အာဏာသိမ်းစစ်ကောင်စီမှ ရိုးရာသင်္ကြန်ကို ခုတုံးလုပ်၍ ရေကစားမဏ္ဍပ်များ ဆောက်လုပ်ခြင်း၊ ပွဲလမ်းသဘင်များ ကျင်းပစေခြင်းဖြင့် လူထုနှင့်တော်လှန်ရေး ရေချိန်ကို ဆွဲချရန် ဖိအားပေးဆောင်ရွက်လာပြီဖြစ်၍ လူထုကိုအခြေမပြုသောသင်္ကြန်ပွဲအား ဆင်နွှဲခြင်းမပြုပဲ အာဏာရှင်တော်လှန်ရေး ခရီးဆက်ကြရန်၊ တော်လှန်ရေးသတိကပ်ရန် ရန်ကုန်မြို့ရှိ မြို့ပြပြောက်ကျားတပ်ဖွဲ့များ၊ သပိတ်နှင့် တော်လှန်ရေးအဖွဲ့အစည်းများ စုပေါင်း၍ ပြည်သူများအား သတိပေးနှိုးဆော်သည့် ကြေငြာချက်ကို ဧပြီ ၁၀ရက်က ထုတ်ပြန်သည်။
ထို့အပြင် စစ်ကောင်စီနှင့် ထိစပ်စီးပွားရေးအရ အခွန်ငွေများပေးဆောင်ကာ လူငယ်များတော်လှန်ရေး အာရုံထွေပြားစေမည့် ပျော်ပွဲ၊ရွှင်ပွဲများဖြစ်သည့် Bar များ၊ Club များ၊ မဏ္ဍပ်များနှင့် Music Festival များပြုလုပ်လျက်ရှိသော ခရိုနီအသိုင်းဝိုင်းနှင့် စီးပွားရေးသမားများအား အဓမ္မအားပေး လုပ်ရပ်များရပ်တန်းကရပ်ရန် ပြင်းထန်စွာ သတိပေးကြောင်း ထုတ်ပြန်ချက်၌ ပါဝင်သည်။
သင်္ကြန်ကာလတွင်း တော်လှန်ရေးနှင့်မည်သို့မျှမသက်ဆိုင်သော ဖျော်ဖြေရေးအစီအစဉ်များပြုလုပ်၍ စစ်ကောင်စီ၏ ဖန်တီးသင်္ကြန်ကို အားပေးအားမြှောက်ပြုလုပ်မည့် အနုပညာရှင်များအားလည်း လုပ်ရပ်များဆင်ခြင်နိုင်ရန် သတိပေးခဲ့ပြီး ၎င်းပျော်ပွဲ၊ရွှင်ပွဲနေရာများသို့ သွားလာခြင်းမပြုပဲ ရှောင်ရှားခြင်းဖြင့် ကူညီပေးကြပါရန် ပြည်သူများအား မေတ္တာရပ်ခံ အသိပေးနှိိုးဆော်ခဲ့သည်။
ထပ်မံ၍ တိုင်းပြည်အတွက်ကိုယ်ကျိုးစွန့်ခဲ့သည့် ကျဆုံးအာဇာနည်သူရဲကောင်းများ၊ ထောင်တွင်းနှိပ်စက်မှုဒဏ်ခံ၍ ပေးဆပ်နေသောရဲဘော်များ၊ တောတွင်း တိုက်ပွဲဝင်နေသော ရဲဘော်များ၊ စစ်ဘေးရှောင်ဒုက္ခသည်ပြည်သူများနှင့် အဖိနှိပ်ခံလူမျိုးစုများအား စော်ကားသကဲ့သို့ ပြုမူဆောင်ရွက်နေမှုများ ရပ်တန့်ပေးပါရန် လေးနက်စွာသတိပေးအပ်ကြောင်း ဖော်ပြထားသည်။
Public Service Announcement
တော်လှန်ရေးကာလဖြစ်သည့်အားလျော်စွာ သပိတ်အဖွဲ့အစည်းများ၊ PDF၊ LPDF နှင့် လက်နက်ကိုင်တော်လှန်ရေးအင်အားစုအဖွဲ့အစည်းအသီးသီး၊ EAOs၊ EROsများ၊ မြို့ပြပြောက်ကျားများနှင့် အနယ်နယ်အရပ်ရပ်ရှိ တော်လှန်ပြည်သူများမှ စစ်အာဏာရှင်ကျဆုံးရေးနှင့် ဒီမိုကရေစီရရှိရေးအတွက် တော်လှန်ရေးနည်းနာပေါင်းစုံ၊ ဘက်ပေါင်းစုံမှ လူထုတိုက်ပွဲနှင့် လက်နက်ကိုင်တိုက်ပွဲများ ဟန်ချက်ညီစွာ ပုံဖော်ဆောင်ရွက်နိုင်ရေး ကြိုးပမ်းလျက်ရှိကြောင်း အသိပေးထားသည်။
