စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ စိုင်နိုင်လေးကျေးရွာတွင်စစ်ကောင်စီတပ်ကတိုက်ပွဲမဖြစ်ဘဲ ကျေးရွာအတွင်းလက်နက်ကြီး၊လက်နက်ငယ်ဖြင့် ပစ်ခတ်သောကြောင့် တစ်ဦးသေဆုံးပြီး ၆ ဦး ထိခိုက်ဒဏ်ရာ ရရှိသွားကြောင်း ဒေသခံများက ပြောသည်။
ယမန်နေ့(ဇူလိုင်လ၁၀ရက်နေ့)က ဝက်လက်မြို့နယ်၊ စိုင်နိုင်လေးရွာကို အကြမ်းဖက်စစ်တပ်ကတိုက်ပွဲမဖြစ်ဘဲ လက်နက်ကြီးလက်နက်ငယ်များဖြင့် ပစ်ခတ်ခဲ့ခြင်းဖြစ်ပြီး ၎င်းတို့၏ပစ်ခတ်မှုကြောင့် ရွာသားတစ်ဦးသေဆုံးကာ ၆ ဦးမှာ ပြင်းထန်ဒဏ်ရာများ ရရှိသွားခြင်းဖြစ်ကြောင်း ဒေသခံများက ပြောသည်။
“သက်သက်လက်နက်ကြီးနဲ့ပစ်သွားတာပါဗျာ။ဆုံးတဲ့ရွာသားကို မနေ့ကတခါတည်း သင်္ဂြိုလ်လိုက်ပါတယ်။ ကျန်တဲ့ထိထားတဲ့ ၆ယောက်ထဲကလည်း စိုးရိမ်ရသူ နှစ်ယောက်ပါပါသေးတယ်။”ဟု ဒေသခံတစ်ဦးက ပြောသည်။
ဝက်လက်မြို့နယ်သည်အကြမ်းဖက်စစ်တပ်၏ ဖိနှိပ်အကြမ်းဖက်မှုများ မကြာခဏခံနေရပြီး ခုခံတော်လှန်မှုများအားကောင်းရာဒေသဖြစ်သည်။
Public Service Announcement
ပြီးခဲ့သည့် ဇူလိုင်လ ၃ ရက်နေ့က ဝက်လက်မြို့နယ် မင်းရွာတိုက်ပွဲတွင် Local PDF ၅ ဦး၊ ဒေသခံ ပကဖ ၃ ဦး၊ ပြည်သူ ၂ ဦး ကျဆုံး ပြီး ၄ ဦး ဒဏ်ရာရရှိခဲ့သေးသည်။သေဆုံးသူများအနက် ၄ ဦးမှာ လက်နက်ချ အဖမ်းခံစဉ် အနီးကပ် ပစ်သတ်ခံရခြင်းဖြစ်ကြောင်း ဒေသတွင်းပြည်သူ့ကာကွယ်ရေးအဖွဲ့များက ပြောကြားသည်။
