စစ်အာဏာရှင်တော်လှန်ရေးတွင် လက်သံပြောင်နေသည့် မြိုင်မြို့နယ်တွင် ဒေသတွင်း ပြည်သူ့ကာကွယ်ရေးအဖွဲ့များ တစ်စုတစ်စည်းတည်း ပူးပေါင်းသင့် ၊မပူးပေါင်းသင့်ကို မြိုင်မြို့နယ်ပြည်သူ့ကာကွယ်ရေးတပ်ဖွဲ့က ဦးဆောင်၍ စစ်တမ်းကောက်ယူနေသည်။
မြိုင်မြို့နယ်အတွင်းရှိ ပြည်သူ့ကာကွယ်ရေးအဖွဲ့များပူးပေါင်းသင့်သလားဟူသော မေးခွန်း ဒေသခံများအကြားတွင် ကျယ်ကျယ်ပြန့်ပြန့်ထွက်ပေါ်နေ၍ ယင်းကဲ့သို့ စစ်တမ်းကောက်ယူခြင်းဟု မြိုင်မြို့နယ်ပြည်သူ့ကာကွယ်ရေးတပ်ဖွဲ့က ယနေ့(ဧပြီ ၉ရက်) သတင်းထုတ်ပြန်သည်။
မြိုင်မြို့နယ်တွင် ဒေသတွင်း ပြည်သူ့ကာကွယ်ရေးအဖွဲ့များ ပူးပေါင်းသင့်၊ မပူးပေါင်းသင့်နှင့် စစ်ရေးတွင်သာ ပူးပေါင်းသင့်(သို့မဟုတ်) လက်နက်ခဲယမ်းထုတ်လုပ်ရေးတွင်သာ ပူးပေါင်းသင့်ဆိုသည့် အချက်နှင့်အတူ နောက်ဆုံးအနေဖြင့် ငွေရေးကြေးရေးတွင် မျှဝေပူးပေါင်းသင့်၊မသင့်ကို စစ်တမ်းကောက်ယူနေခြင်း ဖြစ်သည်။
အထက်ပါစစ်တမ်းကို တယ်လီဂရမ်(Telegram)linkhttps://t.me/+UExnyoZFcBoyMDE1 မှတစ်ဆင့် ကောက်ယူမည်ဖြစ်ပြီး ဧပြီ ၁၆ရက်အထိ ဆန္ဒမဲပေးနိုင်သည်ဟု ဆိုသည်။
Public Service Announcement
စစ်တမ်းကောက်ယူမည့်သတင်းကို မြိုင်မြို့နယ်ပြည်သူ့ကာကွယ်ရေးတပ်ဖွဲ့ ဖေ့စ်ဘွတ်စာမျက်နှာမှ ထုတ်ပြန်ရာ စစ်အာဏာရှင်တော်လှန်ရေးအတွက် ပြည်သူ့ကာကွယ် ရေးတပ်ဖွဲ့များပူးပေါင်းသင့်ကြောင်း ပြည်သူလူထုက အများဆုံး မှတ်ချက်ပေးကြသည်။
” Local PDFတွေနဲ့ပူးပေါင်းသင့်ပါတယ် စစ်ရေး ထုတ်လုပ်ရေး ငွေရေးကြေးရေး အားလုံးပေါ့ တစ်ချို့ တပ်ဖွဲ့တွေမှာ ထုတ်လုပ်ရေးမှာ အခက်အခဲရှိတာတွေ ငွေရေးကြေးရေး လိုအပ်နေတာတွေကြောင့် ပူးပေါင်းရင် ပိုအဆင်ပြေလာမယ်” ဟု ပြည်သူတစ်ဦးက မှတ်ချက်ပြုသည်။
လူထုစစ်တမ်းကောက်ခြင်းအား ကြိုဆိုပြီး ပြည်သူ့ကာကွယ်းရေးအဖွဲ့များ အကောင်းဆုံး အဖြေရှာကြရန်လည်း တိုက်တွန်းကြသည်။
“ဘုံရန်သူဟာ တစ်ခုထဲ ဖြစ်တဲ့အတွက် အရေးတော်ပုံအောင်ရမည်”ဟုဆိုကာ အကောင်းဆုံးအဖြေကိုရှာသွားမည်ဟု မြိုင်မြို့နယ်ပြည်သူ့ကာကွယ်ရေးတပ်ဖွဲ့က ရေးသားထားသည်။
မြိုင်တွင် မြိုင်မြို့နယ်ပြည်သူ့ကာကွယ်ရေးတပ်ဖွဲ့၊God Of Myaing၊ Myaing Village Revolution Force-M.V.R.Fအပြင်အခြားသော ပြည်သူ့ကာကွယ် ရေးအဖွဲ့များလည်း ရှိသည်။
ပြည်သူ့ကာကွယ်ရေးတပ်ဖွဲ့များက စစ်ကောင်စီအား တိုက်ခိုက်နေသလို ပြည်သူ့အုပ်ချုပ်ရေးအဖွဲ့ကလည်း NUGအစိုးရ၏ လမ်းညွှန်မှုနှင့်အတူ အုပ်ချုပ်ရေးယန္တရားကို အကောင်အထည်ဖော်နေသည်။
