စစ်အာဏာရှင်ကို ဆန့်ကျင်ကြောင်း ပြသသည့်အနေဖြင့် စစ်ကောင်စီထောက်တိုင်များအား နေရာလေးနေရာတွင် တိုက်ခိုက်ခဲ့ကြောင်း အာဏာသိမ်းဆန့်ကျင်ရေးနှင့်ပြည်သူ့လွတ်မြောက်ရေးအဖွဲ့(ACPLF)က ယနေ့(ဖေဖော်ဝါရီ ၁) အသိပေးထုတ်ပြန်သည်။
တိုက်ခိုက်မှုများကို ဥက္ကံမြို့နယ်တွင် နှစ်ကြိမ်၊ ဒဂုံမြို့သစ်တောင်ပိုင်းတွင် တစ်ကြိမ်နှင့် တောင်မြောက်လမ်းဆုံ အနီးတွင် တစ်ကြိမ် အသီးသီးပြုလုပ်ခဲ့ကြောင်း ထုတ်ပြန်ချက်တွင် ဖော်ပြသည်။
ယနေ့နံနက်ပိုင်းက ဥက္ကမြို့တွင် စစ်ကောင်စီက ကျင်းပသည့် ပျော်ပွဲရွှင်ပွဲနေရာအနီး လုံခြုံရေးချထားသည့် နေရာနှင့် အဆိုပါပွဲသို့လာသော နယ်မြေခံတပ်မှူးစီးနင်းလာသည့်ကားအား ရန်ကုန်-ပြည်လမ်း ကံကုန်းကျေးရွာ အနီး ဖောက်ခွဲတိုက်ခိုက်ခဲ့သည်ဟု ထုတ်ပြန်ချက်က ဆိုသည်။
စစ်ကောင်စီနယ်မြေခံတပ်မှူးစီးသည့်ကားအား ဖောက်ခွဲတိုက်ခိုက်ရာတွင် လမ်းသွားလမ်းလာပြည်သူများ ရောနှောပါနေသဖြင့် အရပ်သားများကို ငဲ့ညှာရင်း ထိရောက်စွာ မတိုက်ခိုက်နိုင်ခဲ့ကြောင်း ACPLF က ဆိုသည်။
Public Service Announcement
“ဥက္ကံမြို့မှပြည်သူများအနေဖြင့် စစ်ကောင်စီတပ်ဖွဲ့ဝင်စခန်းချရာနေရာများ၊ စီးနင်းအသုံးပြုသည့် ယာဥ်များနှင့်ဝေးဝေးနေရန်အထူးမေတ္တာ ရပ်ခံလိုပါသည်”ဟု ACPLF က မေတ္တာရပ်ခံသည်။
ထို့အပြင် ဒဂုံမြို့သစ်တောင်ပိုင်းတိုက်ခိုက်မှုတွင် မြို့နယ်စည်ပင်ရုံးကို နံနက် ၉ နာရီခွဲခန့်တွင်လည်းကောင်း၊ တောင်မြောက်လမ်းဆုံရှိ ရဲလိုင်းခန်းအနီးတိုက်ခိုက်မှုကို ယနေ့ညနေ ၄ နာရီခန့်တွင်လည်းကောင်း အသီးသီးတိုက်ခိုက်ခဲ့ကြောင်း ထုတ်ပြန်ချက်တွင် ဖော်ပြသည်။
အထက်ပါတိုက်ခိုက်မှုများအတွင်း စစ်ကောင်စီဘက်မှ ထိခိုက်မှုများရှိခဲ့ပြီး သေဆုံးမှုရှိ၊မရှိ မသိရသေးဟု ACPLF က ထုတ်ပြန်ထားသည်။
(ယနေ့တွင် ရန်ကုန်မြို့နေသူများအပါအဝင် တစ်နိုင်ငံလုံးရှိ ပြည်သူများက အာဏာရှင်ကို ဆန့်ကျင်ကြောင်း ပြသသည့်အနေဖြင့် အသံတိတ်သပိတ်ဆင်နွှဲနေသည်ကို တွေ့ရစဥ်၊ ဓာတ်ပုံ – PS)
