ယောဒေသပြည်သူ့ကာကွယ်ရေးတပ်ပေါင်းစုသို့ ဂန့်ဂေါပြည်သူ့ကာကွယ်ရေးတပ်ဖွဲ့ ထပ်မံပူးပေါင်းဖွဲ့စည်း

စစ်အာဏာရှင်အားအမြစ်ဖြတ်တော်လှန်နိုင်ရေး ဒေသတွင်း ပြည်သူ့ကာကွယ်ရေးအဖွဲ့ လေးဖွဲ့ စုစည်းဖွဲ့စည်းထားသည့် ယောဒေသပြည်သူ့ကာကွယ်ရေးတပ်ပေါင်းစု YRPA သို့ ဂန့်ဂေါပြည်သူ့ကာကွယ်ရေးတပ်ဖွဲ့ ထပ်မံပူးပေါင်းဖွဲ့စည်းလိုက်သည်ဟု ယနေ့ ထုတ်ပြန်သည်။

လောင်းရှည်ဒေသပြည်သူ့ကာကွယ်ရေးတပ်ဖွဲ့ (LSRPDF)၊ကျောက်ထုဒေသပြည်သူ့ကာကွယ်ရေးတပ်ဖွဲ့(KTU-PDF)၊ထီးလင်းပြည်သူ့ကာကွယ်ရေးတပ်ဖွဲ့(Htilin PDF)နှင့်ယောဒေသပြည်သူ့ကာကွယ်ရေးတပ်ဖွဲ့(YPDF)တို့ စုပေါင်းကာ မတ်လ၂၀၇က်တွင် ယောဒေသပြည်သူ့ကာကွယ်ရေးတပ်ပေါင်းစု (YRPA) ကိုဖွဲ့စည်းခဲ့သည်။ ယခုအခါ ဂန့်ဂေါပြည်သူ့ကာကွယ်ရေးတပ်ဖွဲ့ (PDF-GANGAW BATTALION) က ထပ်မံဝင်ရောက်ပူးပေါင်းခဲ့သည်ဟုYRPAက ယနေ့(ဧပြီ၁၉ရက်) ထုတ်ပြန်လိုက်ခြင်းဖြစ်သည်။

ယောဒေသတွင်း တကွဲတပြားစီဖြစ်နေသော ပြည်သူ့ကာကွယ်ရေးတပ်ဖွဲ့များကြား တသွေးတသားတည်းဟူသော စည်းလုံးညီညွတ်မှုနှင့် ယောဒေသပြည်သူလူထုအကျိုးစီးပွားကို ရှေးရှု၍ ယင်းကဲ့သို့ ဖွဲ့စည်းလိုက်ခြင်းဟု ယောဒေသလူထုတိုက်ပွဲကော်မတီက သတင်းထုတ်ပြန်ထားသည်။

ယောဒေသတွင်း စည်းလုံးညီညွတ်ရေးနှင့် တစ်စုတစ်စည်းတည်းဖြစ်သော ပြည်သူ့ကာကွယ်ရေးအင်အားစုတစ်ခု ဖြစ်လာစေရန် ကျန်ရှိနေသေးသော ဒေသတွင်း ပြည်သူ့ကာကွယ်ရေးတပ်ဖွဲ့များနှင့်လည်း ဆက်လက်ညှိနှိုင်းဆောင်ရွက်လျက်ရှိကြောင်း YRPA ကအသိ​ပေးသည်။

Public Service Announcement

ယောဒေသတွင်း ပြည်သူ့ကာကွယ်ရေးအဖွဲ့များအားလုံး စုစည်းနိုင်ပါက စစ်အာဏာရှင်တော်လှန်ရေးအတွက်ရော ဒေသခံ လူထုအတွက်ပါပိုမိုအကျိုးရှိစေမည်ဟု ဒေသခံများက မှတ်ချက်ပြုသည်။

” စုစည်းမှု၊ စည်းလုံးညီညွတ်မှုဖြင့်သာ စစ်အာဏာရှင်စနစ်ကို တိုက်ထုတ်တွန်းလှန်နိုင်မည်ဟု မိမိတို့ တပ်ပေါင်းစုမှ ယုံကြည်သည်။ယောဒေသတစ်ခုလုံး စည်းလုံးညီညွတ်ကြရမည်။စစ်အာဏာရှင်စနစ် မုချ ကျဆုံးရမည်” ဟု YRPA က ထုတ်ပြန်ထားသည်။