လွိုင်ကော်မြို့ ကုန်းသာစစ်ဘေးရှောင်စခန်း စစ်ကောင်စီတပ် လက်နက်ကြီးပစ်ခတ်မှုကြောင့် စစ်ဘေးရှောင်ပြည်သူတစ်ဦး သေဆုံး

ကလေးငယ်အပါအဝင် ဒဏ်ရာရရှိသူများလည်းရှိ

လွိုင်ကော်မြို့ ကုန်းသာကျေးရွာစစ်ဘေးရှောင်စခန်း အကြမ်းဖက်စစ်ကောင်စီတပ်က လက်နက်ကြီးဖြင့် ပစ်ခတ်မှုကြောင့် စစ်ဘေးရှောင်ပြည်သူတစ်ဦး သေဆုံးပြီး ထိခိုက်ဒဏ်ရာရရှိသူများရှိခဲ့ကြောင်း ကရင်နီပြည်စစ်ဘေးရှောင်ကူညီစောင့်ရှောက်ရေးကွန်ရက်က ယနေ့ (အောက်တိုဘာ ၂၄ ရက်)ထုတ်ပြန်သည်။

ယမန်နေ့ည ၉ နာရီခန့်က မိုးဗြဲအခြေစိုက် စစ်ကောင်စီ၏ (၄၂၂)တပ်မှ စစ်ဘေးရှောင်စခန်းကို ရည်ရွယ်ချက်ရှိရှိ ပစ်ခတ်ခဲ့ခြင်းဟု ဆိုသည်။

သေဆုံးခဲ့သူမှာ အသက်(၃၅)နှစ်အရွယ်အမျိုးသားဖြစ်ပြီး ၎င်း၏ ဇနီးဖြစ်သူမှာလည်း ဒဏ်ရာပြင်းထန်ကြောင်း ဖော်ပြသည်။

“ကျွန်တော်တို့ရောက်တော့ အမျိုးသားကတော့ ဆုံးနှင့်ပြီ၊ အမျိုးသမီးမှာတော့ ခေါင်းကို လက်နက်ကြီးစ ထိထားတဲ့ ဒဏ်ရာနဲ့၊ ဒဏ်ရာကတော်တော်ပြင်းတယ်၊ ပြီးတော့ (၈)နှစ်အရွယ် ကလေးမှာလည်း ပေါင်ကို ရှပ်ထိဒဏ်ရာရထားတယ်၊ ၆ လအရွယ် ကလေးတယောက်လည်းရှိတယ်။သူကတော့ မထိခိုက်မိထားဘူး “ဟု ကွန်ရက်တာဝန်ရှိသူက ပြောသည်။

Public Service Announcement

ယခုလအတွင်း ကရင်နီပြည်နယ်၌ စစ်ကောင်စီတပ်က ပစ်ခတ်သည့် လက်နက်ကြီးထိမှန်၍ အရပ်သား ၅ဦး ဒဏ်ရာရခဲ့ပြီး တစ်ဦးသေဆုံးခဲ့ရသည်။

ထို့အပြင် အကြမ်းဖက်စစ်တပ်က အာဏာသိမ်းပြီးနောက်ပိုင်း ကရင်နီဒေသအတွင်း စစ်ဘေးရှောင်စဥ် သေဆုံးခဲ့ရသည့် စစ်ဘေးရှောင်ပြည်သူ ၆၅ ဦးအထိရှိကြောင်းလည်း တိုးတက်သော ကရင်နီပြည်သူ့အင်အားစု PKPF က ယခုလဆန်းပိုင်းတွင် ထုတ်ပြန်ထားသည်။