ထားဝယ်ရိုးရာ သပိတ်မျှောပွဲကိုအကြောင်းပြပြီး ပျော်ပွဲ၊ရွှင်ပွဲပြုလုပ်မည့် ထားဝယ်ကမ်းနားလမ်း သဲကွင်းအနီး ဆောက်လုပ်ထားသည့် စစ်ကောင်စီဖျော်ဖြေရေးမဏ္ဍပ်ကို သတိပေးသည့်အနေဖြင့် ဖောက်ခွဲတိုက်ခိုက်ခဲ့ကြောင်း Guerrilla Dawei ပြောက်ကျားတပ်ဖွဲ့က ပြောသည်။
ယနေ့(အောက်တိုဘာ ၆)ညနေ ၅ နာရီကျော်က ထားဝယ်ရိုးရာ သပိတ်မျှောပွဲတွင် ပျော်ပွဲ၊ရွှင်ပွဲထည့်သွင်းမည့် စစ်ကောင်စီဖျော်ဖြေရေးမဏ္ဍပ်အား ဖောက်ခွဲတိုက်ခိုက်ခဲ့ရာ ကြမ်းခင်းနှင့် အမိုးများထိခိုက်ပျက်စီးခဲ့ပြီး လူထိခိုက်မှုမရှိကြောင်း GD ပြောက်ကျားတပ်က ပြောသည်။
“ထိခိုက်မှုတော့ မရှိပါဘူးခင်ဗျာ။ ဖျော်ဖြေရေး မဏ္ဍပ်တော့ အမိုးနဲ့ ကြမ်းခင်းတွေ ပေါက်ထွက်ကုန်တယ်”ဟု Guerrilla Dawei မှ တော်လှန်ရေးရဲဘော်တစ်ဦးက ပြောသည်။
ယခုတိုက်ခိုက်မှုသည် စစ်ကောင်စီက လူထုအား ဒိုင်းကာသဖွယ်အသုံးပြုပြီး ပျော်ပွဲ၊ရွှင်ပွဲပြုလုပ်မည်းအပေါ် ပြည်သူများ မပါဝင်ကြရန်နှင့် စစ်ကောင်စီအားပံ့ပိုးနေသူများအား သတိပေးသည့်အနေဖြင့် ဖောက်ခွဲတိုက်ခိုက်ခဲ့ခြင်းဖြစ်သည်ဟု ၎င်းတော်လှန်ရေးရဲဘော်က ဆိုသည်။
Public Service Announcement
ထားဝယ်ရိုးရာ သပိတ်မျှောပွဲကို အောက်တိုဘာ ၈ ရက်နှင့် ၉ ရက်နေ့များတွင် စစ်ကောင်စီက ကျင်းပရန်စီစဥ်ထားရာ တစ်နိုင်ငံလုံး စစ်အုပ်စုကြောင့် ဒုက္ခရောက်နေချိန် စစ်ကောင်စီပြုလုပ်သည့် ပျော်ပွဲ၊ရွှင်ပွဲများတွင် ပူးပေါင်းပါဝင်ခြင်းမပြုကြရန် ထားဝယ်တော်လှန်ရေးအက်အားစုများက သတိပေးထားသည်။
အထက်ပါ စစ်ကောင်စီ ဖျော်ဖြေရေးမဏ္ဍပ် ဖောက်ခွဲတိုက်ခိုက်ခံရပြီးနောက် ကင်းချထားသော စစ်ကောင်စီတပ်များက သေနတ်များဖြင့် ရမ်းသမ်းပစ်ခတ်မှုများရှိခဲ့သည်။
