အစ္စလာမ်မစ် ဘာသာရေးရဲ့ အထွဋ်အမြတ် နယ်မြေဖြစ်တဲ့ မက္ကာမြို့ကို ဟိုသီတွေက တိုက်ခိုက်ဖို့ ကြိုးစားခဲ့ကြောင်း ဆော်ဒီအာရေးဘီးယားက စွပ်စွဲ ပြောကြားလိုက်ပါတယ်။
အီရန်ရဲ့ မဟာမိတ်ဖြစ်တဲ့ ယီမင်အခြေစိုက် ဟိုသီတပ်တွေဟာ ဆော်ဒီဦးဆောင်တဲ့ အာရပ်မဟာမိတ် တပ်ပေါင်းစုက ပံ့ပိုးပေးထားတဲ့ နိုင်ငံတကာ အသိအမှတ်ပြု ယီမင်အစိုးရနဲ့ စစ်ခင်းတိုက်ခိုက်နေပါတယ်။ ပြီးခဲ့တဲ့ ရက်ပိုင်းအတွင်း နှစ်ဖက်ကြားက ရင်ဆိုင်တိုက်ပွဲတွေ ပိုမို အရှိန်မြင့်လာပြီး ဟိုသီတွေဟာ ပင်လယ်နီ ရေပြင်နဲ့ ထိစပ်ရာ ယီမင်အနောက်ဖက် ကမ်းရိုးတန်း တစ်ခုလုံးကို သိမ်းယူနိုင်ခဲ့ပါတယ်။
ဆော်ဒီဟာ ဟိုသီတွေရဲ့ စစ်ရေးပစ်မှတ်တွေအပေါ် လေကြောင်းတိုက်ခိုက်မှုတွေ အရှိန်အဟုန် မြှင့်တင်လာသလို ဟိုသီတွေကလည်း ဆော်ဒီပိုင်နက်ထဲက မြို့ရွာတွေ၊ ပင်လယ်နီမှာရှိတဲ့ ဆော်ဒီ ရေယာဉ်တွေကို လက်တုံ့ပြန် ပစ်ခတ်နေပါတယ်။
ဟိုသီတွေရဲ့ ဒရုန်းတစ်စီးဟာ မက္ကာမြို့ဆီ ဦးတည် ပျံသန်းလာတာကြောင့် ကြားဖြတ် ပစ်ချခဲ့ရကြောင်း ဆော်ဒီက စက်တင်ဘာ ၁၆ ရက်နေ့မှာ ထုတ်ပြန်ပါတယ်။ မက္ကာဟာ နှစ်စဉ် ကမ္ဘာတဝှမ်းက မွတ်ဆလင် ဝတ်ပြုသူ သန်းနဲ့ချီ သွားရောက်လေ့ရှိတဲ့ ဘာသာရေး အထွဋ်အမြတ် နယ်မြေလည်း ဖြစ်ပါတယ်။
Public Service Announcement
ဆော်ဒီဖက်က စွပ်စွဲချက် ထွက်ပေါ်လာပြီး မကြာခင်မှာပဲ ဟိုသီတွေကလည်း မက္ကာကို ပစ်မှတ်ထားခဲ့တယ်ဆိုတာ လုံးဝ မဟုတ်ကြောင်း တုံ့ပြန်ခဲ့ပါတယ်။ ဟိုသီက မက္ကာကို တိုက်ခိုက်တယ်ဆိုတဲ့ မုသားစကားမျိုးကို ဆော်ဒီဟာ အရင်ကလည်း သုံးခဲ့ဖူးကြောင်း၊ ဒီလို မဟုတ်မမှန် စွပ်စွဲချက်မျိုးနဲ့ ဘယ်သူ့ကိုမှ အရူးထပ်လုပ်လို့ မရကြောင်း ဟိုသီ ပေါ်လစ်ဗျူရို အဖွဲ့ဝင် ဟာဇမ် အယ်လ် အာဆတ်က လူမှုကွန်ရက် မီဒီယာ Xမှာ ရေးသားခဲ့ပါတယ်။
ဆော်ဒီဦးဆောင်တဲ့ အာရပ်မဟာမိတ် အဖွဲ့ကတော့ ဟိုသီတွေ အနေနဲ့ ကျော်လို့မရတဲ့စည်း (red line)တွေ ရှိတာကို နားလည်ဖို့လိုကြောင်း၊ အခုကိစ္စအတွက်လည်း ကျိန်းသေပေါက် လက်စားချေမှာဖြစ်ကြောင်း ထုတ်ပြန်ထားပါတယ်။
မက္ကာကို ပစ်မှတ်ထားတယ် ဆိုတာဟာ ဆိုးယုတ်လှတဲ့ တိုက်ခိုက်မှု တစ်ခုလို့ အဖွဲ့ဝင် ၅၇ နိုင်ငံ ပါဝင်တဲ့ အစ္စလာမ်မစ် ပူးပေါင်းဆောင်ရွက်ရေးအဖွဲ့ (OIC)ကလည်း ထုတ်ပြန်ခဲ့ပါတယ်။
ဆော်ဒီဟာ မက္ကာမြို့နဲ့ နိုင်ငံတောင်ပိုင်း ဒေသတွေမှာ တိုက်ခိုက်မှုတွေ ကြုံလာနိုင်ခြေ သတိပေးချက်တွေကို ထုတ်ပြန်ခဲ့ပြီး မကြာခင်မှာ ပြန်ရုပ်သိမ်းခဲ့ပါတယ်။ မက္ကာမှာတော့ အခုလို ကြေညာချက် ထုတ်ပြန်တာဟာ အီရန်စစ်ပွဲ စတင်တဲ့နေ့ နောက်ပိုင်း ပထမဆုံးအကြိမ် ဖြစ်ပါတယ်။
စက်တင်ဘာ ၁၄ ရက်နေ့တုန်းကတော့ ယီမင်ဖက်ကနေ ပစ်ခတ်လိုက်တဲ့ ဒုံးကျည်တွေ ကျရောက် ပေါက်ကွဲတာကြောင့် ဆော်ဒီတောင်ပိုင်းမှာ လူ ၁၃ ဦးထက်မနည်း ဒဏ်ရာရခဲ့ကြောင်း သိရပါတယ်။
ကိုးကား: AFP
