'/%3E%3C/svg%3E){kind=small}
စက်တင်ဘာ ၁၁၊ ၂၀၂၆။ ထားမြတ်/People’s Spring
စစ်တပ်ရဲ့ လေတပ်စခန်း(တံတားဦး)ကို တိုက်ခိုက်မှုအတွင်း လေကြောင်းရန်ကာကွယ်ရေးတပ်ဖွဲ့ လစခ (၇)မှ ဗိုလ်မှူးကြီး မျိုးလှိုင်ဦး အပါအဝင် ၅ ဦး သေဆုံးခဲ့ကြောင်း ပြည်သူ့ကာကွယ်ရေးတပ်မတော်(PDF) စစ်ရုံးချုပ်က ထုတ်ပြန်ပါတယ်။
စစ်တပ်ရဲ့ YAK-130 တိုက်လေယာဉ်တွေ ရပ်နားထားတဲ့ နေရာတွေကို တိကျစွာ ချဉ်းကပ်တိုက်ခိုက်နိုင်ခဲ့တယ်လို့လည်း PDF စစ်ရုံးချုပ်က ထုတ်ပြန်ပါတယ်။
တံတားဦးမြို့နယ်က စစ်တပ်ရဲ့ လေတပ်စခန်းကို အကြမ်းဖက်မှုတားဆီးနှိမ်နင်းရေး ရည်ရွယ်ချက်နဲ့ ပြည်သူ့ကာကွယ်ရေးတပ်မတော်က ဒရုန်းစစ်ဆင်ရေး ဖော်ဆောင်ခဲ့တာလို့ ဆိုပါတယ်။
Public Service Announcement
အဲဒီ လေတပ်စခန်း (တံတားဦး)ဟာ ပြည်သူလူထုအပေါ် လေကြောင်းကတစ်ဆင့် ဗုံးကြဲတိုက်ခိုက် သတ်ဖြတ်မှုများကို အဓိက ကျူးလွန်နေတဲ့ စစ်ဘက်သုံး ပင်မလေတပ်စခန်းဌာနချုပ်တစ်ခု ဖြစ်တယ်လို့လည်း ဖော်ပြပါတယ်။
စစ်ဆင်ရေးအတွင်း စစ်တပ်က ထိခိုက်သေဆုံးခဲ့သလို တော်လှန်ရေးရဲဘော် ၃ဦး ကျဆုံးခဲ့ရတယ်လို့ အသိပေးပါတယ်။
“စစ်ခေါင်းဆောင် မင်းအောင်လှိုင် ဦးဆောင်သည့် အကြမ်းဖက်စစ်တပ်သည် ၎င်းတို၏ အဓိက စစ်ဘက်သုံး လေတပ်စခန်းဌာနချုပ် တိုက်ခိုက်ခံရမှုနှင့် ထိခိုက်ဆုံးရှုံးမှုများကို ဝန်ခံခြင်းမရှိဘဲ လေတပ်စခန်းနှင့် မျက်နှာချင်းဆိုင်တွင် တည်ရှိနေသော မန္တလေးအပြည်ပြည်ဆိုင်ရာ အရပ်ဘက်လေဆိပ် တိုက်ခိုက်ခံရသယောင် လှည့်စားဝါဒဖြန့်လျက် ရှိသည်” လို့ ပြည်သူ့ကာကွယ်ရေးတပ်မတော်က ထုတ်ပြန်ပါတယ်။
ပြည်သူ့ကာကွယ်ရေးတပ်မတော်ရဲ့ ထုတ်ပြန်ချက်မှာ စစ်တပ်လေယာဉ်ထိခိုက်ပျက်စီးမှု အခြေအနေ ဖော်ပြမထားပေမဲ့ စစ်ရေးသတင်းရင်းမြစ်အချို့ကတော့ စစ်တပ်လေယာဉ်တွေ ထိခိုက်ပျက်စီးခဲ့ကြောင်း ပြောပြပါတယ်။ မနေ့က စစ်ဆင်ရေးမှာ ဒရုန်း ၆စီးနဲ့ တိုက်ခိုက်ခဲ့တာဖြစ်ပြီး လေယာဉ်တွေ ထိခိုက်မှုရှိခဲ့တယ်လို့ ဆိုပါတယ်။
စစ်အာဏာရှင်စနစ် အမြစ်ပြတ် ချုပ်ငြိမ်းရေးအတွက် စစ်ရေးမဟာဗျူဟာနဲ့ အညီ လေတပ်စခန်းဌာနချုပ်များ အပါအဝင် စစ်တပ်ရဲ့ အဓိက ကျောရိုး စစ်ဘက် ဗဟိုချက်မများကို အရှိန်အဟုန်မြှင့် ဆက်လက်ထိုးစစ်ဆင် ချေမှုန်းသွားမယ်လို့လည်း ပြည်သူ့ကာကွယ်ရေးတပ်မတော် က ထုတ်ပြန်ပါတယ်။
အခု လေတပ်စခန်းတိုက်ခိုက်တဲ့ စစ်ဆင်ရေးကို ပြည်သူ့ကာကွယ်ရေးတပ်မတော်၊ မြင်းခြံခရိုင်စစ်ဌာနက ဦးဆောင်စုဖွဲ့ကာ မြင်းခြံခရိုင် အမှတ် (၄) တပ်ရင်း၊ မြင်းခြံခရိုင် အမှတ် (၁၀) တပ်ရင်း၊ မြင်းခြံခရိုင် ဒရုန်းတပ်ဖွဲ၊ မန္တလေးခရိုင် အမှတ် (၃) တပ်ရင်း၊ ကျောက်ဆည်ခရိုင် အမှတ် (၂) တပ်ရင်း၊ ကျောက်ဆည်ခရိုင် အမှတ် (၄) တပ်ရင်း၊ တံတားဦးမြိုနယ် ပကဖ၊ စဉ့်ကိုင်မြိုနယ် ပကဖ၊ ငါန်းဇွန်မြိုနယ် ပကဖ၊ STF၊ အမှတ် (၁)နဲ့ အမှတ် (၂) ရွှေဘိုခရိုင်စစ်ဌာနများက ပူးပေါင်းအင်အားများဖြင့် ဟန်ချက်ညီ ဖော်ဆောင်ခဲ့တာလို့ အသိပေးထုတ်ပြန်ပါတယ်။
