တနင်္သာရီတိုင်း၊ သရက်ချောင်းမြို့နယ်တွင် စစ်ကောင်စီတပ်နှင့် နှစ်ရက်အတွင်းတိုက်ပွဲသုံးကြိမ်ဖြစ်ပွားပြီး စစ်ကောင်စီတပ်ဘက်မှ ၁၄ ဦးသေဆုံးခဲ့ကာ ဒေသခံပြည်သူ့ကာကွယ်ရေးတပ်များဘက်မှ ၂ ဦးကျဆုံးခဲ့ကြောင်း ဒေါင်းမင်းစစ်ဆင်ရေးတပ်ကထံ မှသိရသည်။
စစ်ကောင်စီတပ်သည် ဇွန် ၂၄ ရက်မှ စတင်ပြီး သရက်ချောင်းမြို့နယ်၊ ကျောက်ဖြူရွာကို အင်အား ၅၀ကျော်ဖြင့် စစ်ကြောင်း ဝင်ရောက်လာခြင်းကြောင့် ဒေသခံပြည်သူ့ကာကွယ်ရေးတပ်များနှင့်တိုက်ပွဲဖြစ်ပွားခဲ့ခြင်းဖြစ်သည်။
စစ်ကောင်စီတပ်နှင့် ဒေသခံကာကွယ်ရေးတပ်တို့ကြား ဇွန် ၂၄ ရက်မှ ၂၆ ရက်အထိ ထိတွေ့တိုက်ပွဲ သုံးကြိမ်ဖြစ်ပွားခြင်းဖြစ်သည်။
ကျောက်ဖြူရွာအနီး၌Dawei Defense Forceအပါအဝင်ဒေသခံပြည်သူ့ကာကွယ်ရေးတပ်များနှင့် စစ်ကောင်စီတပ်တို့ ဇွန် ၂၄ ရက်၊နေ့လယ် ၁၁နာရီကျော်တွင်၁၀မိနစ်ခန့်တိုက်ပွဲဖြစ်ပွားခဲ့သည်။ ထိုတိုက်ပွဲတွင် စစ်ကောင်စီတပ်မှ ၄ ဦးသေဆုံးပြီး ၃ ဦးဒဏ်ရာရရှိခဲ့သည်။ ဒေသခံကာကွယ်ရေးတပ်များဘက်မှာ နှစ် ဦးကျဆုံးပြီး ၁ ဦးမှာ မစိုးရိမ်ရ ဒဏ်ရာရရှိခဲ့သည်။
Public Service Announcement
ထိုတိုက်ပွဲအပြီးတွင် စစ်ကောင်စီတပ်က ကျောက်ဖြူရွာနှင့် လောင်းမင်းဘရွာတို့တွင် ဇွန် ၂၆ ရက်အထိ တပ်ဖြန့်နေရာယူခဲ့ထားသည်ဟု ဒေါင်းမင်းစစ်ဆင်ရေးတပ်က ထုတ်ပြန်ထားသည်။
ဇွန် ၂၆ ရက်တွင် စစ်ကောင်စီတပ်များသည် ကျောက်ဖြူရွာမှ လူနေအိမ် ၃ လုံးနှင့် စပါးကျီ ၃ လုံးကို မီးရှို့ဖျက်ဆီးခဲ့ပြီး စော်ဖျားရွာကို တပ်ဆုတ်သွားသည်။ထိုသို့ဆုတ်ခွာစဉ်သ
ရက်ချောင်းမြို့နယ် ပြည်သူ့ကာကွယ်ရေးတပ်များက စစ်ကောင်စီတပ်ကို ကထီးဝရွာနှင့် စော်ဖျားရွာကြားတွင်တစ်ကြိမ်၊ မိုးရွှေကုန်းရွာအနီးတွင် တစ်ကြိမ် စုစုပေါင်း နှစ်ကြိမ်တိုက်ခိုက်ခဲ့သည်။
ထိုတိုက်ပွဲနှစ်ကြိမ်တွင် စစ်ကောင်စီတပ်သား ၁၀ ဦးသေဆုံးပြီး ၇ ဦး ဒဏ်ရာရရှိခဲ့သည်ဟု ဒေသခံပြည်သူ့ကာကွယ်ရေးတပ်များကပြောသည်။ ဒေသခံပြည်သူ့ကာကွယ်ရေးတပ်များဘက်မှ အထိအခိုက်မရှိ ပြန်လည်ဆုတ်ခွာနိုင်သည်ဟု ဒေါင်းမင်းစစ်ဆင်ရေးတပ်ကထုတ်ပြန်သည်။
စစ်ကောင်စီတပ်ကို ဒေါင်းမင်းစစ်ဆင်ရေးတပ်(TYC-PDF) ၊ Dawei Southern Defense Force၊ People Defense Guerrilla Force( TYC)၊ Fighting For Freedom Force(ထားဝယ် ပကဖ) နှင့် ထားဝယ်ခရိုင်ပြည်သူ့ကာကွယ်ရေးတပ်ဦး တို့က ပူးပေါင်းတိုက်ခိုက်ခဲ့ခြင်းဖြစ်သည်။
