ကျွန်းပေါ်ကျေးရွာများ၌ ချေးငွေပြန်လည်ကောက်ခံမှု ခေတ္တရပ်ဆိုင်းထားရန် တောကြီးမြွေပွေးအဖွဲ့ သတိပေး

မန္တလေးတိုင်း၊ စဥ့်ကူးမြို့နယ်နှင့် မတ္တရာမြို့နယ်အတွင်းရှိ ဧရာဝတီမြစ်အတွင်း ကျွန်းပေါ်ကျေးရွာများ၌ ချေးငွေများအား ဆက်လက်ကောက်ခံခြင်းမပြုရန် စစ်​ကိုင်းတိုင်း၊ ဝက်လက်နယ်အခြေစိုက် တောကြီးမြွေပွေးအဖွဲ့က သတိပေးကြေညာသည်။

ချေးငွေလုပ်ငန်းများကို တာဝန်ယူကောက်ခံပေးနေသူများ ဆက်လက်ကောက်ခံပေးခြင်းမပြုရန်နှင့် ပြည်သူ့အာဏာ ပြည်သူပြန်ရသည့်အချိန်ထိ စောင့်ဆိုင်းပေးရန် တောကြီး​မြွေပွေးအဖွဲ့က ယနေ့ (သြဂုတ် ၃၀ ရက်) အသိပေးကြေညာခဲ့သည်။

အသိပေးကြေညာချက်ကို မလိုက်နာဘဲ ဆက်လက်တောင်းခံနေပါက တာဝန်ယူတောင်းခံပေးနေသူ၏ အသက်ကို တာဝန်မယူကြောင်းအသိပေးကြေညာအပ်ပါသည်ဟု ထုတ်ပြန်ချက်တွင် ဖော်ပြသည်။

“ပြည်သူတွေ ခက်ခဲနေတဲ့အချိန်မှာ ချေးငွေကြောင့် အခက်ခဲဖြစ်နေရလို့ပါ။ အခုချိန်မှာ ပြည်သူတွေမှာ ထမင်းစားဖို့တောင် အနိုင်နိုင်​ဖြစ်နေလို့ပါ။”ဟု တောကြီးမြွေပွေးအဖွဲ့ တာဝန်ရှိသူက ပြောသည်။

Public Service Announcement

အဆိုပါ ကျွန်း​ပေါ်ကျေးရွာများသည် မြစ်တစ်ဖက်ကမ်းရှိ စစ်ကိုင်းတိုင်း၊ ဝက်လက်နယ်နှင့်နီးပြီး အကြမ်းဖက်စစ်တပ်က ထိုကျွန်းပေါ်ကျေးရွာများမှ ဝက်လက်နယ်ဘက်သို့ လက်နက်ကြီးဖြင့်ထုခြင်း၊ ဝက်လက်နယ်အတွင်းသို့ ဝင်ရောက်ခြင်းများ ပြုလုပ်လေ့ရှိကြောင်း ​ဒေသခံများက ပြောသည်။