မန္တလေးမြို့က လူမဲ့သပိတ်လာရောက်ရှင်းလင်းစဥ် ပေါက်ကွဲမှုဖြစ်၊ စစ်ကောင်စီတပ်သားနှစ်ဦး ဒဏ်ရာရ

မန္တလေးမြို့တွင် နှစ်သစ်ကြိုဆိုသည့်အနေဖြင့် ပြုလုပ်သည့် လူမဲ့သပိတ်ကို အကြမ်းဖက်စစ်ကောင်စီတပ်များက လာရောက်ရှင်းလင်းရာ ပေါက်ကွဲမှုဖြစ်ပွားပြီး နှစ်ဦးထိခိုက်ဒဏ်ရာရခဲ့ကြောင်း N G U: FF – Mandalay ပြည်သူ့ကာကွယ်ရေးတပ်ဖွဲ့က ထုတ်ပြန်သည်။

မန္တလေးမြို့ (၃၈) အောင်ဆန်းစုကြည်လမ်းနှင့် (၇၄)လမ်းထောင့်၌ ပုလင်းများ၊ စက္ကူပုံးများထား၍ အဆိုပါ လူမဲ့သပိတ်ကို ပြုလုပ်ခဲ့ခြင်း ဖြစ်သည်။

အဆိုပါလူမဲ့သပိတ် ပြုလုပ်ထားသည့် (၃၈)လမ်းနှင့် (၇၃)လမ်းမှ (၇၆)အထိ လမ်းများအား စစ်ကောင်စီတပ်က ကားများဖြင့် ပိတ်ဆို့၍ ဖယ်ရှားရှင်းလင်းရန် ကြိုးစားခဲ့သည်။

စစ်ကောင်စီဝင်များသည် လူမဲ့သပိတ်အား ဒိုင်းကာများကိုင်ဆောင်ပြီး ဒုတ်ဖြင့် ထိုး၍ ရှင်းလင်းစဥ် မိုင်းပေါက်ကွဲခဲ့ကာ စစ်ကောင်စီတပ်သား နှစ်ဦး ထိခိုက်ဒဏ်ရာရခဲ့ကြောင်း N G U: FF – Mandalay က ထုတ်ပြန်သည်။

Public Service Announcement

ယင်းလူမဲ့သပိတ်တွင် “ပြည်သူများ(လုံးဝ)မထိရ” စာတန်းပါ Danger Sign သတိပေး စာသားများအပြင် PDFအလံတော်၏ ဘေး၌ ” စခ ရခ ဘယ်ကောင်သေရဲလဲ” ဟူသော စာသားများကိုတွေ့ရသည်။ ထို့အပြင် ”ငါတို့ အမဲလိုက်မယ့် အလှည့်ရောက်ပြီ”၊ ”သွေးကြွေးမှာဆွေးနွေးစရာမရှိ”၊ ”ဘယ်တော့မှ သွေးမကွဲမယ့် NUG PDF &UG” အစရှိသော စာသားပါဆိုင်းဘုတ်ငယ်များကိုလည်း တွေ့ရသည်။