ကရင်အမျိုးသားအစည်းအရုံး(KNU) တပ်မဟာ(၄)နယ်မြေ တနင်္သာရီတိုင်း ပုလောမြို့နယ် အတွင်း စစ်ကောင်စီတပ်စွဲထားသည့်နေရာကို KNUနှင့် ပြည်သူ့ကာကွယ်ရေးတပ်(PDF) များ ပူးပေါင်းတိုက်ခိုက်ခဲ့ရာ စစ်ကောင်စီတပ်မှ ၅ဦးထက်မနည်းသေဆုံးပြီး နှစ်ကြိမ်တိုင်ဆုတ်ပြေးခဲ့သည်ဟု ပုလော PDF က ထုတ်ပြန်သည်။
ပုလောမြို့နယ် ဆားခဲရွာ ဝန်းကျင်၌ တပ်စွဲထားသည့် စစ်ကောင်စီတပ်ကို KNU/PPDF၊ PRDF မဟာမိတ်ပူးပေါင်းတပ်များက ယနေ့ ဖေဖော်ဝါရီ ၃ရက် နံနက်ပိုင်းတွင် ၂ကြိမ်တိုက်ခိုက်ခဲ့သည်ဟုပါရှိသည်။
တိုက်ခိုက်မှု ၂ကြိမ်လုံးတွင် စစ်ကောင်စီတပ်မှ ထိခိုက်မှုရှိခဲ့ပြီး ၅ဦးထက်မနည်း သေဆုံးနိုင်ကာ နှစ်ကြိမ်စလုံးဆုတ်ပြေးကြောင်း၊ မဟာမိတ်ပူးပေါင်းတပ်မှ ထိခိုက်မှုမရှိကြောင်း ဖော်ပြသည်။ ဆုတ်ပြေးသောစစ်ကောင်စီတပ်မှ လက်နက်ခဲယမ်းနှင့်အသုံးအဆောင်အချို့ကိုလည်း သိမ်းပိုက်နိုင်ခဲ့ကြောင်းလည်းပါရှိသည်။
“ပထမအကြိမ် သူတို့ဘက်က ဆုတ်သွားတယ်။ ပြောမယ်ဆို နေရာရွှေ့တာပေါ့။ ရွေ့တဲ့နေရာ ထပ်တိုက်တော့ ထပ်ဆုတ်သွားတယ်”ဟု ပုလော PDF မှ ရဲဘော်တစ်ဦးက လူထုနွေဦးသို့ ပြောသည်။
Public Service Announcement
လက်ရှိတွင် စစ်ကောင်စီတပ်က အခြားနေရာ ရွှေ့သွား သော်လည်း ဒေသတွင်း စစ်ရှိန်မြင့်လာနိုင်သည့် အခြေအနေရှိသည်ဟု ပုလော PDF တာဝန်ရှိသူတစ်ဦးက လည်းပြောသည်။
“လက်ရှိကတော့ ငြိမ်နေတယ်။ ဒါပေမဲ့ သူတို့ဘက်က အင်အားတွေထပ်ဖြည့်နေတယ်” ဟု အဆိုပါတာဝန်ရှိသူတစ်ဦးက ပြောသည်။
တိုက်ခိုက်ခံရမှုအခြေအနေများကြောင့် ပုလောမြို့နယ်အတွင်း စစ်ကောင်စီတပ်မှ အင်အားဖြည့်တင်းလာမည့်အခြေအနေရှိနေပြီး အချိန်မရွေး တိုက်ပွဲများဖြစ်ပွားလာနိုင်ကြောင်း ပြည်သူ့ကာကွယ်ရေးတပ်မတော်(ပုလောမြို့နယ်)က အသိပေးထုတ်ပြန်ထားသည်။
KNUတပ်မဟာ(၄)နှင့် PDFများသည် ယခင်ကလည်းပုလောဒေသ၌ စစ်ကောင်စီတပ်ကိုခုခံတိုက်ခိုက်မှု အချို့လုပ်ဆောင်ခဲ့ကြောင်း အဆိုပါ တာဝန်ရှိသူက ပြောသည်။
