မတူပီ-မင်းတပ်လမ်းပိုင်း မိုင်တိုင် ၈၀ တွင် အာဏာသိမ်းစစ်ကောင်စီယာဉ်တန်းကို ယမန့်(ဇန်နဝါရီ ၂၆) ကမနက်၉နာရီက တိုက်ခိုက်ရာ၌ အကြမ်းဖက်စစ်ကောင်စီတပ်သား ၅ ဦးသေဆုံးပြီး ၁၀ ဦး ဒဏ်ရာရရှိခဲ့သည်ဟု ချင်းပြည်ကာကွယ်ရေးတပ်ဖွဲ့-CDF(မတူပီ)က သတင်းထုတ်ပြန်သည်။
ထိုတိုက်ခိုက်မူတွင်စစ်ကောင်စီတပ်က လက်နက်ကြီးများဖြင့် အနီးအနားရှိ ကျေးရွာများကို ရမ်းသမ်းပစ်ခတ်ခဲ့ကြောင်းလည်းထုတ်ပြန်ချက်တွင်ပါရှိသည်။
ထိုသို့ ပစ်ခတ်မူကြောင့် ကျေးရွာနေပြည်သူများနှင့် CDFဘက်မှ အထိအခိုက်အကျအဆုံးမရှိခဲ့ကြောင်းနှင့်စစ်ကောင်စီယာဉ်တန်းသည် မင်းတပ်နယ်ထဲကို ရောက်ရှိသွားပြီဖြစ်ကြောင်းဆက်လက်ဖော်ပြထားသည်။
ထိုအပြင် CDF(မတူပီ)နှင့် ချင်းအမျိုးသားတပ်ဦးတို့ကယမန့်နေ ညနေ ၄ နာရီတွင် စစ်ကောင်စီအခြေစိုက် ခမရ ၃၀၄ တပ်ရင်းကို ဝင်ရောက်ပစ်ခတ်ရာတွင် စစ်ကောင်စီတပ်သား ၈ ဦးသေဆုံးပြီး ၁၀ ဦးထက်မနည်း ဒဏ်ရာရရှိခဲ့သည်ဟုလည်း ထုတ်ပြန်ထားသည်။
Public Service Announcement
ထိုအတူ ဇန်နဝါရီ ၂၄ ရက်တွင် မတူပီ-မင်းတပ်လမ်းမ ချန်ပြန်းရွာဟောင်းအနီးတွင် မတူပီမှ စစ်ကြောင်းထွက်လာသောအကြမ်းဖက်စစ်ကောင်စီတပ်များကို ပစ်ခတ်တိုက်ခိုက်ရာတွင်လည်း အကြမ်းဖက်စစ်ကောင်စီတပ်သား ၁ ဦးသေဆုံးပြီး ၃ ဦးဒဏ်ရာရရှိခဲ့သည်ဟုလည်းဖော်ပြထားသည်။ ထိုတိုက်ပွဲများတွင် ဒေသခံကာကွယ်ရေးတပ်များဘက်မှ အထိအခိုက်အကျအဆုံးမရှိခဲ့ကြောင်း CDF(မတူပီ)က သတင်းထုတ်ပြန်ထားသည်။ ဇန်နဝါရီ ၃ ရက်တွင်လည်း မတူပီ-ပလက်ဝ လမ်းမပေါ်ရှိ စစ်ကောင်စီ တပ်စွဲထားသော ထယ်ဘွေးတပ်စခန်းကို CDF(မတူပီ)က ဝင်ရောက်တိုက်ခိုက်ခဲ့ပြီးနောက်စစ်ကောင်စီနှင့် CDF(မတူပီ) တို့ကြား တိုက်ပွဲများ ပြင်းထန်လာခြင်းဖြစ်သည်။
၂၀၂၁ခုနှစ်တွင်း အကြမ်းဖက်စစ်ကောင်စီ နှင့် CDF(မတူပီ)တို့ကြား တိုက်ပွဲ ၇ ကြိမ်ဖြစ်ပွားခဲ့သည်ဟု Chinland Joint Defense Committeeက ထုတ်ပြန်ထားသည်။
