Wave Money ရှယ်ယာများကို တယ်လီ​နောက ရိုးမထံ ​ရောင်းချ

နော်ဝေဆက်သွယ်ရေးအော်ပရေတာဖြစ်သည့် တယ်လီနောက မြန်မာနိုင်ငံတွင် အကြီးဆုံးမိုဘိုင်းငွေပေးချေမှုဝန်ဆောင်မှုတစ်ခုဖြစ်သည့် Wave Money၏ ရှယ်ယာများကို စင်ကာပူနိုင်ငံစာရင်းဝင် Yoma Strategic Holdingsထံ ရောင်းချရန် သဘောတူညီခဲ့သည်ဟု Nikkei Asia သတင်းဌာနက ဖော်ပြသည်။

မြန်မာနိုင်ငံတွင် စစ်တပ်အာဏာသိမ်းပြီးနောက် ငွေကြေးဝန်ဆောင်မှု​ပေးသူများအား စစ်ဖက်ဆိုင်ရာထောက်လှန်းရေးများက အလွန်အကျူးစောင့်ကြည့်နေမှုများကို စိုးရိမ်သောကြောင့် ဖြစ်သည်ဟုလည်း ဆိုထားသည်။

တယ်လီနောက ၎င်းတို့ပိုင်ဆိုင်သည့် Wave Money ၏ ရှယ်ယာ၅၁ ရာခိုင်နှုန်းကိုကို ဒေါ်လာ၁၀၄ သန်းဖြင့်ရောင်းချခဲ့ပြီး မကြာမီရက်ပိုင်းအတွင်း အပြီး သတ်ရန် စီစဉ်ထားသည်။

Yoma Strategic Holdings ကလည်း Wave Money၏ အဓိက ရှယ်ယာတစ်ဦးလည်းဖြစ်သည်။

Public Service Announcement

စစ်တပ်အာဏာသိမ်းပြီးနောက်ပိုင်း မြန်မာနိုင်ငံတွင် Wave Moneyလုပ်ငန်းတွင် ရင်းနှီးမြှပ်နှံမူများနှင့် သုံးဆွဲသူများကြား ယုံကြည်မှုပြိုလဲသွားခဲ့ရသည်ဟု ဂျပန်သတင်းစာက ဆိုထားသည်။ သုံးဆွဲသူများအတွက် ဝန်ဆောင်မှုများကိုလည်း အကြီးအကျယ် စောင့်ကြည့်ခံနေရသည်ဟုလည်း ဆိုသည်။

ထိုရောင်းချမှုပြီးစီးပါက ဦးသိမ်းဝေပိုင်ဆိုင်ထားသည့် Yoma ကုမ္ပဏီအုပ်စုသည် Wave Money၏ ရှယ်ယာ ၇၅ ရာခိုင်နှုန်းကို ပိုင်ဆိုင်လာမည်ဖြစ်သည်။ ကျန် ၂၅ ရာခိုင်နှုန်းကလည်း Yoma ကုမ္ပဏီအုပ်စုက ရှယ်ယာပိုင်သည့် လုပ်ငန်းများက ပိုင်ဆိုင်ထားခြင်းဖြစ်သည်။

အဆိုပါရောင်းချမှုကို ၂၀၂၀နှစ်လယ်ကတည်းကပင် သဘောတူညီမူရရှိခဲ့ထားခြင်းဖြစ်သည်ဟုလည်းဆိုပြီး တယ်လီနောဘက်က အသေးစိတ်ထုတ်ပြန်ထားခြင်းမရှိသေးပေ။

Wave Moneyသည် ဘေလ်ပေးချေမှုများ၊ ပြည်တွင်းငွေလွှဲမှုများနှင့် Wave Pay မှတစ်ဆင့် ကောင်တာမှ ငွေလွှဲခြင်းဝန်ဆောင်မှုများကို ဆောင်ရွက်ပေး​နေခြင်းဖြစ်သည်။

Wave Money တွင် တစ်လလျှင်ငွေလွှဲပြောင်းမူ အကြိမ်ရေ တစ်သန်းမှ ၁ ဒသမ ၂ သန်းရှိပြီး စစ်တပ်အာဏာသိမ်းမူကြောင့် သုံးဆွဲသူ ၂ သန်းခန့်လျော့ ကျသွားခဲ့သည်ဟု ဆိုထားသည်။ ထိုပမာဏသည် Wave Money အက်ပလီကေးရှင်းသုံးဆွဲသူ တစ် ဝက်နီးပါးရှိသည်ဟု ဆိုသည်။

တယ်လီနောက မြန်မာနိုင်ငံရှိ ဆက်သွယ်ရေးအော်ပရေတာ ကွန်ယက်ကို လက်ဘနွန်အခြေစိုက် စီးပွားရေးလုပ်ငန်းစု M1 Groupကို ဒေါ်လာသန်း ၁၀၅ဖြင့်ရောင်းချရန် စီစဉ်နေခြင်းဖြစ်သည်။