'/%3E%3C/svg%3E){kind=small}
ရှမ်း – ကရင်နီ(ကယား)ပြည်နယ်အစပ် ဖယ်ခုံမြို့နယ်အရှေ့ကမ်းရှိ စစ်ဘေးရှောင်နေသော ကျေးရွာများမှ ပစ္စည်းများခိုးယူနေသည့် စစ်ကောင်စီနှင့် PNO ပြည်သူ့စစ်အဖွဲ့ကို ကြားဖြတ်တိုက်ခိုက်ရာ လေးဦးသေဆုံးပြီ နှစ်ဦးထိခိုက်ဒဏ်ရာရရှိနိုင်ကြောင်း ဖယ်ခုံ PDF တပ်ရင်း (၂)က ယနေ့(ဇွန် ၂၀ ရက်) ထုတ်ပြန် သည်။
တိုက်ပွဲဖြစ်စဥ်မှာ ယမန်နေ့ (ဇွန် ၁၉ ရက်)နေ့လည် ၁ နာရီခန့်က လွယ်ပေါကျေးရွာနှင့် ဆောင်နန်းခဲရွာကြားတွင် လဟယ်ကျေးရွာ၊မခေခမ်းကျေးရွာနှင့် လွယ်ပေါကျေးရွာတို့မှ ဒေသခံပြည်သူများစစ်ရှောင်နေချိန် ကိုင်းရှည် လယ်ယာလက်တွန်းထွန်စက်များနှင့်ပစ္စည်းများကို စစ်ကောင်စီနှင့် PNO တို့က ဒန်ဘာကား သုံးစီးဖြင့် ခိုးယူခဲ့သည်ဟု ဆိုသည်။
ထို့နောက် စစ်ကောင်စီပူးပေါင်းအဖွဲ့ ညောင်ရွှေမြို့နယ်ဘက်သို့ ပြန်လာရာလမ်းတွင် ဖယ်ခုံမြို့နယ်ပြည်သူ့ကာကွယ်ရေးတပ်ရင်း (၂)က ခြုံခိုတိုက်ခိုက်ခဲ့ရာ ကားပေါ် ပါလာသူ စကစ နှင့် PNO ခြောက်ဦးခန့်ထိမှန်ခဲ့ပြီး လေးဦးသေဆုံးနိုင်ခြေရှိကာ နှစ်ဦး ဒဏ်ရာပြင်းထန် နိုင်ကြောင်းဖော်ပြသည်။
ဖယ်ခုံ PDF တပ်ရင်း (၂) ရဲဘော်များသည် ရန်သူပြန်လည်ပစ်ခတ်နိုင်ခြင်းမရှိခင် တပ်ဆုတ်နိုင်ခဲ့သဖြင့်ထိခိုက်မှု့မရှိခဲ့ဟု အသိပေးသည်။
Public Service Announcement
ထို့အပြင် စစ်ကောင်စီတပ်နှင့် PNOတို့ပူးပေါင်းကာ ဖယ်ခုံအင်းအရှေ့ခြမ်း ဆောင်းနန်းခဲ၊လွယ်ပေါ၊နန်းပေါ်လုံ၊နန်းဆွန့်၊ပိန္နဲကုန်း၊မခေခမ်း၊လဟယ်ကျေးရွာများသို့ မေလ ၁၃ ရက်ကစ၍ စစ်ကြောင်းထိုးနယ် မြေရှင်းလင်းရေးလုပ်ဆောင်ခဲ့ရာ တစ်လကျော် ကာလအတွင်း ကျေးရွာ စစ်ရှောင်ပြည်သူများ၏ နေအိမ်အဆောက်အဦးများမီးရှို့ခံရသည့်အပြင်ကိုင်းရှည်စက်၊ထော်လာဂျီ၊ဆိုင်ကယ်၊မြေသြဇာနှင့် ပြောင်းမျိုးအိတ်များပါမကျန် ညောင်ရွှေမြို့နယ် ဘက်သို့သယ်ယူလျှက်ရှိကြောင်း ထုတ်ပြန်ချက်၌ ဖော်ပြသည်။
