ဩဂုတ်-၂၀ ၊၂၀၂၆။ဖိုးသား/People’s Spring
မကွေးတိုင်း၊ စလင်းမြို့ ၀က်သည်းကန်အနီးက စစ်တပ် စစ်ဆေးရေးဂိတ်ကို ဒရုန်းနဲ့တိုက်ခိုက်ခဲ့ရာ ထိခိုက်သေဆုံးသူတွေရှိတယ်လို့ မင်းဘူးခရိုင်အမှတ်(၅)တပ်ရင်းက ဒီကနေ့ ဩဂုတ် ၂၀ရက်မှာ ထုတ်ပြန်ပါတယ်။
ဩဂုတ် ၁၉ရက် ညနေ ၆နာရီ၀န်းကျင်မှာ စလင်းမြို့ ပေါ် ၀က်သည်းကန်အနီးက စစ်တပ်ရဲ့ ဆင်ကျူံး စစ်ဆေးရေးဂိတ်ကို ဒရုန်းနဲ့ တ်ိုက်ခိုက်ခဲ့တာလို့ ဆိုပါတယ်။
တိုက်ခိုက်မှုအတွင်း စစ်ကောင်စီတပ်သား၊ရဲ နဲ့ပျူစောထီးအဖွဲ့က ၄ ဦးသေဆုံးပြီး ၇ ဦး ဒဏ်ရာရတယ်လို့ အသိပေးပါတယ်။ အဲဒီထိခိုက်သေဆုံးမှုနဲ့ပတ်သက်ပြီး လူထုနွေဦးက သီးခြားအတည်မပြုနိုင်သေးပါဘူး။
Public Service Announcement
“ဆင်ကျူံးဂိတ်က စလင်းမြို့ထဲ စစ်တပ်အထိုင်ချတာ အဓိကကျတဲ့နေရာထဲမှာပါတယ်။ပစ္စည်းတွေ၊ဆေးဝါး၊ဆန်၊ ဆီတွေမတရားဖမ်းသိမ်း တာတွေရှိသလို မြို့တွင်းထဲ လာရောင်းတဲ့တောင်သူတွေကိုလည်း ကားသိမ်းငွေညှစ် ပစ္စည်းသိမ်းတာမျိုးတွေလဲ လုပ်တယ်”လို့ စလင်းမြို့နယ်ဒေသခံတစ်ဦးက ပြောပါတယ်။
ဒရုန်းစစ်ဆင်ရေးကို မင်းဘူးခရိုင်စစ်ဌာနရဲ့ မင်းဘူးခရိုင်အမှတ်(၅)တပ်ရင်းနဲ့ တပ်ရင်း Drone လက်ရုံးအဖွဲ့က ပူးပေါင်းပြီး တိုက်ခိုက်ခဲ့တာလို့ ထုတ်ပြန်ချက်မှာ ဖော်ပြပါတယ်။
အခု ဩဂုတ်အတွင်း အာဏာသိမ်းစစ်တပ်က စလင်းမြို့နယ်တွင်းမှာ လေကြောင်းတိုက်ခိုက်မှုတွေဆက်တိုက်လုပ်နေပြီး အရပ်သားတချို့ ထိခိုက်သေဆုံးတာ ရှိပါတယ်။
ဒါ့အပြင် စလင်းမြို့အနီးက ဒေသခံ ၁၀ဦးကျော်ကို စစ်တပ်က ပေါ်တာဆွဲ ဖမ်းဆီးခဲ့ပြီး အဲဒီသူတွေရဲ့ နောက်ဆက်တွဲ အခြေအနေကို ဒေသတွင်း အရပ်ဘက်အဖွဲ့အစည်းတွေက စုံစမ်းနေဆဲလို့ သိရပါတယ်။
