ဖာပွန်ခရိုင်တိုက်ပွဲ စစ်တပ်ထံမှ လက်နက် ၃လက် သိမ်းရ၊ တပ်သား ၁ဦး လက်နက်ကြီးငယ်၊ ၂လက်နဲ့ အလင်းဝင်

စက်တင်ဘာ ၁၆၊ ၂၀၂၆။ ထားမြတ်/People’s Spring

ကရင်အမျိုးသားအစည်းအရုံး(KNU) တပ်မဟာ (၅)နယ်မြေ ဖာပွန်ခရိုင် တိုက်ပွဲမှာ စစ်ကောင်စီတပ်ထံက လက်နက်ငယ် ၃လက်သိမ်းရခဲ့ကြောင်း KNU တပ်မဟာ(၅) မူတြော်(ဖာပွန်)ခရိုင်က သတင်းထုတ်ပြန်ပါတယ်။

KNUက တိုက်ပွဲသတင်းကို ကရင်ဘာသာနဲ့ ထုတ်ပြန်ခဲ့တာဖြစ်ပြီး ဓာတ်ပုံမှတ်တမ်းတွေ ဖော်ပြအသိပေးထားပါတယ်။ အဲဒီ ထုတ်ပြန် ချက်ကို ကရင်သတင်းရင်းမြစ်တစ်ဦးက ဗမာလိုဘာသာပြန် ရှင်းပြထားပါတယ်။

KNU တပ်မဟာ(၅)ဟာ ဖာပွန်ခရိုင် ကတိုင်တိနဲ့ ကမမောင်းကြားက စစ်တပ်ကို စက်တင်ဘာ ၁၄ရက်မှာ တိုက်ခိုက်ခဲ့တာလို့ဆိုပါတယ်။ KNLA တပ်ရင်း(၁၀၂)နဲ့ ပူးပေါင်းတပ်တွေရဲ့ တိုက်ခိုက်မှုကြောင့် စစ်တပ်ထံက MA1 ၃လက် သိမ်းရခဲ့ကြောင်း အသိပေးထားပြီး ထိခိုက်ကျဆုံး အခြေအနေတွေတော့ ဖော်ပြမထားပါဘူး။

Public Service Announcement

အလားတူ စစ်ကောင်စီတပ်ဖွဲ့ဝင်တစ်ဦးလက်နက်တွေ ယူလာပြီး အလင်းဝင်ခဲ့တာကိုလည်း KNU တပ်မဟာ(၅)ရဲ့ ထုတ်ပြန်ချက်မှာ ဖော်ပြထားပါတယ်။

စက်တင်ဘာ ၁၃ရက်မှာ စစ်တပ်ရဲ့ အမှတ်(၁၂) စစ်ဆင်ရေးကွပ်ကဲမှုဌာနချုပ် လက်အောက်ခံ ခမရ(၃၅၇) တပ်က တပ်သား ၁ဦးဟာ ဖာပွန်ခရိုင် ဒွယ်လိုးမြို့နယ်မှာ KNLA တပ်ရင်း(၁၀၂)ထံ အလင်းဝင်ခဲ့တာလို့ ဆိုပါတယ်။

အလင်းဝင်လာတဲ့ တပ်သားက MA-1 (၁)လက် နဲ့ BA-100 (၁)လက်၊ လက်နက်ကြီးကျည်အချို့နဲ့ လက်နက်ငယ်ကျည်တွေ ယူဆောင်လာကြောင်းလည်း ဓာတ်ပုံမှတ်တမ်းနဲ့အတူ ဖော်ပြပါတယ်။

KNU တပ်မဟာ(၅)ဟာ အာဏာသိမ်းပြီးနောက် နယ်မြေအတွင်းရှိ စစ်ကောင်စီတပ်စခန်းများစွာကို တိုက်ခိုက်သိမ်းပိုက်ထားတာဖြစ်ပါတယ်။ စစ်တပ်ဘက်ကလည်း ဖာပွန်ခရိုင်အတွင်း ဆုံးရှုံးနယ်မြေတွေ ပြန်ရဖို့ စစ်အင်အားဖြည့်ထိုးစစ်ဆင်နေလို့ KNLA တပ်မဟာ(၅) ပူးပေါင်းတပ်နဲ့ စစ်ကောင်စီအကြား တိုက်ပွဲတွေဆက်ရှိနေပါတယ်။