ရွှေကူမြို့နယ်ရှိ မြို့လှ PDFတပ်၏ နယ်မြေအတွင်းဝင်ရောက်လာသည့် အကြမ်းဖက်စစ်ကောင်စီတပ်ကို မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၁၀ဦးထက်မနည်းသေဆုံးကြောင်း မြို့လှ PDFက ထုတ်ပြန်သည်။
ယနေ့(ဇန်နဝါရီ ၁၉ ရက်) နံနက် ၈ နာရီခွဲခန့်က ထိတွေ့တိုက်ပွဲ စတင်ဖြစ်ပွားခဲ့ကာ အင်အား ၆၀ခန့်ရှိသော စစ်ကောင်စီတပ်သည် ရွှေငြိမ်းချမ်းရွာမှတဆင့် ကျောက်ကြီးရွာဖက်သို့ဦးတည်ကာ ခြေလျှင်စစ်ကြောင်းထိုးခဲ့သည်။
ကျောက်ကြီးရွာမရောက်မီ လွင်ယားဒေသအနီး၌ မြို့လှ PDF တပ်မှ ဗိုလ်မိုဃ်းကြိုးဦးဆောင်ကာ မိုင်း ၁၆လုံးဖြင့် မိုင်းဆွဲတိုက်ခိုက်ခဲ့သည်။
တိုက်ပွဲကြာချိန် ၄၅ မိနစ်ခန့်ရှိပြီး စစ်ကောင်စီဘက်မှ ၁၀ ဦးထက်မနည်းသေကာအမြောက်အများ ဒဏ်ရာရခဲ့ပြီး မြို့လှ PDF တပ်ဖွဲ့များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း အသိပေးသည်။
Public Service Announcement
ဇန်နဝါရီ ၁၇ ရက်ကလည်း မြို့လှ မြို့ နယ်မြေ အတွင်း ခြေလျင်စစ်ကြောင်းထိုးလာသည့် အကြမ်းဖက်စစ်ကောင်စီတပ်နှင့် တိုက်ပွဲဖြစ်ရာ အကြမ်းဖက်စစ်ကောင်စီတပ်သား ၁၅ထက် မနည်းသေဆုံးကြောင်း မြို့လှ PDF က ယနေ့ထုတ် ပြန်ထားသည်။
ယခုလဆန်းပိုင်းကစ၍ ကချင် နှင့်စစ်ကိုင်းအထက်ပိုင်းတွင် အင်အားဖြည့်တင်နေသော အကြမ်းဖက်စစ်ကောင်စီတပ်ကို မြို့လှ PDF က အကြိမ်ကြိမ် ဆီးကြိုတိုက်ခိုက်ခဲ့သည်။
မြို့လှ PDF ၏ ယခုလအတွင်းထုတ်ပြန်ချက်များအရ အကြမ်းဖက်စစ်ကောင်စီတပ်နှင့် ထိတွေ့တိုက်ပွဲ ၈ ကြိမ်ခန့်ရှိခဲ့ကာ စစ်ကောင်စီတပ်သား ၁၀၀ ခန့်သေဆုံးထားသည်။
