးခဲ့တဲ့ လေချုပ်ဟောင်းရဲ့အိမ်ကို ချိန်ကိုက်ဗုံး​ရောက်

ဇူလိုင်-၃၁၊၂၀၂၆။​ရောင်နီ/People’s Spring

ပဇီကြီးလေကြောင်းတိုက်ခိုက်မှုအပါအဝင် ပြည်သူတွေကို​လေ​ကြောင်းက​နေအစုလိုက်အပြုံလိုက်သတ်ဖြတ်တဲ့စစ်ရာဇဝတ်မှု​တွေမှာအမိန့်ပေးစေခိုင်းခဲ့တဲ့လေတပ်ရဲ့ကာကွယ်ရေးဦးစီးချုပ်ဟောင်း၊ လက်ရှိကာကွယ်​ရေးဝန်ကြီး ဗိုလ်ချုပ်ကြီးထွန်းအောင်ရဲ့ နေအိမ်ကို ​ရန်ကုန်​UG တစ်ဖွဲ့က ချိန်ကိုက်ဗုံးပို့ဆောင်ခဲ့တယ်လို့ စစ်​ရေးသတင်းရင်းမြစ်အချို့ကပြောပါတယ်။

လုံခြုံ​ရေး​ကြောင့် အမည်မ​ဖော်လိုတဲ့ရန်ကုန်မြို့က UG တစ်ဖွဲ့ကဇူလိုင် ၃၀ ရက် ညနေ ၄ နာရီလောက်မှာ ကမာရွတ်မြို့နယ် သီရိမင်္ဂလာလမ်း ခြံအမှတ် ၂၁/၂၂ ကိုဗိုလ်ချုပ်ကြီးထွန်းအောင်ရဲ့ ဇနီး ဒေါ်တင်မိုးနွယ် အမည်နဲ့ ပါဆယ်ဗုံးပို့ခဲ့တာလို့ စစ်​ရေးသတင်းရင်းမြစ်တဦးက​ပြောပါတယ်။

ပါဆယ်ဗုံးရောက်ပြီး ၁၅ မိနစ်လောက်အကြာမှာ စစ်တပ် DC ကား‌ လေးစီး ရောက်လာပြီး လမ်းပိတ်စစ်ဆေးမှုတွေပြုလုပ်ကာ ဗုံးကိုဖျက်ဆီးခဲ့တယ်လို့ အထက်ပါသတင်းရင်းမြစ်က​ပြောပါတယ်။ စစ်တပ်ကာကွယ်​ရေးဝန်ကြီးအိမ် ချိန်ကိုက်မိုင်း ​ရောက်လာတဲ့ဖြစ်စဥ်နဲ့ပတ်သက်ပြီးစစ်တပ်ဘက်ကသတင်းထုတ်ပြန်ထားတာမရှိသေးပါဘူး။

Public Service Announcement

စစ်ဆင်ရေးကို မိုးရွာထဲမှာလုပ်ဆောင်ခဲ့ရတာဖြစ်ပြီး အဖွဲ့သားအားလုံး ဘေးကင်းတယ်လို့ အထက်ပါစစ်​ရေးရင်းမြစ်ကပြောပါတယ်။

ဗိုလ်ချုပ်ကြီးထွန်းအောင်ကလေတပ် ကာချုပ် အနေနဲ့ ၂၀၂၂ ကနေ ၂၀၂၄ အထိတာဝန်ယူခဲ့တာဖြစ်ပြီး ပြည်သူသေဆုံးမှုနဲ့ ထိခိုက်မှုအများဆုံး လေကြောင်းတိုက်ခိုက်မှုကြီး ၅ ခုရဲ့ အဓိက တာဝန်ရှိသူဖြစ်ပါတယ်။

အဲဒီ့လေကြောင်းတိုက်ခိုက်မှုတွေကတော့ စစ်ကိုင်းတိုင်း၊ ပဇီကြီးရွာ ၊ ကချင်ပြည်နယ်၊ ဖားကန့် (အနန့်ပါ) ၊ရှမ်းပြည်နယ်တောင်ပိုင်း၊ ဖယ်ခုံ(လွယ်ယိန်း ဒုက္ခသည်စခန်း)၊ စစ်ကိုင်းတိုင်း၊ဒီပဲယင်း(လက်ယက်ကုန်းရွာ)စာသင်ကျောင်းနဲ့ ကနီမြို့နယ် ၊မကွေးရွာ တို့ကိုဗုံးကြဲပြီး ပြည်သူ​တွေအစုလိုက်အပြုံလိုက်​သေခဲ့ပါတယ်။

စစ်တက္ကသိုလ် အပတ်စဉ်-၂၉ ကျောင်းဆင်း ဗိုလ်ချုပ်ကြီး ထွန်းအောင်က လက်ရှိစစ်အုပ်စုမှာ ကာကွယ်ရေးဝန်ကြီးအဖြစ် တာဝန်ယူဆောင်ရွက်နေတာဖြစ်ပါတယ်။

ရန်ကုန်မြို့၊ကမာရွတ်မြို့နယ် သီရိမင်္ဂလာလမ်းမှာရှိတဲ့ ၎င်းတို့အမည် ပေါက်အိမ်မှာအစောင့်နဲ့ ဆွေမျိုးတော်စပ်သူတချို့ရှိနေပြီး ဗိုလ်ချုပ်ကြီးထွန်းအောင်ဟာလက်ရှိ နေပြည်တော်၊ ဇေယျာသီရိမြို့နယ်ရှိ စစ်ရုံးချုပ် (ကကလှမ်း) အနီးရှိ သီးသန့်စစ်ဘက်ဗဟိုဇုန် အဆင့်မြင့်အိမ်ရာမှာ နေထိုင်နေတယ်လို့သိရပါတယ် ။

ရန်ကုန်မြို့မှာ မြို့ပြ​ပြောက်ကျားလှုပ်ရှားမှု​တွေ လ​ပေါင်းများစွာငြိမ်သက်​နေရာက အခုလပိုင်းအတွင်းမှာ ပြန်လည်​ပေါ်​ပေါက်လာပါတယ်။

ဇူလိုင် ၂၁ ရက် ညဦးပိုင်းကလည်း မြို့ပြ​ပြောက်ကျားတပ်ဖွဲ့တစ်ခုဖြစ်တဲ့Yangon Army (YA) က အင်းစိန်မြို့မရဲစခန်း၏ လုံခြုံရေးဂိတ်ကိုဖောက်ခွဲတိုက်ခိုက်ခဲ့ပါတယ်။