DKBA ရဲ့ ဗိုလ်မှူးစောစလုံးစခန်းကို စစ်ကောင်စီနဲ့ BGF တပ်ဖွဲ့ပူးပေါင်းကာ တိုက်ခိုက်နေပြီး စခန်းကနေ နောက်မဆုတ်ဘဲ ပြတ်ပြတ်သားသားရင်ဆိုင်မယ်လို့ ဗိုလ်မှူးစောစလုံးက ပြောလိုက်ပါတယ်။
မြဝတီမြို့နယ် ၊ဖလူးလေးကျေးရွာအနီးမှာရှိတဲ့ ဗိုလ်မှူးစောစလုံး စခန်းကိုမနေ့က နဲ့ ဒီနေ့မှာ တိုက်ခိုက်မှုတွေလုပ်လာတာပါ။
“မနေ့လည်းဖြစ်တယ် ညလည်းဖြစ်တယ် ၊ အခုလည်းပြန်တက်လာပြန်ပြီ အဲ့ဒီကောင်တွေ BGFနဲ့ ပူးပေါင်းပြီးတော့ စခန်းကိုလာတိုက်တယ်။ ကျွန်တော်တို့ကတော့ ပြောချင်တာကတော့ ကျနော်တို့ပြေးဖို့နယ်မြေလည်းမရှိတော့ဘူး၊ သူတို့နဲ့အကောင်းနဲ့ပဲရင်ဆိုင်တယ်” လို့ ဗိုလ်မှူးစောစလုံးက ပြောပါတယ်။
တိုက်ခိုက်မှုတွေမှာ DKBA က အထိအခိုက်အကျအဆုံးမရှိဘူးလို့လည်းသိရပါတယ်။
Public Service Announcement
စစ်ကောင်စီဘက်ကတော့ လက်နက်ကြီးနဲ့ပစ်ခတ်တာမျိုးလုပ်လာပြီး လက်နက်ကြီးကျည်ဟာ အနားပတ်ဝန်းကျင် မှာရှိတဲ့ ရွာထဲကနေအိမ်တွေပေါ် ကျတာမျိုးတွေရှိနေတယ်လို့ ဗိုလ်မှူးစောစလုံးက ပြောပါတယ်။
ဗိုလ်မှူးစောစလုံးစခန်းအနေနဲ့ ဒီလိုကျုးကျော်တိုက်ခိုက်လာတာကို နောက်မဆုတ်ဘဲ ပြန်လည်ခုခံတွန်းလှန်သွားတယ်လို့လည်း သိရပါတယ်။
