မကွေးတိုင်း၊ ပခုက္ကူခရိုင်၊ မြိုင်မြို့နယ်တွင် ကျေးရွာနှစ်ရွာကို အကြမ်းဖက်စစ်ကောင်စီတပ်က မီးရှို့ဖျက်ဆီးခဲ့ရာ နေအိမ်အများအပြားမီးလောင်ပျက်စီးဆုံးရှုံးခဲ့ကြောင်း
နွေဦးတော်လှန်ရေး-မြိုင်က သတင်းထုတ်ပြန်သည်။
ယနေ့(ဇန်နဝါရီလ ၁၆ရက်) နံနက် ၉ နာရီဝန်းကျင်က မြိုင်မြို့နယ်အနောက်ပိုင်းရှိ သဒွတ်ကျေးရွာအား အကြမ်းဖက်စစ်ကောင်စီတပ်များက ဝင်ရောက်မီးရှို့ဖျက်ဆီးခဲ့ရာ နေအိမ် ၂၅လုံး ပျက်စီးဆုံးရှုံးခဲ့ရကြောင်း နွေဦးတော်လှန်ရေး-မြိုင်က အသိပေးသည်။
အလားတူ မြိုင်နယ်အနောက်ပိုင်း ညောင်ပင်လယ်ကျေးရွာကိုလည်း ယနေ့နံနက် ၁၁နာရီဝန်းကျင်တွင် ဝင်ရောက်မီးရှို့ဖျက်ဆီးခဲ့သည်ဟုအသိပေးထားပြီးပျက်စီးဆုံးရှူံးမှုအခြေအနေမသိရသေးပါ။
အကြမ်းဖက်စစ်တပ်သည် သဒွတ်ရွာအတွင်းသို့ ဇန်နဝါရီလ ၁၅ ရက်နေ့ ညနေပိုင်းကစ၍ စစ်ခရွာအတွင်းဝင်ပြီး ရှာဖွေမွှေနှောက်ဖျက်ဆီးခဲ့ပြီးယနေ့နံနက်ပိုင်းတွင် ကျေးရွာရှိနေအိမ်များကိ မီးရှို့ဖျက်ဆီးခဲ့ခြင်းဖြစ်ကြောင်း၊ ကျေးရွာက ပြည်သူများ တိမ်းရှောင်နေရကြောင်း ဒေသခံများက ပြောသည်။
Public Service Announcement
ဇန်နဝါရီလ ၁၄ ရက်နေ့ကလည်း မြိုင်မြို့နယ် ဇီးဖြူစားကောင်းကျေးရွာအတွင်းသို့ စစ်ကောင်စီတပ်များဝင်ရောက်လာပြီး နေအိမ်အချို့အား ဖျက်ဆီးသွားခဲ့သေးသည်။
အကြမ်းဖက်စစ်ကောင်စီတပ်သားများသည် ဇန်နဝါရီလ ၉ရက်နေ့မှ စတင်ကာ မြိုင်မြို့နယ်နေရာအနှံ့အပြားအား အင်အားအများအပြားသုံး၍ ကျေးရွာများအား ဝင်ရောက်ကာ ရှာဖွေဖမ်းဆီးခြင်း၊ လုယူခြင်း၊ မီးရှို့ဖျက်ဆီးခြင်း၊ လက်နက်ကြီးဖြင့် ပစ်ခတ်ခြင်းများ ပြုလုပ်နေသည်။
အကြမ်းဖက်စစ်ကောင်စီ၏ အန္တရာယ်ကြောင့် မြိုင်နယ်အနောက်ပိုင်းနှင့် မြောက်ပိုင်းရှိ ကျေးရွာအများစုမှ ပြည်သူထောင်ကျော်ဟာ ဘေးလွတ်ရွာ ကျေးရွာများ၊ တောတောင်များတွင်းသို့ ထွက်ပြေးတိမ်းရှောင်နေရကြောင်း ဒေသခံများက ပြောသည်။
