အမိမြေ လွတ်လပ်ရေးအတွက် ရွပ်ရွပ်ချွံချွံ ခုခံနေသူ အားလုံးအတွက် ဂုဏ်ယူမိကြောင်း ကမ္ဘာကျော် လက်ဝှေ့သမားတွေ ဖြစ်ကြတဲ့ ကလစ်ရှ်ကို ညီနောင်က ပြောကြားခဲ့ပါတယ်။
ယူကရိန်း နိုင်ငံသားတွေ ဖြစ်ကြတဲ့ ဗစ်တာလီ ကလစ်ရှ်ကိုနဲ့ ဝလာဒီမာ ကလစ်ရှ်ကိုတို့ နှစ်ဦးဟာ ရုရှားရဲ့ ကျူးကျော်မှုကို လက်နက်ကိုင် တွန်းလှန်သွားမယ်လို့ ကြေညာသွားပြီး အခုအခါ ကိယက်ဗ်မြို့ကို ရောက်ရှိနေပါတယ်။ ဗစ်တာလီက မြို့ထဲမှာ ကျန်နေတဲ့ ပြည်သူ အများအပြားဟာ ယူကရိန်း စစ်တပ်ဆီက လက်နက်တွေ ထုတ်ယူဖို့ လူတန်း အရှည်ကြီး တန်းစီပြီး စိတ်ရှည်လက်ရှည် စောင့်နေကြတာ တွေ့ခဲ့ကြောင်း BBCနဲ့ အင်တာဗျူးမှာ ပြောပါတယ်။
ယူကရိန်း ပြည်သူတွေရဲ့ မျိုးချစ်စိတ် ထက်သန်မှုက သူ့ကို အံ့အားသင့်စေခဲ့တယ်လို့ ဝလာဒီမာကလည်း ဝန်ခံပါတယ်။ ဆရာဝန်ကအစ၊ ရုပ်ရှင်သရုပ်ဆောင်အဆုံး လူတန်းစား ပေါင်းစုံဟာ လက်နက်ကိုင် ခုခံဖို့ စိုင်းပြင်းနေကြပြီး ဒီလို ပြည်သူတွေအတွက် သိပ်ကို ဂုဏ်ယူနေမိကြောင်း ကလစ်ချ်ကို ညီအစ်ကို နှစ်ယောက်က ဆိုပါတယ်။
ကိယက်ဗ်မှာ တိုက်ပွဲတွေ ပိုပြင်းထန်လာရင်ရော သူတို့နှစ်ယောက် ဆက်ရှိနေမှာလားလို့ BBCက မေးတဲ့အခါ ယူကရိန်းဟာ သူတို့ရဲ့ အိမ်ဖြစ်ကြောင်း၊ သူတို့မိဘတွေကို ဒီနေရာမှာ မြေချခဲ့ကြောင်း၊ သူတို့ သားသမီးတွေက ဒီနေရာမှာ ကျောင်းတက်ခဲ့ကြောင်း၊ ဒီလို နေရာမျိုးကို စွန့်ခွာ ထွက်ပြေးစရာ ဘာအကြောင်းမှ မရှိကြောင်း ဖြေကြားခဲ့ကြပါတယ်။
Public Service Announcement
ဝလာဒီမာက နိုင်ငံတကာ အသိုက်အဝန်း အနေနဲ့ ယူကရိန်းကို ပိုမို အားထည့်ပြီး အကူအညီတွေ ပေးကြဖို့လည်း တိုက်တွန်းခဲ့ပါသေးတယ်။ လောလောဆယ် ယူကရိန်းကို ထောက်ပံ့ရေး ပစ္စည်းတွေ စတင် ရောက်ရှိနေပြီ ဖြစ်ပေမယ့် မလုံလောက်သေးကြောင်း၊ တချို့ ဒေသတွေမှာ စားနပ်ရိက္ခာနဲ့ သောက်ရေ လိုအပ်ချက် မြင့်မြင့်မားမား ရှိနေသေးကြောင်း သူက ပြောဆိုသွားခဲ့ပါတယ်။
