ဒီနေ့ ကျရောက်တဲ့အမျိုးသားနေ့ကို ဂုဏ်ပြုတဲ့အနေနဲ့ အကျဉ်းထောင်အသီးသီးက အကျဉ်းသား ၅၇၀၀ ကျော်ကို ပြန်လွှတ်ပေးမယ်လို့စစ်ကောင်စီက ကြေညာပါတယ်။
ဖမ်းဆီးထားတဲ့ နိုင်ငံခြားသား ၄ ဦးကို လည်း လွှတ်ပေးပြီး ပြည်နှင်ဒဏ်ပေးမယ်လို့ စစ်ကောင်စီရဲ့ ကြေညာချက်မှာပါရှိပါတယ်။
လွှတ်ပေးမယ့် နိုင်ငံခြားသားတွေဟာ ဘယ်သူတွေဖြစ်တယ်ဆိုတာကိုတော့ စစ်ကောင်စီက ကြေညာတာမရှိပါဘူး။
စစ်ကောင်စီဖမ်းထားတဲ့ နိုင်ငံခြားသားတွေထဲမှာ NLD စီးပွားရေးအကြံပေး သြစတြးလျနိုင်ငံသား စီးပွားရေးပညာရှင် ရှောင်တာနယ် ၊ ဗြိတိန်သံအမတ်ကြီးဟောင်း ဗစ်ကီဘိုးမန်း ၊ ရုပ်ရှင်မှတ်တမ်းရိုက်ကူးသူ ဂျပန်နိုင်ငံသား တိုရူကူဘိုတာတို့ရှိနေပါတယ်။
Public Service Announcement
ဒါအပြင် စစ်ကောင်စီရဲ့ ဒီနေ့ကြေညာချက်မှာ ပုဒ်မ ၅၀၅ (က) နဲ့တရားစွဲထားတဲ့ အနုပညာရှင် ၁၁ ဦးကို အမှုပိတ်ပေးမယ်လို့လည်းဆိုထားပါတယ်။
ဒီနေ့လွှတ်ပေးမယ့် သူတွေထဲမှာ စစ်တပ်အာဏာသိမ်းပြီးနောက်နိုင်ငံရေးပုဒ်မတွေနဲ့ မတရားဖမ်းဆီးခံထားရသူ ဘယ်နှစ်ဦးပါဝင်မလဲဆိုတာကို စုံစမ်းနေဆဲပါ။
ပြီးခဲ့တဲ့ ဧပြီလအတွင်းက လွတ်ငြိမ်းမှာတော့ နိုင်ငံရေးအကျဉ်းသားမပါဝင်သလောက်နည်းပါးတာတွေ့ရပါတယ်။
စစ်တပ်အာဏာသိမ်းချိန်ကနေ လပေါင်း ၂၀ ကျော်ကာလအတွင်း ဖမ်းဆီးခံရသူဦးရေဟာ ၁၃၀၀၀ ကျော်ရှိနေတယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) က စာရင်းပြုစုထားပါတယ်။
