ကသာမြို့နယ်တိုက်ပွဲ စစ်ကောင်စီတပ်မှ ၁၀ဦးထက်မနည်းသေဟု မြို့နယ်(ပကဖ)ထုတ်ပြန်

▪️စစ်ကောင်စီတပ် လက်နက်ကြီးဖြင့်ပစ်၍ စစ်ရှောင်ပြည်သူ ​လေးဦးသေ၊ နှစ်ဦးဒဏ်ရာရ

စစ်ကိုင်းတိုင်း ကသာမြို့နယ်၌ ယမန်နေ့က တိုက်ပွဲဖြစ်ပွားရာ စစ်ကောင်စီတပ်မှ ၁၀ဦးထက်မနည်းသေဆုံးခဲ့ကြောင်း ကသာမြို့နယ်ပြည်သူ့ကာကွယ်ရေးတပ်ဖွဲ့ (ပကဖ)က သတင်းထုတ်ပြန်သည်။

ဇွန်လ ၁၁ရက် နံနက်က ကသာမြို့နယ် လှေဘိုကျေးရွာနှင့် လောင်းတော်ဦးဘုရားကြား တံခွန်တိုင်အခင်းစု အနီးတွင် တိုက်ပွဲဖြစ်ခဲ့သည်ဟု ဆိုသည်။

စစ်ကောင်စီတပ်ကို ကသာခရိုင် PDF တပ်ရင်း(၃)၊ ကျောင်းသားတပ်မတော် ABSDF ၊ ကသာ(အင်းကြီး -ပကဖ)ပူးပေါင်းတပ်များက တိုက်ခိုက်ခဲ့ခြင်းဖြစ်ပြီး ပူးပေါင်းတပ်ဖွဲ့က တောင်ကုန်းတစ်ခုပေါ်မှအသာစီးပစ်ခတ်ခဲ့၍ စစ်ကောင်စီဘက်က သေဆုံးထိခိုက်များခဲ့သည်ဟု ဆိုသည်။

အဆိုပါတိုက်ပွဲ၌ ကာကွယ်ရေးပူးပေါင်းတပ်မှ ထိခိုက်ကျဆုံးမရှိခဲ့သော်လည်း လှေဘိုရွာမှ စစ်ရှောင်ပြည်သူ ​ခြောက်ဦးမှာ ပုန်းနေရာမှ တိုက်ပွဲအားထွက်ကြည့်ရာ စစ်ကောင်စီတပ်က လက်နက်ကြီးဖြင့် ပစ်ခတ်၍ ​လေးဦး ပွဲချင်းပြီးသေဆုံးပြီး နှစ်ဦးဒဏ်ရာပြင်းထန်ခဲ့သည်ဟု ဖော်ပြထားသည်။

Public Service Announcement

စစ်ကောင်စီတပ်သည် ယခုရက်ပိုင်းတွင် ကသာမြို့နယ်ကို ဦးတည်၍ အင်အားတိုးချဲ့ခြင်း၊ လက်နက်ကြီးများရမ်းသမ်းပစ်ခတ်ခြင်း၊ ပြည်သူများကို ပေါ်တာဆွဲပြီး ၊ပြည်သူယာဉ်များ (ကား၊ဆိုင်ကယ်၊စက်လှေ)များ မတရားချောဆွဲခြင်းများ ပြုလုပ်နေသည်ဟု ဆိုသည်။

ထို့ပြင် ပြည်သူ့နေအိမ်များရိုက်ဖျက်၊မီးရှို့ခြင်း၊ပြည်သူ့ရွှေ၊ ငွေများကို လုယက်ခြင်း ၊ပြည်သူများကို မတရားဖမ်းဆီး၍ လမ်းပြခိုင်းခြင်း၊ ဘုန်းကြီးကျောင်းများအား အကာအကွယ်ပြုလုပ်၍စစ်ကြောင်းများ အလွန်အကျွံထိုးလာခြင်းစသည်တို့ကို ကျူးလွန်နေ၍ ပြည်သူများ အနေဖြင့် တိုက်ပွဲများနှင့် ဝေးရာတွင်ရှောင်တိမ်းနေကြရန် ကသာ(ပကဖ)က ပန်ကြားထားသည်။

စစ်ကောင်စီတပ်သည် ကသာမြို့နယ်အတွင်း စစ်ကြောင်းသုံးကြောင်း၊ စုစုပေါင်းအင်အား ၅၀၀ ခန့်အသုံးပြု၍ စစ်ရေးလှုပ်ရှားနေသည်ဟု ဆိုသည်။