ဗြိတိန်၊ ဘဏ္ဍာရေးဝန်ကြီးဌာနရဲ့ ထုတ်ပြန်ချက်အရ ဒဏ်ခတ်အရေးယူတဲ့စာရင်းမှာ ဦးတေဇနဲ့ Htoo Group of Companiesကို ထပ်မံထည့်သွင်းလိုက်တာဖြစ်ပြီး သူတို့ရဲ့ငွေကြေးအားလုံးနဲ့ စီးပွားရေးဆိုင်ရာရင်းမြစ်အားလုံးကို ဗြိတိန်မှာ ပိတ်ပင်ခံရမှာဖြစ်ပါတယ်။
မြန်မာနိုင်ငံမှာ ဒီမိုကရေစီ၊ တရားဥပဒေစိုးမိုးရေး ဒါမှမဟုတ် ကောင်းမွန်တဲ့အုပ်ချုပ်ရေးတို့ကို လျော့ပါးစေခြင်း၊ ပြည်သူတွေကို ဖိနှိပ်ခြင်း၊ ပြင်းထန်တဲ့လူ့အခွင့်အရေးချိုးဖောက်ခြင်းနဲ့ ကျူးလွန်မှုတွေကို စုံစမ်းစစ်ဆေးရာမှာ အဟန့်အတားပြုခြင်း၊ လူသားခြင်းစာနာမှုအကူအညီပေးခြင်းကို နှောင့်ယှက်ခြင်း၊ ငြိမ်းချမ်းရေး၊ တည်ငြိမ်ရေးနဲ့ လုံခြုံရေးတို့ကို ခြိမ်းခြောက်ခြင်း စတာတွေမှာ ပါဝင်သူတွေကို ဗြိတိန်က ဒဏ်ခတ်အရေးယူမှုပြုလုပ်တာဖြစ်ပါတယ်။
ဗြိတိန်ရဲ့ ဒဏ်ခတ်အရေးယူတဲ့စာရင်းမှာ အကြမ်းဖက်မြန်မာစစ်တပ်ခေါင်းဆောင် မင်းအောင်လှိုင်ကစလို့ သူ့ရဲ့ နောက်လိုက်တွေအပါအဝင် ၂၄ ဦး၊ မြန်မာ့ကျောက်မျက်လုပ်ငန်း၊ မြန်မာ့ပုလဲလုပ်ငန်း၊ မြန်မာ့သစ်လုပ်ငန်းနဲ့ အာဏာသိမ်းပြီးနောက် ဖွဲ့စည်းလိုက်တဲ့ နိုင်ငံတော်စီမံအုပ်ချုပ်မှုကောင်စီ(SAC)တို့ ပါဝင်နေပါတယ်။
ခရိုနီဦးတေဇဟာ အကြမ်းဖက်စစ်တပ်အာဏာသိမ်းပြီးနောက်ပိုင်း ပြီးခဲ့တဲ့မေလမှာ စစ်တပ်ထိပ်တန်းအရာရှိတွေရဲ့ ရုရှားနိုင်ငံခရီးစဉ်ကို လိုက်ပါခဲ့တယ်လို့ သတင်းမီဒီယာအချို့မှာဖော်ပြပြီး အဲဒီခရီးစဉ်အတွင်း အကြမ်း ဖက်စစ်တပ်ဟာ မြန်မာပြည်သူတွေကို သတ်ဖြတ်နှိမ်နင်းဖို့ ဝေဟင်သုံးလက်နက်တွေအပါအဝင် စစ်လက်နက် ပစ္စည်းတွေ ဝယ်ယူခဲ့တယ်လို့ ဆိုပါတယ်။
Public Service Announcement
