ဖွံ့ဖြိုးမှုအနည်းဆုံးနိုင်ငံများစာရင်းမှ လွတ်မြောက်ရန် အခြေအနေကောင်းများ စစ်အာဏာသိမ်းမှုကြောင့် ရပ်တန့်

▪️တရားမဝင်စစ်အာဏာသိမ်းမှုက မတည်ငြိမ်မှုများနှင့် ကြေကွဲဖွယ်ရာ အခြေအနေများကို ဖန်တီးခဲ့ကြောင်း မြန်မာသံအမတ်ကြီးပြော

ပြီးခဲ့သည့် အရပ်သားအစိုးရလက်ထက်တွင် မြန်မာနိုင်ငံသည် ဖွံ့ဖြိုးမှုအနည်းဆုံးနိုင်ငံများ (LDC)စာရင်းမှလွတ်မြောက်ရန် အခြေအနေကောင်းများပိုင်ဆိုင်ခဲ့သော်လည်း စစ်အာဏာသိမ်းမှုက မတည်ငြိမ်မှုများနှင့် ကြေကွဲဖွယ်အခြေအနေများကို ဖန်တီးခဲ့ကြောင်း မြန်မာသံအမတ်ကြီး ဦးကျော်မိုးထွန်းက ကုလသမဂ္ဂ၌ ပြောသည်။

မြန်မာသံအမတ်ကြီး ဦးကျော်မိုးထွန်းသည် မတ်လ ၁၇ ရက်တွင် ပြုလုပ်သော ပဉ္စမအကြိမ် ဖွံ့ဖြိုးမှုအနည်းဆုံးနိုင်ငံများဆိုင်ရာကုလသမဂ္ဂညီလာခံ ပထမပိုင်းသို့ တက်ရောက်မိန့်ခွန်းပြော ကြားစဉ် မြန်မာ့နိုင်ငံအခြေအနေကို ရှင်းလင်းပြောကြားခြင်းဖြစ်သည်။

မြန်မာနိုင်ငံသည် နှစ်ပေါင်း ၃၀ ကျော် ဖွံ့ဖြိုးမှုအနည်းဆုံးနိုင်ငံစာရင်းဝင်ခဲ့ပြီး အရပ်သားအစိုးရ လက်ထက် ၂၀၁၈ တွင် ဖွံ့ဖြိုးအနည်းဆုံးနိုင်ငံအဆင့်မှ လွတ်မြောက်ရေးဆိုင်ရာ စံနှုန်းသုံးခုစလုံးနှင့် ပထမဦးဆုံးအကြိမ် ပြည့်မီခဲ့သည်။

Public Service Announcement

သို့သော် တရားမဝင်စစ်အာဏာသိမ်းမှုသည် အရပ်သားအစိုးရ၏ ဒီမိုကရေစီအသွင်ကူးပြောင်းရေး ကြိုးပမ်းမှုများကို ရပ်တန့်စေခဲ့ပြီး မြန်မာနိုင်ငံတွင် မတည်ငြိမ်မှုများနှင့် ကြေကွဲဖွယ်ရာ အခြေအနေများကို ဖန်တီးခဲ့ကြောင်း သံအမတ်ကြီးက ပြောသည်။

ထို့အပြင် ကုလသမဂ္ဂဖွံ့ဖြိုးမှုအစီအစဉ် UNDP ၏ အချက်အလက်များအရ ၂၀၂၂ အစောပိုင်းတွင် မြန်မာနိုင်ငံလူဦးရေ၏ ထက်ဝက်နီးပါးခန့်ဖြစ်သော လူဦးရေ ၂၅ သန်းအထိသည် ဆင်းရဲနွမ်းပါးမှုမျဉ်းအောက်ရောက်နိုင်သည်ဟု ခန့်မှန်းထားပြီး ကမ္ဘာ့ဘဏ် World Bank ကလည်း မြန်မာ့စီးပွားရေးသည် ၁၈ ရာခိုင်နှုန်းခန့် ကျဆင်းမည်ဟု ခန့်မှန်းထားသည်။

စစ်တပ်၏ ရက်စက်ကြမ်းကြုတ်မှုများနှင့် လူသားမျိုးနွယ်အပေါ်ကျူးလွန်သည့် ရာဇ၀တ်မှုများကြောင့် ဖြစ်ပေါ်လာသည့် ကြောက်မက်ဖွယ်ရာဒုက္ခများကို မြန်မာနိုင်ငံသားများ ကြုံတွေ့နေကြရကြောင်း သံအမတ်ကြီး ဦးကျော်မိုးထွန်းက ကုလသမဂ္ဂသို့ တင်ပြသည်။

မြန်မာပြည်သူများသည် စီးပွားရေးချွတ်ခြုံကျမှု၊ အလွန်အမင်းဆင်းရဲမွဲတေမှု၊ စားနပ်ရိက္ခာမလုံလောက်မှု၊ နေရပ်စွန့်ခွာရွှေ့ပြောင်းရခြင်း၊ လူသားချင်းစာနာထောက်ထားမှုကပ် အစရှိသည့် စိန်ခေါ်မှုပေါင်းစုံကို ကြုံတွေ့နေရကြောင်းလည်း သံအမတ်ကြီးက အစီရင်ခံသည်။

မည်သို့ပင်ဖြစ်စေ မြန်မာပြည်သူပြည်သားများသည် စစ်အာဏာရှင်စနစ်ချုပ်ငြိမ်းရေး၊ ဒီမိုကရေစီ ပြန်လည်ထူထောင်ရေးနှင့် တိုင်းပြည်ဖွံ့ဖြိုးတိုးတက်ရေးတို့အတွက် နှစ်ဆကြိုးပမ်းဆောင်ရွက်ရန် ပြတ်သားသော စိတ်ဓာတ်၊ ဇွဲ လုံ့လဝီရိယများရှိကြောင်း သံအမတ်ကြီးက ရှင်းပြသည်။

နိုင်ငံတကာအသိုက်အဝန်းအနေဖြင့်လည်း မြန်မာနိုင်ငံတွင် စစ်အာဏာရှင်စနစ်ချုပ်ငြိမ်းရေး၊ ဒီမိုကရေစီ ပြန်လည်ထူထောင်ရေးနှင့် ဘက်စုံဖွံ့ဖြိုးတိုးတက်မှုများဖော်ဆောင်ရေး ကြိုးပမ်းမှုကို ကူညီဆောင်ရွက်ပေးကြရန် မြန်မာသံအမတ်ကြီးက မေတ္တာရပ်ခံခဲ့သည်။