ဖားကန့်တွင် ယနေ့နံနက်ပြုလုပ်သည့် စစ်အာဏာရှင်ဆန့်ကျင်ရေးလူထုသပိတ်စစ်ကြောင်းကို အရပ်ဝတ် ဝတ်ထားသောစစ်ကောင်စီတပ်သားအချို့က အိမ်စီးကားတစ်စီးပေါ်မှ သေနတ်ဖြင့်ပစ်ခတ်၍ထွက်ပြေးသွားသည်။
“မနက်ဆယ်နာရီလောက်မှာ လာပစ်တာ။ မိုးပေါ်ကို ထောင်ပစ်သွားလားမသိဘူး။ တစ်ယောက်မှဒဏ်ရာမရဘူး။ ဒီကောင်တွေအထက်က ခိုင်းလို့သာ လာပစ်သွားတာနေမယ်။ပစ်ပြီးထွက်ပြေးတာ တန်းနေတာပဲ”ဟု ဒေသခံတစ်ဦးကပြောသည်။
စစ်ကောင်စီ၏ ပစ်ခတ်မှုကြောင့် တစ်ဦးမျှ ထိခိုက်မှုမရှိခဲ့ပေ။ ဖားကန်မြို့သပိတ်စစ်ကြောင်းသည် ယနေ့တွင် လုံခင်းကျေးရွာမှ ကချင်ရပ်ကွက်တစ်ခုတွင် စစ်အာဏာရှင်ဆန့်ကျင်ရေးလူထုသပိတ် ပြုလုပ်ခြင်းဖြစ်သည်။
” သပိတ်ကို လာတားချင်တာလားမသိဘူး။ သူတို့က အဲ့လိုခြောက်ပေမယ့် သပိတ်က မရပ်ဘူး။ နောက်ရပ်ကွက်တစ်ခုမှာပြောင်းပြီးလုပ်ခဲ့တယ်” ဟု အခြားဒေသခံတစ်ဦးကလည်းပြောသည်။
Public Service Announcement
ဖားကန့်သည် စစ်အာဏာရှင်ဆန့်ကျင်ရေး လူထုသပိတ်ကိုနေ့စဥ်ပြုလုပ်နေခြင်းဖြစ်သည်။
အသံတိတ်သပိတ်ပြုလုပ်သည့် ဖေဖော်ဝါရီ ၁ ရက်ကလည်း ဖားကန့်တွင် တစ်ရက်တည်း ပေါက်ကွဲမှု ငါး ကြိမ်ဖြစ်ခဲ့သည်။ ပေါက်ကွဲမှုများသည် စစ်ကောင်စီလက်အောက်ခံ ရုံးဌာနများအနီးတွင် ဖြစ်ခဲ့ပြီးဖားကန့်မြို့နယ် ထွေအုပ်ရုံးပေါက်ကွဲမှုတွင် ကားတစ်စီးပျက်စီးခဲ့သည်။ စစ်တပ်အာဏာသိမ်းပြီးနောက်ပိုင်း ဖားကန့်တွင် အကြမ်းဖက်စစ်ကောင်စီတပ်နှင့် ကချင်လွတ်လပ်ရေးတပ်မတော် (KIA) တို့ကြား တိုက်ပွဲများမကြာခဏ ဖြစ်ပွားနေသည်။
