ကရင်နီပြည် ကာကွယ်ရေးတပ်များမှ ရဲဘော် ၁၈၃ဦးကျဆုံးခဲ့ရ
စစ်တပ်အာဏာသိမ်းပြီးနောက်ပိုင်း ကရင်နီ(ကယား)ပြည်နယ် တိုက်ပွဲများ၌ သေဆုံးခဲ့သည့် စစ်ကောင်စီတပ်သား ၁,၆၁၈ဦး အထိရှိကြောင်း တိုးတက်သောကရင်နီပြည်သူ့အင်အားစု(PKPF) က ယနေ့(နိုဝင် ဘာ ၁ ရက်) ထုတ်ပြန်သည်။
အလားတူ အကြမ်းဖက်စစ်ကောင်စီတပ်ကို ခုခံတိုက်ခိုက်ခဲ့ရာတွင် ကရင်နီတပ်မတော်(KA) ၊ ကရင်နီအမျိုးသားများကာကွယ်ရေးတပ်(KNDF)နှင့် ပြည်သူ့ကာကွယ်ရေးတပ်များမှ ရဲဘော် ၁၈၃ဦး ကျဆုံးခဲ့သည်ဟု ဆိုသည်။
တိုက်ပွဲပေါင်း ၅၀၀ ကျော်တွင် အကြမ်းဖက်စစ်ကောင်စီတပ်က ကရင်နီဒေသသို့ လေကြောင်းမှ (၁၇၃)ကြိမ်ထက်မနည်း ပစ်ကူတိုက်ခိုက်ခဲ့ကြောင်း ဖော်ပြသည်။
“အခုဒီနေ့ထိလည်း တိုက်ပွဲတွေရှိနေတယ်။အထူးသဖြင့် ဆောင်ကန်းရွာအနီးမှာ နှစ်ဖက်ထိတွေ့မှု ပြင်းထန်နေတယ်။စကစက လွိုင်ကော်- မိုးဗြဲ လမ်းမကြီးကို ထိန်းချုပ်ဖို့ထိုးစစ်ဆင်နေတာ”ဟု ကရင်နီဒေသခံစစ်ရေးသတင်းရင်းမြစ်က လူထုနွေဦးသို့ ပြောသည်။
Public Service Announcement
ယမန်နှစ် ဖေဖော်ဝါရီ ၁ ရက်မှ ယခုနှစ် အောက်တိုဘာလကုန်အထိ ကရင်နီပြည်၌စစ်ကောင်စီ၏ ဖမ်းဆီးသတ်ဖြတ်ခံရသည့် ပြည်သူ ၂၈၂ ဦးအထိရှိကြောင်း အသိပေးသည်။
ထို့အပြင် စစ်ဘေးရှောင်နေစဥ် သေဆုံးခဲ့ရသည့် ပြည်သူ ၉၇ ဦးရှိပြီး အများစုမှာ စစ်ကောင်စီ၏ လက်နက်ကြီး ထိမှန်ခြင်း၊လေကြောင်းတိုက်ခိုက်ခံရမှုများ အပါအဝင် ဆေးဝါးမလုံလောက်ခြင်းနှင့် ဆေးဝါးကောင်းမွန်စွာကုသခွင့်မရရှိခြင်းကြောင့်ဟု PKPF က ပြောသည်။
အာဏာသိမ်းအကြမ်းဖက်စစ်တပ်၏ မတရားဖမ်းဆီးခံထားရသော ပြည်သူအရေအတွက်မှာလည်း ၂၈၀ ဦးထိရှိကာ လွိုင်ကော်ထောင်မှ မန္တလေးအကျဥ်းထောင်သို့ လွှဲပြောင်းခံရသူအချို့ ရှိကြောင်းလည်း သိရသည်။
