ဒီနေ့မှာကျရောက်တဲ့ အမျိုးသားနေ့ကို ဂုဏ်ပြုတဲ့အနေနဲ့ အာဏာသိမ်းစစ်ကောင်စီက အကျဉ်းသားတွေကို လွှတ်ပေးရာမှာ နိုင်ငံရေးအကျဉ်းသားအနည်းငယ်သာ ပါဝင်ပါတယ်။
စစ်ကောင်စီ လွှတ်ပေးတဲ့ အကျဉ်းသား ၆၀၀၀ နီးပါးမှာ နိုင်ငံရေးအကျဉ်းသားဟာ လက်တစ်ဆုပ်စာ သာ ပါဝင်ပါတယ်။
နိုင်ငံရေးအကျဉ်းသားတွေကို အဓိကဖမ်းဆီးထားတဲ့အင်းစိန်ထောင် မှာ ဒီနေ့ ညပိုင်း ၆ နာရီဝန်းကျင်ထိ ကား ၁၀ စီးကျော် နဲ့ အကျဉ်းသားတွေကို YBS ကားတွေနဲ့လွှတ်ပေးရာမှာ ပထမဦး ဆုံးကားက လွဲရင် ကျန်တဲ့ကားတွေမှာ ပါလာသူတွေဟာ ရာဇဝတ်မှုတွေ နဲ့ထောင်ကျနေသူတွေအများအပြားပါလာတာတွေ့ရပါတယ်။
အင်းစိန်ထောင်ကနေ ဒီနေ့ မွန်းလွဲပိုင်း ၂ နာရီ ကျော်မှာ ပထမဆုံး ထွက်လာတဲ့ မီနီဘတ်စ်ကားပေါ်မှာတော့ ထင်ရှားတဲ့ ၈၈ မျိုးဆက်ကျောင်းသားခေါင်းဆောင် ဦးမြအေး ၊ ရွှေညဝါဆရာတော် ၊ စာရေးဆရာ မောင်သာချို ၊ NLD ပြောရေးဆိုခွင့်ရှိသူ ဒေါက်တာမျိုးညွှန့် နဲ့ NLD ပါတီဝင် ၂ ဦးပါဝင်လာပါတယ်။
Public Service Announcement
အဲဒီနောက်ပိုင်း ထွက်လာတဲ့ ကားတွေမှာတော့ နိုင်ငံရေးအကျဉ်းသားမပါတာကိုမေးမြန်းစုံစမ်းမှုအရသိရပါတယ်။
ဒါကြောင့် အင်းစိန်ထောင်ရှေ့ မိုးရေတွေထဲမှာ နိုင်ကျဉ်းတွေကို လာရောက်ကြိုဆိုကြတဲ့ မိသားစုဝင်အချို့က စစ်ကောင်စီဟာ လွတ်ငြိမ်းပေးရာမှာ ဂျင်းထည့်တယ်လို့ အချင်းချင်းပြောဆိုကြပါတယ်။
” ရှေ့ကားမှာ ဂေါင်တွေပါပြီးနောက်ကားတွေမှာ ဂျင်းထည့်တာ ” လို့ မိသားစုဝင်နိုင်ကျဉ်း ကိုလာရောက်စောင့်ဆိုင်းတဲ့ အမျိုးသမီးတစ်ဦးက ပြောပါတယ်။
ဒါအပြင် စစ်ကောင်စီက ခိုးဆိုး၊လုနှိုက်တွေ လွှတ်လိုက်တာကြောင့် အရင်ကထက်ပိုသတိထားရမယ်လို့လည်း ပြောဆိုသံတွေကိုကြားရပါတယ်။
အင်းစိန်ထောင်အပြင် အခြားသော ထောင်တွေကနေ လွတ်မြောက်လာသူတွေထဲမှာလည်း နိုင်ကျဉ်းအနည်းကျဉ်းသာပါဝင်တယ်လို့ စုံစမ်းသိရပါတယ်။
